ដោយៈ បាយ័ន / សៀមរាបៈ ក្រុមប្រឹក្សាខេត្តសៀមរាប អាណត្តិទី៣ បានរៀបចំបើក កិច្ចប្រជុំសាមញ្ញ លើកទី២៧ តាមរយៈប្រព័ន្ធវិឌីអូ កាលពីថ្ងៃទី៥ ខែសីហា ឆ្នាំ២០២១ ក្រោមអធិបតីភាព លោក អ៊ាន ឃុន ប្រធានក្រុមប្រឹក្សា ខេត្តសៀមរាប និងលោក លី សំរិទ្ធ អភិបាលរង តំណាងដ៏ខ្ពង់ខ្ពស់ឯកឧត្តម ទៀ សីហា អភិបាលខេត្តសៀមរាប ។
កិច្ចប្រជុំនេះ មានរបៀបវារៈចំនួន ៤ គឺៈ ទី១ ពិនិត្យ និងអនុម័ត កំណត់ហេតុ កិច្ចប្រជុំសាមញ្ញ លើកទី២៦ របស់ក្រុមប្រឹក្សាខេត្ត អាណត្តិទី៣ កាលពីថ្ងៃទី៦ ខែកក្កដា ឆ្នាំ២០២១ , ទី២ ពិនិត្យនិងអនុម័ត របាយការណ៍ ប្រចាំខែកក្កដា ឆ្នាំ២០២១ របស់រដ្ឋបាលខេត្ត , ទី៣ ពិនិត្យ ពិភាក្សា និងអនុម័ត លើការកែសម្រួល សមាសភាព គណៈកម្មាធិការពិគ្រោះយោបល់ កិច្ចការស្ត្រី និងកុមារ និង ទី៤បញ្ហាផ្សេងៗ ។
ក្រៅពីរបៀបវារៈទាំងបួននេះ អង្គប្រជុំ បានលើកយកនូវ បញ្ហាមួយចំនួន មកពិភាក្សា រួមមានៈ អំពីវិធានការ ក្នុងការបង្ការ ការពារ និងទប់ស្កាត់ការឆ្លងរាលដាលជំងឺកូវីដ-១៩ ក្នុងឱកាសដែលស្ថានការណ៍ នៃជំងឺនេះ កំពុងបន្តរីករាលដាល កាន់តែខ្លាំង , បញ្ហាករណីមេរោគបំប្លែងថ្មី ប្រភេទឌែលតា , បញ្ហាទទួលប្រជាពលរដ្ឋ មកពីក្រៅ ប្រទេស , ការចាក់វ៉ាក់សាំង ជូនប្រជាពលរដ្ឋក្នុងខេត្ត , ការធ្វើអាជីវកម្មផលិតផល ក្លែងក្លាយទាំងសម្ភារ ប្រើប្រាស់ និងម្ហូបអាហារ , បញ្ហាសុវត្ថិភាពចរាចរណ៍ , បញ្ហាការស្ថាបនាផ្លូវ ៣៨ ខ្សែ ក្នុងក្រុងសៀមរាប , បញ្ហាអំពើហិង្សាលើស្រី និងកុមារ និងបញ្ហាគ្រោះមហត្ថរាយផ្សេងៗ ដូចជា បញ្ហាទឹកជំនន់ និងអគ្គិភ័យ ជាដើម ។
លោក អ៊ាន ឃុន ប្រធានក្រុមប្រឹក្សាខេត្ត បានមានប្រសាសន៍ថាៈ ប្រមុខរាជរដ្ឋា ភិបាលកម្ពុជា បានអនុញ្ញាតឲ្យកុមារ និង យុវវ័យ ដែលមានអាយុ ចាប់ពី ១២ ឆ្នាំ ដល់ ១៧ ឆ្នាំ ត្រូវមកទទួលវ៉ាក់សាំង បង្ការជំងឺកូវីដ-១៩ ឲ្យបានគ្រប់ៗគ្នា ព្រោះវាជា វិធានការ ចាំបាច់មួយ ដើម្បីដោះស្រាយ និងស្ដារឡើងវិញ ចំពោះការបង្កើន ចំណេះដឹងឡើងវិញ សម្រាប់យុវ័យយើង ព្រោះថា ការចាក់វ៉ាក់សាំងជូនពួកគាត់ នេះ វាអាចជាឱកាស ដែលឲ្យក្រសួងអប់រំ យុវជន និងកីឡា អាចដំណើរការ នៃការចាប់ផ្ដើម ឲ្យមានការបើកសាលារៀនឡើងវិញ ដូចនេះ សូមឲ្យក្រុមការងារ ត្រូវពន្លឿនបន្ថែមទៀត ចំពោះការងារចាក់វ៉ាក់សាំង ជូនប្រជាពលរដ្ឋយើង ឲ្យបានគ្រប់ៗគ្នា តាមដែលអាចធ្វើទៅបាន ក្នុងនោះលោកគ្រូអ្នកគ្រូក៏ដូចជាអាណា ព្យាបាល ត្រូវធ្វើការផ្សព្វផ្សាយ និងណែនាំបន្ថែមទៀត សម្រាប់កូនៗរបស់ខ្លួន អំពីវិធីសាស្ត្រក្នុងការការពារ នៃការឆ្លងនូវជំងឺកូវីដ-១៩ ដែលជាជំងឺមួយដ៏កាច សាហាវនេះ ។
លោកប្រធានក្រុមប្រឹក្សាខេត្ត បានណែនាំដល់មន្ត្រីជំនាញពាក់ព័ន្ធ ត្រូវបង្កើន ការរឹតបន្ទឹងបន្ថែមទៀត ក្នុងនោះលោក លី សំរិទ្ធ បានមានប្រសាសន៍ថាៈ កន្លងមកនេះ បើទោះជាការគ្រប់គ្រងទិន្នន័យអ្នកដំណើរ និងការស្រាវជ្រាវ រកអ្នកពាក់ព័ន្ធ ក្នុងករណីឆ្លងជំងឺកូវីដ-១៩ ត្រូវបានរកឃើញ ឲ្យធ្វើចត្តាឡីស័ក និងយកវត្ថុសំណាក ទៅវិភាគ រួមទាំងបានបញ្ជូនអ្នកវិជ្ជមាន ទៅព្យាបាលនៅ មន្ទីពេទ្យបង្អែកខេត្ត និងទីតាំងព្យាបាលផ្សេងៗ ជាបន្តបន្ទាប់ ក៏ពិតមែន ប៉ុន្តែវានៅ តែជាក្តីព្រួយបារម្ភ ដោយសារចំនួន អ្នកមកពីក្រៅប្រទេស មានចំនួនកើនឡើង ហើយក្នុងនោះដែរ ចំពោះអ្នកមកពី ក្រៅប្រទេសនេះដែរ ក្រុមការងារ ក៏បានរក ឃើញ នូវករណីវិជ្ជមាន ជំងឺកូវីដ-១៩ និងវិរុសបំប្លែងខ្លួនថ្មី ប្រភេទដែលតា ជាច្រើនករណី ដែលវាជាបញ្ហាមួយធ្វើឲ្យអាជ្ញាធរខេត្ត មានការព្រួយបារម្ភ៕/V-PC
