​ដោយៈ​សុ​ផានី​តា​/​កោះកុងៈ អាជ្ញាធរ និង​មន្ត្រី​ជំនាញ​ស្រុក​ស្រែអំបិល បានធ្វើ​យុទ្ធនាការ​បាញ់ថ្នាំ​សម្លាប់​មេរោគ​នៅក្នុង និង​ក្រៅ​ផ្សារ​ស្រែអំបិល ដើម្បី​រៀបចំ​សណ្តាប់ធ្នាប់​អនាម័យ​សោ​ភ័​ណ្ឌ​ភាព​ឱ្យ​ល្អប្រសើរ ដើម្បី​ទប់ស្កាត់​ការឆ្លង​រីក​រាលដាល​ជំងឺ​កូ​វីដ​១៩ នាពេល​បច្ចុប្បន្ន​។​

​លោក ជា ចាន់​កញ្ញា អភិបាលស្រុក​ស្រែអំបិល ឱ្យដឹង​នៅ​ថ្ងៃ​ព្រឹក​ទី​៦ ខែសីហា​ថា យុទ្ធនាការ​នេះ​ធ្វើឡើង​ក្នុង​រយៈពេល​៣​ថ្ងៃ​ទៅ​១​សប្តាហ៍​ចំពោះ​ការបាញ់​ថ្នាំ​សម្លាប់​មេរោគ​តាម​តូប​លក់ដូរ​របស់​អាជីវ​ករ និង​ក្នុង​ក្រៅ​បរិវេន​ផ្សារ​ស្រែអំបិល គ្រា​ពលរដ្ឋ​អា​ជីករ​ប្រកប​អាជីវកម្ម​ជាធម្មតា​កាលពី​រសៀល​ថ្ងៃទី​៥ ខែសីហា​។​

​ក្រៅពី​ការបាញ់​ថ្នាំ​សម្លាប់​មេរោគ អាជ្ញាធរ មន្ត្រី​ជំនាញ និង​ប្រធាន​ផ្សារ រឹតបន្តឹង​ការចេញចូល​ផ្សារ​ទិញ​លក់ទំនិញ គឺ​ដោយ​តម្រូវឱ្យ​មានការ​ធ្វើតេស្ត​រហ័ស​រក​ជំងឺ​កូ​វីដ វាស់​ក​ម្ពៅ ពាក់​ម៉ាស់ លាងដៃ​នឹង​អាល់កុល ព្រមទាំង​រក្សា​គម្លាត​សុវត្ថិភាព​ជាដើម​។​

​យុទ្ធនាការ​ទប់ស្កាត់ និង​បង្ការ​ជំងឺ​កូ​វីដ​នៅ​តំបន់​ផ្សារ​ស្រែអំបិល​នេះ ត្រូវបាន​លោក​វេជ្ជបណ្ឌិត ទៅ ម៉ឹង ប្រធាន​មន្ទីរ​សុខាភិបាល​ខេត្តកោះកុង កោតសរសើរ​ពី​កិច្ចប្រឹងប្រែង​របស់​អាជ្ញា​ធរ​សមត្ថកិច្ច ក៏ដូចជា​មន្ត្រី​សុខាភិបាល​ស្រុក​។

​លោក​វេជ្ជបណ្ឌិត​ប្រធាន​មន្ទីរ​សុខាភិបាល បន្ថែម​ដែរ​ថា កន្លងទៅ ផ្សារ​ស្រែអំបិល មិន​ធ្លាប់​ចេញ​សេចក្តីសម្រេច​ឱ្យ​បិទ​ផ្អាក​អាជីវកម្ម​ដោយ​មិន​ចាត់​ចូល​ជា​តំបន់​ក្រហម​នោះទេ ប្រសិនបើ​តែ​តូប​អាជីវក​រណា​ដែល​រកឃើញ​វិជ្ជមាន គ្រា​ការយក​សំណាក​ទៅធ្វើ​តេស្ត​រហ័ស និង​រកឃើញ​អ្នក​វិជ្ជមាន​តិចតួច​ក៏ដោយ​។​បច្ចុប្បន្ន ស្ថានភាព​ជំងឺ​កូ​វីដ​១៩​នៅ​ស្រុក​ស្រែអំបិល ហាក់បីដូចជា​ស្ងប់​ស្ង​ត់​បន្តិច​ហើយ ក្រោម​កិច្ចប្រឹងប្រែង​មាន​វិធានការ​ទប់ស្កាត់ និង​ដោះស្រាយ​ពី​អាជ្ញាធរ​សមត្ថកិច្ច​ពាក់​ព័ទ្ធ​ទាំងអស់​មិនថាតែ​ថ្នាក់ស្រុក ឬ​ខេត្ត​នោះទេ​។
​តំបន់​សំខាន់ៗ​ចេញចូល​ក្នុងភូមិ​សាស្ត្រ​ស្រុក​ស្រែំ​បិ​ល ត្រូវបាន​រឹតបន្តឹង​ទៅតាម​ការណែនាំ​របស់លោក​ស្រី មិថុនា ភូ​ថង អភិបាលខេត្ត​កោះកុង ជាពិសេស​ការសម្រេចរ​បស់​ប្រមុខ​រាជរដ្ឋាភិបាល​បិទ​ខ្ទប់​ខេត្ត និង​ដាក់​បម្រាម​គោចរ​ពេល​រាត្រី ដើម្បី​ទប់ស្កាត់​អត្រា​ចម្លងជំងឺ​កូ​វីដ​១៩ ខណៈ​ជំងឺ​កូ​វីដ​១៩ ប្រភេទ​ដែល​តា (Delta) កំពុង​គំរាមកំហែង​៕​