ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ជំងឺ​រាតត្បាត​កូវី​ដ​១៩ បានធ្វើឱ្យ​វិសមភាព​ប្រាក់ចំណូល​របស់​ឥណ្ឌា​ឈានដល់​ចំណុចកំពូល​ដ៏​គួរឱ្យ​ឈឺចាប់​។​

​ទោះបី​ឥណ្ឌា​បាន​រាយការណ៍​ពី​ការកើនឡើង​នៃ​ក្រុមហ៊ុន​បច្ចេកវិជ្ជា​គីឡូ​ធ្ងន់ៗ​និង​មហាសេដ្ឋី​មាន​ជាង​មុន ៣៥ ភាគរយ​ក៏​ដោយ​ក៏​ប៉ុន្តែ​ប្រជាជន​ឥណ្ឌា​រាប់លាន​នាក់​កំពុង​បោះបង់​​ចោល​ការសិក្សា​នៅ​វិទ្យាល័យ​និង​មហាវិទ្យាល័យ ដោយ​ទទួលទាន​អាហារ​បាន​តិចតួច​និង​ជាប់បំណុល​ដោះ​មិន​រួច​។​

​មហាសេដ្ឋី​ម្ចាស់​ក្រុមហ៊ុន​ទូរគមនាគមន៍​និង​ជា​ម្ចាស់​ក្រុមហ៊ុន​លក់រាយ​របស់​ឥណ្ឌា លោក មូ​កេស អាម​បា​នី បាន​បន្ថែម​ទ្រព្យសម្បត្តិ​សុទ្ធ ៤៨​ពាន់​លាន​ដុល្លារ​អាម៉េរិក​ទៅក្នុង​ទ្រព្យសម្បត្តិ​​សរុប​របស់​គាត់​កាលពី​ឆ្នាំមុន ខណៈ​ប្រទេស​ឥណ្ឌា​ឃើញ​ការធ្លាក់ចុះ​នៃ​ផលិតផល​ក្នុងស្រុក​សរុប​លើកដំបូង​របស់​ខ្លួន​ក្នុង​រយៈពេល​បួន​ទសវត្សរ៍​។ អ្នក​មាន​បំផុត​នៅ​អាស៊ី​និង​ជា​ម្ចាស់​ក្រុមហ៊ុន Reliance Industries រូបនេះ​បាន​ចុះ​កិច្ចព្រមព្រៀង​ជាមួយ​ក្រុមហ៊ុន Facebook និង Google កាល​ពី​ត្រីមាស​ខែ​មេសា​-​មិថុនា​។ នៅ​គ្រា​ដូចគ្នានេះដែរ​សេដ្ឋកិច្ច​​ឥណ្ឌា​បាន​ធ្លាក់ចុះ ២៣,៩ ភាគរយ​។​

​ចំនួន​មហាសេដ្ឋី​នៅក្នុង​ប្រទេស​បាន​កើនឡើង​ដល់ ១៤០ នាក់​ពី​ចំនួន ១០២ នាក់ ដោយ​ទ្រព្យសម្បត្តិ​រួម​របស់​ពួកគេ​បាន​កើនឡើង​ជិត​ទ្វេ​ដង គឺ ៥៩៦ ពាន់​លាន​ដុល្លារ​។​

​ទន្ទឹមនឹងនេះ ប្រជាជន​ឥណ្ឌា​ចំនួន ៧៥ លាន​នាក់​ទៀត​បាន​ធ្លាក់​ចូល​ក្នុង​ភាពក្រីក្រ ដែល​ស្មើនឹង ៦០ ភាគរយ​នៃ​កំណើន​ភាពក្រីក្រ​នៅ​ទូទាំង​ពិភពលោក​។​

​សេដ្ឋកិច្ច​បាន​បន្ត​ប្រឈមមុខ​នឹង​ភាពច្របូកច្របល់ ដោយ​ធ្លាក់​ចុះ ៧,៣ ភាគរយ​កាលពី​ឆ្នាំមុន​។ ប៉ុន្តែ​ទី​ផ្សារភាគហ៊ុន​មាន​សន្ទុះ​កើនឡើង​។ បន្ទាប់​ពី​ការធ្លាក់ចុះ​ពី​គ្រា​ដំបូង ឥឡូវ​វា​បាន​ងើប​ឡើងវិញ​និង​កើនឡើង​រហូត​ដល់ ៧៥ ភាគរយ​ធៀប​នឹង​ឆ្នាំ​មុន​។​

​ចាប់​តាំងពី​ទសវត្សរ៍​ទី​៩០​មក ចំនួន​អ្នកក្រ​នៅ​ឥណ្ឌា​បាន​ធ្លាក់ចុះ​ពាក់កណ្តាល ប៉ុន្តែ​ប្រាក់ចំណូល​របស់​អ្នកមាន​បាន​កើនឡើង​លឿន​ជាង​អ្នកក្រ​។ ផលិតផល​ក្នុងស្រុក​សរុប​សម្រាប់​ម​នុស្ស​ម្នាក់​នៅ​ចន្លោះ​ឆ្នាំ ១៩៩៨ និង ២០១៩ បាន​កើនឡើង ៨,៥ ដង ប៉ុន្តែ​ប្រាក់​ឈ្នួល​នៅតាម​ជនបទ​បាន​កើនឡើង​ត្រឹមតែ ៥,៤ ដង​ប៉ុណ្ណោះ​។ អ្នក​មាន​លំដាប់​កំពូល​ចំនួន ១ ភាគរយ រក​ប្រាក់​ចំណេញ​បាន ២១ ភាគរយ​នៃ​ប្រាក់ចំណូល​របស់​ប្រទេសជាតិ​ក្នុង​ឆ្នាំ ២០១៩ ។​

​ការសិក្សា​នៅ​ខែ​មករា​ឆ្នាំ ២០២០ ដោយ​អង្គការ​សិទ្ធិមនុស្ស Oxfam International បានបង្ហាញ​ថា គម្លាត​ទ្រព្យសម្បត្តិ​របស់​ឥណ្ឌា​គឺ​ធំ​ជាង​ពេលណាៗ​ទាំងអស់ ពោលគឺ​អ្នកមាន​​បំផុត ១ ភាគរយ​បាន​កាន់កាប់​ទ្រព្យសម្បត្តិ​ជាង ៤ ដង​នៃ​ទ្រព្យសម្បត្តិ​របស់​ប្រជាជន ៩៥៣ លាន​នាក់ ដែល​ស្មើនឹង ៧០ ភាគរយ​នៃ​ប្រជាជន​សរុប​។​តួលេខ​នេះ​គឺ​វ៉ា​ដាច់​វិសមភាព​នៅ​សហ​​រដ្ឋ​អាម៉េរិក ចិន រុស្ស៊ី បារាំង និង​អង់គ្លេស​។​

​នៅក្នុង​របាយការណ៍​ដែល​មាន​ចំណងជើង​ថា “​មេរោគ​វិសមភាព​” សេដ្ឋវិទូ​ចំនួន ២៩៥ នាក់​មកពី ៧៩​ប្រទេស​បាន​សន្និដ្ឋាន​ថា​ជំងឺ​រាតត្បាត​នឹង​បង្កើន​វិសមភាព​នៅ​ស្ទើរតែ​គ្រប់​ប្រទេស​ទាំង​​អស់​ក្នុងពេល​តែមួយ ដែល​រឿង​នេះ​កើត​ឡើង​ជា​លើកដំបូង​ក្នុង​រយៈពេល​មួយ​សតវត្សរ៍​។​

​លោក ចាយ៉ា​ទី ហ្គោស ជា​សាស្ត្រាចារ្យ​ផ្នែក​សេដ្ឋកិច្ច​នៅ​សាកលវិទ្យាល័យ Massachusetts Amherst បាន​និយាយថា ជាពិសេស​នៅក្នុង​ប្រទេស​កំពុងអភិវឌ្ឍន៍​ដូច​ឥណ្ឌា​ជំងឺ​រា​ត​​ត្បា​ត​បាន​ពង្រឹង​វិសមភាព​កាន់តែខ្លាំង​ឡើង​។​

​ការបាត់បង់​ការងារ​និង​ការកាត់បន្ថយ​ប្រាក់​ឈ្នួល​ឥឡូវនេះ​កំពុង​រីក​រាលដាល​ដូច​ទឹកបាក់​ទំនប់​នៅក្នុង​ប្រទេស​ឥណ្ឌា​។ យោង​តាម​មជ្ឈមណ្ឌល​សម្រាប់​ត្រួតពិនិត្យ​សេដ្ឋកិច្ច​ឥណ្ឌា (CMIE) បានឱ្យដឹងថា ភាព​អត់​ការងារ​ធ្វើ​បាន​កើនឡើង ១៣ ភាគរយ​នៅក្នុង​ខែមិថុនា គឺ​កើនឡើង​ពី ១០ ភាគរយ​កាលពី​ខែ​ធ្នូ​។​

​របាយការណ៍​មួយ​ដោយ​មជ្ឈមណ្ឌល​ការងារ​ប្រកបដោយ​និរន្តរភាព​នៃ​សាកលវិទ្យាល័យ Azim Premji នៅ​ទីក្រុង​បាង​ហ្គាឡ័​រ បាន​រកឃើញថា ប្រាក់ចំណូល​ប្រចាំខែ​បាន​ធ្លាក់ចុះ​ជា​មធ្យម ១៧ ភាគរយ​ក្នុងអំឡុងពេល​មាន​ជំងឺ​រាតត្បាត​នេះ ដោយ​បុគ្គលិក​ចេញ​រកស៊ី​ខ្លួនឯង​និង​បុគ្គលិក​ដែល​មាន​ប្រាក់ខែ​ក្រៅផ្លូវការ ទទួលរង​នូវ​ការខាតបង់​ធំ​បំផុត​។​

​ឧទាហរណ៍​ជាក់ស្តែង លោកស្រី​គ្រី​ស្នា ម៉ា​រី​ហ្គូ​វ​ដា បាន​បាត់បង់​ការងារ​ជា​ប្រតិបត្តិ​ករ​ទូរស័ព្ទ​នៅ​ទីក្រុង​បាង​ហ្គាឡ័​រ​បន្ទាប់​ពី​និយោជ​កម្ចាស់​ក្រុមហ៊ុន​ថ្មីថ្មោង​របស់​គាត់​បាន​រើ​ទីតាំង​ទៅ​សហរដ្ឋ​​អាម៉េរិក​ក្នុងអំឡុងពេល​មាន​ជំងឺ​រាតត្បាត​។ ប្តី​ជា​សន្តិសុខ​របស់​លោកស្រី​ត្រូវ​គេ​កាត់​ប្រាក់​ឈ្នួល​ពាក់កណ្តាល​។​

​ការ​ស្ទាបស្ទង់​របស់​សាកលវិទ្យាល័យ Azim Premji បាន​រកឃើញថា គ្រួសារ​ដូចជា​លោកស្រី​បាន​ប្រឈម​នឹង​ការបាត់បង់​ប្រាក់ចំណូល ដោយ​ត្រូវ​បន្ថយ​ការ​ទទួលទាន​អាហារ​លក់​ទ្រ​​ព្យ​សម្បត្តិ និង ខ្ចីប្រាក់​ក្រៅផ្លូវការ​ពី​មិត្តភក្តិ សាច់ញាតិ និង អ្នក​ចង​ការប្រាក់​។​

​លោកស្រី​ម៉ា​រី​ហ្គូ​វ​ដា​បាន​និយាយថា​បន្ទាប់ពី​នឹងធឹង​ក្នុង​ចិត្ត ៥ ឆ្នាំ “​កង្វល់​នៃ​ភាពក្រីក្រ​”​បាន​ត្រឡប់​មក​វិញ​។​កូនប្រុស​របស់​លោកស្រី​បាន​ឈប់​រៀន​នៅ​មហាវិទ្យាល័យ​ដើម្បី​ធ្វើការ​នៅ​ស្ថានីយ​​ប្រេងឥន្ធនៈ​ហើយ​ពួកគេ​បាន​លក់​ម៉ូតូ​បាត់​ហើយ​។ នៅពេល​ម្តាយ​របស់​គាត់​ផ្ទុកមេរោគ​កូវី​ដ​១៩​កាលពី​ខែ​មុន​លោក​ស្រី​ម៉ា​រី​ហ្គូ​វ​ដា​បាន​យក​ប្រាក់​កម្ចី​ដែល​មាន​ការប្រាក់​ខ្ពស់​ពី​អ្នក​ចងការ​​ប្រាក់​ដើម្បី​បង់ថ្លៃ​ព្យាបាល​របស់​ម្តាយ​៕

ក្មេងៗ​មក​ពី​គ្រួសារ​ក្រីក្រ​ទទួល​ជំនួយ​អាហារ​ពី​អង្គការ​មួយ​នៅ​ជាយក្រុង​ស៊ី​លី​ហ្គូរី កាលពី​ថ្ងៃទី​២៣​កក្កដា​២០២១​