អាជីព​២០​ឆ្នាំ​របស់​ម៉េស​ស៊ីនៅ Barcelona ចប់​ជា​ផ្លូវការ

ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ កីឡាករ លី​អូ​នែ​ល ម៉េស​ស៊ី នឹង​បញ្ចប់​អាជីព​រយៈពេល ២០ ឆ្នាំ​របស់​គាត់​ជាមួយ​ក្រុម​អ្នក​មាន​បុណ្យ Barcelona​បន្ទាប់​ពី​កំពូល​តារា​បាល់​​ទាត់​អា​ហ្សង់​ទី​ន​រូប​នេះ​និង​ក្រុម​យក្ស​អេ​ស្ប៉ាញ​នេះ​មិន​អាច​ជម្នះ​លើ “​ឧបសគ្គ​ផ្នែក​សេដ្ឋកិច្ច​និង​រចនាសម្ព័ន្ធ​” ដើម្បី​មាន​កិច្ចព្រមព្រៀង​ថ្មី​។ ​នេះ​ជា​ដំណឹង​ដ៏​កក្រើក​មួយ​ដែល​ច្បាស់​ជា​បង្ក​ឱ្យ​មាន​ការ​ប្រជែង​គ្នា​ដណ្តើម​យក​ម៉េស​ស៊ី ដែល​គេ​ចាត់ទុកថា​ជា​កីឡាករ​អស្ចារ្យ​បំផុត​មួយ​រូប​នៅលើ​ពិភពលោក​។​

​សេចក្តី​ថ្លែងការណ៍​ពី​ក្លិប​បាន​និយាយថា “​ទោះបីជា​កិច្ចព្រមព្រៀង​ត្រូវ​បាន​សម្រេច​រវាង FC Barcelona​និង លី​អូ ម៉េស​ស៊ី ក៏ដោយ ក៏​វា​មិន​អាច​សម្រេច​ជា​ផ្លូវការ​បាន​នោះឡើយ​ដោយសារ​​តែ​ឧបសគ្គ​ខាង​សេដ្ឋកិច្ច​និង​រចនាសម្ព័ន្ធ​”​។​

“​ប្រឈម​មុខ​នឹង​ស្ថានភាព​បែបនេះ លី​អូ​នែ​ល ម៉េស​ស៊ី នឹង​មិន​ស្នាក់នៅ Barcelona ទេ​។​ភាគី​ទាំងពីរ​មាន​ការសោកស្តាយ​យ៉ាងខ្លាំង​ដែល​បំណងប្រាថ្នា​របស់​កីឡាករ​និង​ក្លឹប​មិនអាច​​ក្លាយជា​ការពិត​”​។​

“​ក្លិប FC Barcelona សូម​ថ្លែងអំណរគុណ​យ៉ាង​ជ្រាលជ្រៅ​ដល់​កីឡាករ​រូប​នេះ​ចំពោះ​ការរួមចំណែក​របស់​គាត់​ចំពោះ​ការ​ធ្វើ​ឱ្យ​ក្លិប​កាន់​មាន​កិត្យានុភាព​ខ្លាំង​ឡើង​ហើយ​សូម​ជូនពរ​ឱ្យ​​គាត់​ជួបតែ​រឿង​ល្អ​បំផុត​សម្រាប់​អនាគត​ក្នុង​ជីវិត​ផ្ទាល់ខ្លួន​និង​អាជីព​របស់​គាត់​”​។​

​ម៉េស​ស៊ី​អាយុ​៣៤​ឆ្នាំ​ដែល​ជា​ម្ចាស់​ពានរង្វាន់ Ballon d’Or ប្រាំមួយ​សម័យ ទីបំផុត​បាន​ឈ្នះ​ពានរង្វាន់​អន្តរជាតិ​ធំ​មួយ​ជាមួយ​អា​ហ្សង់​ទីនកា​លពី​ខែ​មុន នៅ​ពេល​ពួកគេ​ផ្តួល​ប្រេ​ស៊ីល​ដើម្បី​លើក​ពានរង្វាន់ Copa America ៕

​ម៉េស​ស៊ីនឹង​មិន​បន្ត​ស្នាក់នៅ Barcelona ទៀត​នោះ​ទេ