​ដោយៈ​ទេ​ពក​ង្រី​/​កំពង់ឆ្នាំងៈ នៅ​ថ្ងៃទី​៥ សីហា ២០២១​ម្សិលមិញ យុទ្ធភណ្ឌ​មិនទាន់​ផ្ទុះ ដែល​សល់​ពី​សម័យ​សង្គ្រាម​ចំនួន ១៦ គ្រាប់​ត្រូវបាន​កម្លាំង​នគរបាល​ស្រុក សហការ​ជាមួយ​កម្លាំង​ស៊ីម៉ាក់ (CMAC) បានធ្វើការ​ប្រមូលយក​ចេញ ក្រោយពី​ប្រជាពលរដ្ឋ​ប្រទះឃើញ និង​បាន​រាយការណ៍​ជូន​សមត្ថកិច្ច និង​អាជ្ញាធរ​មូលដ្ឋាន​នៅក្នុង​ស្រុក​២​នៃ​ខេត្តកំពង់ឆ្នាំង គឺ​ស្រុក​ទឹកផុស និង​ស្រុក​កំពង់ត្រឡាច​។​

​តាម​សេចក្តីរាយការណ៍​សមត្ថ​កិច្ច​នគរបាល​បានឱ្យដឹងថា​នៅ​ស្រុក​ទឹកផុស មាន​ចំនួន​០៩​គ្រាប់​រួមមាន​៖ គ្រាប់​ប៊ុ​ម​ប៊ី ចំនួន​០១​គ្រាន់​, គ្រាប់​ត្បាល់​៨២​មី​លី​ម៉ែត្រ​ចំនួន​០២​គ្រាប់​, B៤០ ចំនួន​០២​គ្រាប់​, គ្រាប់បែកដៃ ចំនួន​០១​គ្រាប់​, គ្រាប់​៦០​មី​លី​ម៉ែត្រ ចំនួន​០៣​គ្រាប់​។ ដោយឡែក​នៅ​ស្រុក​កំពង់ត្រឡាច មាន គ្រាប់​ប៊ុ​ម​បី ទាំងអស់​ចំនួន​០៧​គ្រាប់ ។​

​សូមបញ្ជាក់​ផងដែរ​ថា​កន្លងទៅ​មាន​យុទ្ធភណ្ឌ​ដែល​មិនទាន់​ផ្ទុះ​គ្រប់​ប្រភេទ​ដែល​នៅ​រាយប៉ាយ​កប់​ក្នុង​ដី​នៅតាម​ស្រុក មានស្រុក​កំពង់លែង​, ស្រុក​ជល់​គី​រី​, ស្រុក​បរិបូ​ណ៍​, ស្រុក​កំពង់ត្រឡាច និង​ស្រុក​ទឹកផុស​ខេត្តកំពង់ឆ្នាំង ត្រូវបាន​សមត្ថកិច្ច​សហកា​រ​ជាមួយ​អង្គភាព​ស៊ីម៉ាក់ (CMAC) ធ្វើការ​ប្រមូលយក​ទៅធ្វើ​ការ​បន្សាប ឬ​កម្ទេចចោល ។​

​កន្លងមក​សមត្ថកិច្ច​និង​អាជ្ញាធ​មូលដ្ឋាន​នៅក្នុង​ខេត្តកំពង់ឆ្នាំង​តែងតែ​ធ្វើការ​អំពាវនាវ​ដល់​ប​ង​ប្អូន​ប្រជាពលរដ្ឋ​ដែល​ប្រទះ​យុទ្ធភណ្ឌ​គ្រាប់​ចាស់​ដែល​កប់​ក្នុង​ដី​ដែល​មិនទាន់​ផ្ទុះ​សូមកុំ​ប៉ះពាល់​អោយសោះ​ហើយ​ត្រូវរាយការណ៍ជូន​សមត្ថ​កិច្ច​ឬ​អាជ្ញាធ​មូលដ្ឋាន​ទំនាក់ទំនង​ទៅខាង​មន្ត្រី CMAC ដើម្បី​ចុះមក​ប្រមូល​យកទៅ​រក្សាទុក​នៅ​កន្លែង ឬ​ធ្វើ​បន្សាប និង​ដុត​ក​ន្ទេ​ច​ចោល​ផងដែរ​៕​