​ប្រែ​សម្រួលៈ​វាសនា​៖​ឥណ្ឌា​កំពុង​បញ្ចេញ​សាច់ដុំ​ជើង​ទឹក​របស់ខ្លួន​ដើម្បី​ទប់​ឥទ្ធិពល​កាន់តែ​កើន​ឡើង​របស់​ចិន ដោយ​បាន​ធ្វើ​ការសាកល្បង​ក្នុង​សមុទ្រ​លើ​នាវា​ផ្ទុក​យន្តហោះ​ផលិត​ក្នុងស្រុក​​លើកដំបូង​របស់​ខ្លួន និង​បញ្ជូន​ក្រុង​ការងារ​មួយ​សំរាប់​ចូលរួម​សមយុទ្ធ​ជាមួយ​សហរដ្ឋ​អាម៉េរិក​និង​សម្ពន្ធមិត្ត​ដទៃទៀត​។​

​នាវា​INS Vikrant​ដែល​បាន​ចាប់ផ្តើម​បើក​សាកល្បង​នៅ​ឯនាយ​រដ្ឋ​កេ​រ៉ា​ឡា​ភាគខាងត្បូង​កាលពី​ថ្ងៃ​ពុធ នឹង​ជា​នាវា​ផ្ទុក​យន្តហោះ​ទី​២​របស់​ណ្ឌា​ដែល​ត្រូវបាន​ដាក់​ដំណើរការ​។​កងទ័ព​​ជើង​ទឹក​ឥណ្ឌា​បាន​និយាយថា ប្រទេស​ឥណ្ឌា​ឥឡូវ​«​ចូលរួម​ជាមួយ​ប្រទេស​មួយចំនួន​តូច​ដែល​មាន​សមត្ថភាព​រចនា​ម៉ូត​និង​សាងសង់​នាវា​ផ្ទុក​យន្តហោះ​ដោយ​ខ្លួនឯង​…»​។​

​នាវា​ប្រវែង​២៦២​ម៉ែត្រ​នេះ​ចូលរួម​ជាមួយ​នាវា​INS Vikramaditya​ផលិត​នៅ​សូ​វៀត​ដែល​ឥណ្ឌា​បាន​ទិញ​នៅ​ឆ្នាំ​២០០៤​។​

​កងទ័ពជើងទឹក​ឥណ្ឌា​បាន​និយាយថា​នាវាចម្បាំង​និង​នាវា​មុជទឹក​៤៤​គ្រឿង​ទៀត​កំពុង​ត្រូវ​សាងសង់​នៅក្នុង​ស្រុក​ហើយ​ខ្លួន​ក៏​កំពុង​ជំរុញ​អោយ​រដ្ឋាភិបាល​អនុម័ត​ការសាងសង់​នាវា​ដឹក​យន្ត​​ហោះ​ទី​៣​។​

​ចិន​ដែល​ប្រជែង​រក​ឥទ្ធិពល​នៅក្នុង​មហាសមុទ្រ​ឥណ្ឌា ក៏​កំពុង​ស្ថាបនា​នាវាមុជទឹក​ទី​៣​ផងដែរ​។​

​កាលពី​ថ្ងៃ​ចន្ទ កងទ័ពជើងទឹក​ឥណ្ឌា​បាន​និយាយថា ខ្លួន​បញ្ជូន​នាវាចម្បាំង​៤​គ្រឿង​ទៅ​អាស៊ីអាគ្នេយ៍ សមុទ្រ​ចិន​ខាងត្បូង​និង​ប៉ាស៊ីហ្វិក​ខាងលិច​សំរាប់​សមយុទ្ធ​រយៈពេល​២​ខែ រួមជាមួយ​​វៀតណាម​ណ ហ្វីលីពីន ជប៉ុន អូស្ត្រាលី និង​អាម៉េរិក​។​

​សូមបញ្ជាក់​ថា ឥណ្ឌា ជប៉ុន អូស្ត្រាលី និង​អាម៉េរិក​រួម​គ្នា​បង្កើត​សម្ពន្ធភាព​មួយ​ឈ្មោះថា​Quad ដែល​ត្រូវ​គេ​មើលឃើញ​ថា​ដើម្បី​ប្រឆាំង​ចិន​៕

​នាវា​INS Vikrant​ចាប់ផ្តើម​បើក​សាកល្បង​ក្នុង​សមុទ្រ​