ដោយៈ សរិទ្ធ / កណ្តាលៈ លោក ឡៅ អ៊ូ អាយុ៣៥ឆ្នាំ ជាម្ចាស់ហាង «គោលដៅចាស់» ស្ថិតនៅសង្កាត់តាខ្មៅ ក្រុងតាខ្មៅ ខេត្តកណ្តាល នៅថ្ងៃទី៦ ខែសីហា ឆ្នាំ២០២១ នេះ ត្រូវសមត្ថកិច្ចបញ្ជូន មកតុលាការ ដើម្បីចាត់ការ តាមផ្លូវច្បាប់ ពាក់ព័ន្ធការព្រហើន ហ៊ានបើកហាងផឹកស៊ី ក្នុងបរិបទនៃ ការរីករាលដាល ជំងឺកូវីដ១៩ ជាពិសេស គឺបានប្រឆាំងនឹងបទបញ្ជារបស់ រាជរដ្ឋាភិបាល តែម្ដង ។
លោកឧត្តមសេនីយ៍ទោ ឈឿន សុចិត្ត ស្នងការនគរបាល ខេត្តកណ្តាល បានថ្លែងថាៈ ម្ចាស់ហាង ត្រូវបញ្ជូន ទៅតុលាការ ខណៈមនុស្ស ១៣ នាក់ផ្សេងទៀត ត្រូវពិន័យតាមច្បាប់កូវីដ ។ ចំណែកហាង នឹងត្រូវដកអាជ្ញាប័ណ្ណ ចោលតែម្ដង ។
គួររំលឹកថា ហាង «គោលដៅចាស់» ត្រូវបានចុះបង្ក្រាប កាលពីព្រលប់ ថ្ងៃទី៤ ខែសីហា ឆ្នាំ២០២១ ពាក់ព័ន្ធការព្រហើន ហ៊ានបើកហាងផឹកស៊ី ក្នុងបរិបទ នៃការរីករាលដាល ជំងឺកូវីដ១៩ ពិសេស គឺប្រឆាំងនឹងបទបញ្ជា របស់រាជរដ្ឋាភិបាល តែម្តង ។
ការចុះបង្ក្រាបទ្រង់ទ្រាយធំនេះ គឺបន្ទាប់ពីមានបទបញ្ជា ដ៏ម៉ឺងម៉ាត់ពី លោកឧត្តមសេនីយ៍ទោ ឈឿន សុចិត្ត ស្នងការនគរបាល ខេត្តកណ្តាល និង ចូលរួមបង្ក្រាបផ្ទាល់ ពីលោកវរសេនីយ៍ឯក ឡាក់ ម៉េងធី នាយការិយាល័យ ព្រហ្មទណ្ឌកម្រិតស្រាល ព្រមទាំងលោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ ។
រដ្ឋបាលខេត្តកណ្តាល បានដាក់ចេញនូវវិធានការរដ្ឋបាល សម្រាប់រយៈពេល ១៤ ថ្ងៃ គិតចាប់ពីម៉ោង ២៣:៥៩ នាទី នាថ្ងៃទី២៩ ខែកក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១ ដើម្បីប្រយុទ្ធ និងទប់ស្កាត់ ការឆ្លងរាលដាល នៃជំងឺកូវីដ១៩ នៅក្នុងភូមិសាស្ត្រ ខេត្តកណ្តាល ។
នេះបើយោងតាមសេចក្ដីសម្រេចរបស់ លោក គង់ សោភ័ណ្ឌ អភិបាលខេត្តកណ្តាល កាលពីថ្ងៃទី២៩ ខែកក្កដា ឆ្នាំ២០២១ ថ្មីៗនេះ ៕/V