​ប្រែ​សម្រួល : កញ្ញា​ដា​លី​ស (​បាងកក​ប៉ុស្តិ៍​) ៖ អាជ្ញាធរ​ក្រុង​តូ​ក្យូ​បាន​និយាយថា ករណី​ឆ្លង​វីរុស​កូរ៉ូណា​ប្រចាំ​ថ្ងៃ​នៅ​ទីក្រុង​តូ​ក្យូ​បាន​ឈាន​ដល់​កម្រិត​កំណត់ត្រា ៥.០៤២ នាក់​កាលពី​ថ្ងៃ​ព្រហស្បតិ៍​ទី​៥​សីហា ដោយ​លើស​ខ្ទង់ ៥.០០០ នាក់​ជា​លើកដំបូង ខណៈ​ការ​ផ្ទុះឡើង​នៃ​មេរោគ​កូរ៉ូណា​បានដាក់​សម្ពាធ​ធ្ងន់​លើ​ប្រព័ន្ធ​វេជ្ជសាស្ត្រ​នៅក្នុង​ប្រទេស​ជប៉ុន​។​

​ទីក្រុង​តូ​ក្យូ ដែល​ធ្វើ​ជា​ម្ចាស់ផ្ទះ​អូឡាំពិក​ខណៈ​កំពុង​ស្ថិតក្នុង​ស្ថានភាព​គ្រាអាសន្ន​កំរិត​ទី​បួន​របស់​ខ្លួន​អំឡុងពេល​មាន​ជំងឺ​រាតត្បាត​នេះ បាន​រាយការណ៍​តួលេខ​ខ្ពស់​បំផុត​សម្រាប់​ថ្ងៃ​ទី​ពីរ​ជាប់ៗ​គ្នា បន្ទាប់​ពី​បាន​កត់ត្រា​ករណី​ឆ្លង​ចំនួន ៤.១៦៦ នាក់​កាលពី​ថ្ងៃ​ពុធ​។​

​រដ្ឋាភិបាល​ជប៉ុន​បាន​សម្រេចចិត្ត​នៅ​ថ្ងៃ​ដដែល​ដើម្បី​ពង្រីក​ស្ថានភាព​អាសន្ន​ដោយ​ផ្នែក​នៅ​ក្នុង​ខេត្ត​ចំនួន​ប្រាំបី​បន្ថែមទៀត ដោយ​ហាមឃាត់​ការសេព​គ្រឿង​ស្រវឹង​ជាគោលការណ៍​សំខាន់បំផុត ខណៈ​មេរោគ​បំ​ប្លែងខ្លួន Delta កំពុង​ឆ្លង​រីក​រាលដាល​នៅ​តំបន់​ទាំងនោះ​។​

​ចំណាត់ការ​នេះ​ធ្វើឡើង​បន្ទាប់​ពី​រដ្ឋាភិបាល​កាលពី​ថ្ងៃ​ចន្ទ​បាន​បន្ថែម​ទីក្រុង​អូ​សា​កា​និង​ខេត្ត​ចំនួន​បី​នៅ​ជិត​រាជធានី​ទៅក្នុង​ស្ថានភាព​អាសន្ន​ដែល​បានដាក់​រួច​ទៅ​ហើយ​នៅក្នុង​ទីក្រុង​តូ​ក្យូ​​និង​កោះ​អូ​គី​ណា​វ៉ា ហើយ​បាន​ដាក់​ស្ថានភាព​អាសន្ន​ដោយ​ផ្នែក​លើ​ខេត្ត​ចំនួន​ប្រាំ​រហូតដល់​ចុងខែ​សីហា​នេះ​។​

​បន្ទាប់ពី​ធ្វើ​ការសម្រេចចិត្ត​នេះ​រួច នាយករដ្ឋមន្ត្រី យ៉ូ​ស៊ី​ហ៊ី​ដេ ស៊ូ​ហ្គា បាន​និយាយថា​”​ការឆ្លង​មេរោគ​កំពុង​រីក​រាលដាល​ក្នុង​កម្រិត​មួយ​ដែល​មិន​ធ្លាប់​មាន​ពីមុន​មក​នៅក្នុង​តំបន់​ទីក្រុង​​និង​កន្លែង​ផ្សេង​ទៀត​”​។​

​លោក​ស៊ូ​ហ្គា​និយាយថា “​ជាមួយ​នឹង​ការកើនឡើង​នៃ​ករណី​ឆ្លង​ទាំងនោះ ចំនួន​អ្នកជំងឺ​ធ្ងន់ធ្ងរ​ក៏​កំពុង​កើនឡើង​ផងដែរ​” ខណៈ​កត់សម្គាល់ថា មេរោគ Delta ឥឡូវ​នេះ​មាន​ចំណែក​ប្រហែល ៩០ ភាគរយ​នៃ​ករណី​ឆ្លង​វីរុស​កូរ៉ូ​ណា​នៅ​ទីក្រុង​តូ​ក្យូ ហើយ​សម​មាត្រ​នេះ​គឺ​ខ្ពស់​នៅក្នុង​ទីតាំង​ផ្សេងទៀត​៕

​អ្នកក្រុង​តូ​ក្យូ​ដើរ​ឆ្លងថ្នល់​ពាក់​ម៉ាស់​កាលពី​ថ្ងៃទី​២៧​កក្កដា​កន្លងទៅ​