ដោយៈ ប.ជ័យ / បន្ទាយមានជ័យៈ នាថ្ងៃត្រង់ ថ្ងៃទី៦ ខែសីហា ឆ្នាំ២០២១ អនុគណៈកម្មការបូជាសព នៃគណៈកម្មការ ប្រយុទ្ធនឹងកូវីដ១៩ ខេត្តបន្ទាយមានជ័យ បានជូនដំណើរសពទី១០០ នៃអ្នកជំងឺកូវីដ ១៩ នៅខេត្តបន្ទាយមានជ័យ ក្នុងនោះ មានជនជាតិខ្មែរម្នាក់ ជនជាតិថៃម្នាក់។
នេះបើតាមអ្នកស្រី ឱក សុភា សមាជិកអនុគណៈកម្មការបូជាសព នៃគណៈកម្មការប្រយុទ្ធនឹងជំងឺកូវីដ ១៩ ខេត្តបន្ទាយមានជ័យ បានអោយដឹង នៅថ្ងៃទី៦ ខែសីហា ឆ្នាំ២០២១ គឺនៅថ្ងៃត្រង់នេះ បានបូជាសព ២ នាក់ ក្នុងនោះ មានសពជនជាតិខ្មែរម្នាក់ ជនជាតិថៃម្នាក់ ។ ក្នុងសព ១០០ នាក់ មានស្រី ៥៤ នាក់ ។
អ្នកស្រី បានបន្តថាៈ អំពីសព គឺមានចម្រុះសមាសភាព ភេទ អាយុ និង វ័យ មុខរបរ អាជីព ។ ក្នុងនោះ មានទាំងអ្នកជំងឺកូវីដ ១៩ នៃព្រឹត្តិការណ៍សហគមន៍ និងមកពីក្រៅប្រទេស។ ហើយមានទាំងអ្នកមិនទាន់ ចាក់វ៉ាក់សាំង ទាំងអ្នកបានចាក់វ៉ាក់សាំង តែសុខភាពទ្រុឌទ្រោម ឬ មានជំងឺប្រចាំកាយ។ មានទាំងអ្នកជំងឺ ដែលនៅមណ្ឌលព្យាបាល , មន្ទីរពេទ្យ និងអ្នករស់នៅតាមផ្ទះ និងក៏មានទាំងអ្នក ដែលមិនដឹងថា បានឆ្លងកូវីដ ១៩ ពីអ្នកណា ពីពេលណា ប៉ុន្តែដល់ពេលស្លាប់ គ្រូពេទ្យជួរមុខ យកសំណាក ទើបដឹងថា វិជ្ជមានកូវីដ១៩ ដែរ ។
លោក អោម ចន្ថា អភិបាលរងខេត្តបន្ទាយមានជ័យ និងជាប្រធានអនុគណៈកម្មការបូជាសព បានអោយដឹងដែរ ថាៈ មកទល់ពេលនេះ នៅទីកន្លែងជូនដំណើរ ចុងក្រោយសព អ្នកជំងឺកូវីដ ១៩ ខេត្តបន្ទាយមានជ័យ នាភ្នំបាក់ ភូមិភ្នំបាក់ សង្កាត់ទឹកថ្លា ក្រុងសិរីសោភ័ណ បាននឹងកំពុងបន្តកែលម្អសោភ័ណភាព និងអភិវឌ្ឍន៍ ដូចជា ផ្លូវ ភ្លើង ភ្លើងបំភ្លឺ ទឹក ទីលានចំណតយានក្រុមការងារ ចំណតយានយន្តគ្រួសារសព ផ្លូវគ្រសារសព រោងតម្កល់ព្រះពុទ្ធរូប និងកន្លែងបង្សុកូល ឧទ្ទិស ឈាបនដ្ឋាន (ប៉ាឆា) ទីបញ្ចុះ ស្តូប និងបុស្បុកព្រះអង្គគោកធ្លក និងបញ្ជរ តាំងរាយឈ្មោះ និងរូបថតសព និងទីទុកធ្វើពិធីឧទ្ទិស រំលឹកជូនដួងវិញ្ញាណក្ខន្ធសពជាដើម ៕/V