ដោយៈ ទេពកង្រី / កំពង់ឆ្នាំង: នៅថ្ងៃទី៦ សីហា ២០២១ នេះ ខណ្ឌរដ្ឋបាលព្រៃឈើ នៃមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង បានដាក់ដាំជួសជុលឡើងវិញ នូវកូនឈើប្រភេទម៉ៃសាក់ ចំនួន ៥០០ ដើម នៅចំណុចជើងភ្នំថ្លុកត្របែក ស្ថិតក្នុងភូមិខ្វិត ឃុំពង្រ ស្រុករលាប្អៀរ ។
នាយខណ្ឌរដ្ឋបាលព្រៃឈើ នៃមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង លោក ថោង វិរ៉ាវុឌ្ឍី បានអោយដឹងថាៈ ថ្ងៃនេះ ខណ្ឌរដ្ឋបាលព្រៃឈើ នៃមន្ទីកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង បានធ្វើពិធីដាំកូនឈើ ដើម្បីអបអសារទ បុណ្យរុក្ខទិវា៩ កក្កដា ដែលយើងបានធ្វើជារៀងរាល់ឆ្នាំ តែឆ្នាំនេះ ដោយសារតែបញ្ហាកូវីដ១៩ ហើយឆ្នាំនេះ យើងមិនបានធ្វើធំទេ ដោយគ្រាន់តែរៀបចំដាក់ដាំដើមឈើ តាមធម្មតា ដើម្បីជាគោលបំណង រំលឹកពិធីនេះ។
នាយខណ្ឌរដ្ឋបាលព្រៃឈើកំពង់ឆ្នាំង បានបញ្ជាក់ថាៈ សារប្រយោជន៍ នៃការដាក់ដាំកូនឈើ ប្រភេទម៉ៃសាក់នេះ ឡើងវិញ ដើម្បីស្តារព្រៃឈើ គម្របបៃតងឡើងវិញ ព្រោះកន្លងមក តំបន់នេះ ចំការដីព្រៃឈើម៉ៃសាក់ ជារបស់រដ្ឋ មានចំនួន ១១ ហិកតា ហើយកន្លងមក ត្រូវបានជនមិនស្គាល់មុខ បានលបលួចចូល កាប់ដើមឈើធំៗ ហើយក្នុងគោលបំណង យកដីរបស់រដ្ឋ ធ្វើជាកម្មសិទ្ធិឯកជនទៅវិញ ។
លោក ថោង វីរ៉ាឌ្ឍី បានឱ្យដឹងថាៈ ឆ្នាំនេះ ខាងលោក នឹងដាក់ដាំជួស ចំនួន ៥០០ ដើម ហើយខាងលោក និងថែទាំរហូត ខណៈដែលរដូវនេះ ជារដូវវស្សា មានភ្លៀងផង តែបើងាប់ និងដាក់ដាំឡើងវិញថែមទៀត។
លោកបានឲ្យដឹងទៀតថាៈ ដោយមើលឃើញពីការរំលោភ យកបែបនេះ សមត្ថកិច្ចជំនាញរដ្ឋបាលព្រៃឈើ បានធ្វើការទប់ស្កាត់ បានទាន់ពេលវេលា ហើយនឹងបានដាក់ដាំ ដើមឈើឡើងវិញ ដើម្បីបង្កើតគម្របបៃតង និងសោភ័ណភាពទីនេះឡើងវិញ ហើយដើមម៉ៃសាក់នេះ វាជាប្រភេទលេខ១ល្អ និងមានសារសំខាន់សំណង់ និងសង្ហារឹម ដែលមានតម្លៃខ្ពស់ ។
នាយខណ្ឌរដ្ឋបាលព្រៃឈើរូបនេះ បានអំពាវនាវដល់ បងប្អូនប្រជាពលរដ្ឋ ដែលរស់នៅជុំវិញតំបន់នេះ និងតំបន់ ឆ្ងាយទៀត ដោយសូមកុំមករំលោភយក ឬកាប់រុករានទន្ទ្រាន បំផ្លាញយកធ្វើជាកម្មសិទ្ធិបន្តទៀត និងសូមជួយ ចូលរួម និងថែរក្សារទាំងអស់គ្នា ដើម្បីជាផលប្រយោជន៍ សម្រាប់បងប្អូនប្រជាពលរដ្ឋ ទៅថ្ងៃអនាគត ៕/V
