ប្រែ​សម្រួល : កញ្ញា​ដា​លី​ស (​ដេលី​មែ​ល​)៖​ស្ត្រី​ជនជាតិ​ស្វីស​ម្នាក់​ត្រូវគេ​រំលោភ​សម្លាប់​នៅ​ប្រទេស​ថៃ​បន្ទាប់ពី​ធ្វើដំណើរ​ទៅ​ប្រទេស​នេះ​តែម្នាក់ឯង​ក្រោម​គម្រោង​ទេសចរណ៍​ថ្មី​ក្រោយ​ជំនាន់​​បិទ​ខ្ទប់​នៅ​កោះ​ភូ​កេត​។

​ស្ត្រី​វ័យ ៥៧ ឆ្នាំ​រូប​នេះ​ត្រូវបាន​គេ​ប្រទះ​ឃើញ​ដេក​ផ្កាប់​មុខ​នៅ​ក្នុង​ថ្លុក​ទឹក​លើ​ផ្ទាំង​ថ្ម​នៅ​ខាងក្រោម​ទឹកធ្លាក់​មួយ ដោយ​មាន​ក្រណាត់​ខ្មៅ​គ្រប​ពីលើ​សព​កាលពី​រសៀល​ថ្ងៃ​ព្រហស្បតិ៍​ទី​៥​សីហា​។​

​ខោ​ខូវប៊យ​ខ្លី ខោ​ទ្រនាប់ ស្បែកជើង​មួយគូ និង​ទូរស័ព្ទ​មួយគ្រឿង ត្រូវបាន​រកឃើញ​នៅ​មិន​ឆ្ងាយ​ពី​សាកសព​របស់​ស្ត្រី​នេះ​នៅ​កន្លែង​អភិរក្ស​ធម្មជាតិ​ក្នុង​តំបន់​វី​ចិត​នៃ​កោះ​ភូ​កេត​។​

​សមត្ថកិច្ច​បាន​និយាយថា ជនរងគ្រោះ ដែល​មិន​បញ្ចេញ​ឈ្មោះ​នេះ បាន​ស្លាប់​ប្រហែល​បី​ថ្ងៃ​មកហើយ​។​

​ប្រព័ន្ធ​ផ្សព្វផ្សាយ​ក្នុងស្រុក​បាន​រាយការណ៍​ថា ស្ត្រី​នេះ​ត្រូវ​គេ​រំលោភ​សម្លាប់​។​

​មន្ត្រី​អន្តោប្រវេសន៍​បានបញ្ជាក់​ថា ស្ត្រី​ជនជាតិ​ស្វីស​រូបនេះ​បាន​មក​ដល់អាកាស​យានដ្ឋាន​ភូ​កេត​ពី​ប្រទេ​សសិង្ហបុរី​នៅ​ថ្ងៃទី ១៣ ខែកក្កដា​ក្រោម​គម្រោង​ប្រអប់​ខ្សាច់​ភូ​កេ​តដែល​បាន​​ចាប់ផ្តើម​កាលពី​ខែ​មុន​។​

​គម្រោង​បើក​ទេសចរណ៍​ឡើងវិញ​នេះ​អនុញ្ញាត​ឱ្យ​ជនបរទេស​ដែល​ចាក់​វ៉ាក់សាំង​រួច ធ្វើដំណើរ​មក​ភូ​កេត​ដោយ​មិន​ចាំបាច់​ធ្វើ​ចត្តា​ឡីស័​កដូច​នៅ​តំបន់​ផ្សេងទៀ​ត​នៃ​ប្រទេស​។​

​បន្ទាប់​ពី​ស្នាក់នៅ​ភូ​កេត​បាន ១៤ ថ្ងៃ ជន​បរទេស​ត្រូវបាន​អនុញ្ញាតឱ្យ​ធ្វើ​ដំណើរ​ឆ្ងាយ​ថែមទៀត​នៅក្នុង​ប្រទេស​ថៃ​។​

​យោង​តាម​កាសែត​បាងកក​ប៉ុស្តិ៍ ស្ត្រី​រូប​នេះ​បាន​ស្នាក់នៅ​សណ្ឋាគារ Dusit Thani Laguna ចាប់ពី​ថ្ងៃទី ១៣ ដល់​ថ្ងៃទី ២៧ ខែកក្កដា​មុនពេល​រើ​ទៅ​ស្នាក់​នៅ​សណ្ឋាគារ The Mooring Resort Hotel ស្ថិតនៅ​ចម្ងាយ​ប្រហែល ២៤ គីឡូម៉ែត្រ​នៅ​ភាគខាងត្បូង ។​

​សាក្សី​ម្នាក់​បាន​ប្រាប់​ប៉ូលិស​ថា​គាត់​បានឃើញ​ស្ត្រី​នេះ​ចាក​ចេញពី​សណ្ឋាគា​រហើយ​ដើរ​ឆ្ពោះទៅ​ឆ្នេរ​នៅ​ម៉ោង​ប្រហែល ២ រសៀល​ថ្ងៃ​អង្គារ​។​

​អ្នក​ភូមិ​ក្នុង​តំបន់​ម្នាក់​បាន​ជូនដំណឹង​ដល់​ប៉ូលិស​បន្ទាប់ពី​ឃើញ​សព​ស្ត្រី​នោះ​នៅ​ម៉ោង​ប្រហែល ១ និង ៣០ នាទី​រសៀល​ថ្ងៃ​ព្រហស្បតិ៍​។​

​ស្ត្រី​រូប​នេះ​ធ្លាប់​មក​លេង​ភូ​កេត​ក្នុង​ឆ្នាំ ២០១៩ ។​

​សាកសព​របស់គាត់​ត្រូវបាន​បញ្ជូន​ទៅ​ធ្វើ​កោសល្យវិច័យ​នៅ​មន្ទីរពេទ្យវិ​ជ្ជ​រ៉ាភូ​កេត​៕

​អ្នក​ស៊ើបអង្កេត​និង​ប៉ូលិស​កំពុង​ពិនិត្យ​កន្លែងកើតហេតុ ។​ក្រោយ​ការស្លាប់​របស់​នាង មន្ត្រី​ថៃ​បង្កើន​សន្តិសុខ​នៅ​កោះ​កម្សាន្ត​ភូ​កេត​