​ដោយៈ គង់​ហេង / កំពង់ចាមៈ លោក អ៊ុន ចាន់​ដា អភិបាលខេត្ត​កំពង់ចាម អមដំណើរ​ដោយ សហការី ជាច្រើនរូប បាន​ចុះទៅពិនិត្យ និង​សួរសុខទុក្ខ អំពី​ស្ថានភាព​រស់នៅ​របស់​មន្ត្រី នៃ​មន្ទីរ​ព័ត៌មាន​ខេត្ត​នេះ ចំនួន ១២ រូប កំពុង​ធ្វើ​ច​ត្តា​ឡី​ស័ក នៅក្នុង​អគារ ដាច់ដោយឡែក​មួយ នៅ​ព្រឹក​ថ្ងៃទី ៦ សីហា នេះ ។​

​លោក​អភិបាលខេត្ត​កំពង់ចាម បាន​មានប្រសាសន៍ ពី​ខាងក្រៅ​ខ្សែ​ហាមឃាត់ ទៅកាន់​មន្ត្រី​កំពុង​ធ្វើ​ច​ត្តា​ឡី​ស័ក ខាងក្នុង​ខ្សែ​ហាមឃាត់​ថាៈ សូម​មន្ត្រី​ម្នាក់ៗ ចាំបាច់​ត្រូវ​បង្កើន ការប្រុងប្រយ័ត្ន​ខ្ពស់ បន្ថែមទៀត គឺ​ការពារ​ខ្លួន ជាប្រចាំ ដើម្បី​រួមគ្នា​ទប់ស្កាត់ ការឆ្លង​រាលដាល ជំងឺ​កូ​វីដ ១៩ ពិសេស​ក្នុងដំណាក់កាល ធ្វើ​ច​ត្តា​ឡី​ស័ក​ចំនួន ១៤ ថ្ងៃនេះ ត្រូវអនុវត្ត​ឱ្យបាន​ត្រឹមត្រូវ តាម​វិធាន​របស់​សុខាភិបាល និង​វិធានការ «​បី​ការពារ បី​កុំ និង​ពីរ ចូលរួម​»​។​

​លោក​បាន​បន្តថាៈ លើសពីនេះ ដើម្បី​កាត់ផ្តាច់​ខ្សែចម្លង​មេរោគ​កូ​វីដ ១៩ បំប្លែង​ខ្លួន​ថ្មី ប្រភេទ ដែល​តា (DELTA) បាននិងកំពុង​ឆ្លង​រាតត្បាត គួរឱ្យ​បារម្ភ និង​ជា​បញ្ហា​ប្រឈម សម្រាប់​ប្រទេស​កម្ពុជា ទាំង​នៅក្នុង​គ្រួសារ និង​សហគមន៍​ទាំងមូល​។​

​នៅក្នុង​ដំណើរ​ចុះ​ពិនិត្យ និង​សួរសុខទុក្ខ​លោក អ៊ុន ចាន់​ដា បានប្រគល់​ជូន​ដល់ មន្ត្រី​កំពុង​ធ្វើ​ច​ត្តា​ឡី​ស័ក ចំនួន ១២ នាក់ មានៈ សម្រាប់​បុគ្គល​ម្នាក់ ទទួលបាន អង្ករ ២៥ គីឡូក្រាម និង​មី មួយ កេស​។ សម្រាប់​មន្ទីរ ទឹក​សុទ្ធ ១០ កេស​,​ជែ​ល​មួយ​កេស និង​ម៉ាស់ ១.០០០ ម៉ាស់​។​

​គួររំលឹកថា បច្ចុប្បន្ន ខេត្តកំពង់ចាម មាន​មន្ត្រីរាជការ ជា​បុគ្គលិក ថ្នាក់ដឹកនាំ​សរុប ចំនួន ៨១ នាក់ តាម​បណ្តា​មន្ទីរ ចំនួន បួន គឺ​មន្ទីរ​ផែនការ​, មន្ទីរ​ទេសចរណ៍​, មន្ទីរ​ពាណិជ្ជកម្ម និង​មន្ទីរ​ព័ត៌មាន ត្រូវ​បានដាក់​ឱ្យធ្វើ ច​ត្តា​ឡី​ស័ក នៅតាម​មន្ទីរ​រៀងៗ បន្ទាប់ពី​ពួកគាត់ បាន​ប៉ះពាល់​ដោយផ្ទាល់ និង​ដោយ​ប្រយោល ជាមួយ​អ្នក​វិជ្ជមាន​កូ​វីដ ១៩ ៕/V​