ដោយៈ​ប​.​ខុន​/​ភ្នំពេញៈ​កម្លាំង​ស្រូប​របស់​ព្យុះ​ដែល​កើតមាន​ចំនួន​បី​បន្ត​គ្នា ធ្វើឱ្យ​ស្ថានភាព ទឹកភ្លៀង​ធ្លាក់​ក្នុងប្រទេស​កម្ពុ​ជាមាន​ត្រឹម​កម្រិត​ពី​តិច​ទៅ​បង្គួរ តែ​ភ្លៀង​ធ្លាក់​ចាប់ ផ្តើម​ល្អ​មកវិញ​ចាប់ពី​ថ្ងៃទី​៨​ខែសីហា​បន្ទាប់​ព្យុះ​ដើរទៅ​ផុត​។​

​លោក ចាន់ យុ​ត្ថា អ្នកនាំពាក្យ​និង​ជា​រដ្ឋលេខាធិការ​ក្រសួង​ធនធានទឹក​និង ឧតុនិយម​បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​៦​ខែសីហា​ឆ្នាំ​២០២១​ថា​ស្ថានភាព ភ្លៀង​ធ្លាក់​នៅក្នុង​ប្រទេស​កម្ពុជា ក្នុងអំឡុងពេល​ព្យុះ​ចំនួន​បី​បាន​កើន​បន្ត​គ្នា​ដោ យ​មានដំណើរ​ស្របគ្នា ធ្វើឱ្យ​ស្ថានភាព​ភ្លៀង​ធ្លាក់​នៅក្នុង​ប្រទេស​កម្ពុជា​មាន កម្រិត ត្រឹម​ពី​តិច​ទៅ​បង្គួរ​លើ​ខេត្ត​មួយចំនួន​តែ​វា​នឹង​ធ្លាក់​រាយប៉ាយ​ល្អ​មកវិញ​នៅពេល ព្យុះ លែងមាន​កម្លាំង​ស្រូប​។​

​អ្នកនាំពាក្យ​ក្រសួង​ជំនាញ​ខាងលើ​បញ្ជាក់ថា ព្យុះ​ដែលមាន​កម្លាំង​ស្រូប​ខ្លាំង គឺ​ព្យុះ​ទី​៩​លូ​ពី​ត​ដែល​វា​នឹង​ដើរកាត់​លើ​កោះ​តៃវ៉ាន់​នៅ​ថ្ងៃ​សៅរ៍​ស្អែក​នេះ​រួច​បន្ត ទៅរក​ប្រទេស​ជប៉ុន ។ នៅ​ថ្ងៃអាទិត្យ​ទី​៨​ខែសីហា​ខ្យល់មូសុង​និរតី​បក់​មក​ល្អ​វិញ ជាមួយ​ទឹកភ្លៀង​ធ្លាក់​រាយប៉ាយ​ទាំង​នៅ​តំបន់​ក្រោយ​ជួរ​ភ្នំក្រវាញ​ផងដែរ​។​

​របាយ​ទឹកភ្លៀង​ដែល​បាន​ធ្លាក់​រយៈពេល​២៤​ម៉ោង​ត្រឹម​ព្រឹក​ថ្ងៃ​ទ​៦​ខែសីហា នៅ​ខេត្តកំពង់ចាម​មាន​ដល់​កម្រិត​៤១​មី​លី​ម៉ែត្រ​, កែប​១៤​មី​លី​ម៉ែត្រ​, ព្រៃវែង​៦​មី លី​ម៉ែត្រ​,​កំពត ៤២​មី​លី​ម៉ែត្រ​,​បន្ទាយមានជ័យ​៥២​មី​លី​ម៉ែត្រ​,១៧​មី​លី​ម៉ែត្រ , ពោធិសាត់​៦​មី​លី​ម៉ែត្រ​,​មណ្ឌលគិរី​៤១​មី​លី​ម៉ែត្រ​,​សៀមរាប​៧​មី​លី​ម៉ែត្រ​,​ស្ទឹងត្រែង ៣០​មី​លី​ម៉ែត្រ​, ឧ​ត្ត​រ​មានជ័យ​៥​មី​លី​ម៉ែត្រ​,​បាត់ដំបង​៨​មី​លី​ម៉ែត្រ​,​កំពង់ធំ​៧​មី​លី​ម៉ែត្រ​,​រតនគិរី​២១​មី​លី​ម៉ែត្រ​,​ព្រះវិហារ​៣​មី​លី​ម៉ែត្រ​,​កោះកុង​៤៣​មី​លី​ម៉ែត្រ​,​កំពង់​ឆ្នាំ​៣១​មី​លី​ម៉ែត្រ​,​ព្រះសីហនុ​៤១​មី​លី​ម៉ែត្រ​និង​ខេត្តក្រចេះ​១៨​មី​លី​ម៉ែត្រ​។​

​ក្រសួង​ធនធានទឹក​និង​ឧតុនិយម កាលពី​ថ្ងៃទី​៣​ខែសីហា​ឆ្នាំ​២០២១ បាន ជូ ន ដំណឹង ស្តីពី​ស្ថានភាព​អាកាសធាតុ​សម្រាប់​ពីថ្ងៃ​ទី​៤​ដល់​ថ្ងៃទី​១០​ខែ​សី ហា​ថា ព្រះរាជាណាចក្រ​កម្ពុជា ទទួល​ឥទ្ធិពល​ខ្សោយ​ពី​ជ្រលង​នៃ​ប្រព័ន្ធ សម្ពាធ ទាប ITCZ​ដែល​បានអូសបន្លាយ​លើ​ភាគ​ខាងជើង​ប្រទេស​មី​យ៉ាន់​ម៉ា ប្រទេស​ឡាវ​និង ប្រទេស​វៀតណាម និង​ខ្យល់មូសុង​និរតី​បក់​ក្នុង ល្បឿន​ពី​មធ្យម​ទៅ​បង្គួរ ។​

​សេចក្តីជូនដំណឹង​បាន​សរសេរ​ទៀតថា​ស្ថានភាព​បែប​ខាងលើ​ធ្វើ​ឲ្យ​បណ្តា ខេត្ត​នៅ​តំបន់​វាលទំនាប​កណ្តាល​មាន​សីតុណ្ហភាព​អប្បបរមា ពី​២៤​ទៅ​២៦​អង្សា សេ សីតុណ្ហភាព​អតិបរមា​មាន​ពី​៣២​ទៅ​៣៤​អង្សា​សេ ។​ខេត្ត​នៅ​ភាគ ពាយ័ព្យ​និង ភាគខាងត្បូង អាចមាន​ភ្លៀង​ក្នុង​កម្រិត​ពី​ខ្សោយ​ទៅ​មធ្យម និង បណ្តា​ខេត្ត​ដទៃ ទៀត​អាចមាន​ភ្លៀង​ក្នុង​កម្រិត​ពី​តិច​ទៅ​បង្គួរ​លាយឡំ​ទៅដោយ ផ្គរ រន្ទះ​និង​ខ្យល់ កន្ត្រាក់ ។​
​សម្រាប់​ខេត្ត​ជាប់​ជួរ​ភ្នំ​ដងរែក​និង​ខ្ពង់រាប​ឦសាន មាន​សីតុណ្ហភាព​អប្បបរ មា​ពី​២៣​ទៅ​២៥​អង្សា​សេ សីតុណ្ហភាព​អតិបរមា មាន​ពី​៣០​ទៅ​៣២​អង្សា​សេ​។ អាចមាន​ភ្លៀង​ធ្លាក់​ក្នុង​កម្រិត​ពី​តិច​ទៅ​បង្គួរ លាយឡំ ទៅដោយ​ផ្គរ រន្ទះ​និង​ខ្យ ល់ កន្ត្រាក់ ។

​នៅ​តំបន់​មាត់សមុទ្រ​មាន​សីតុណ្ហភាព​អប្បបរមា​ពី​២៣​ទៅ​២៥​អង្សា​សេ សី តុ ណ្ហ​ភាព​អតិបរមា មាន​ពី​៣០​ទៅ​៣២​អង្សា​សេ​។​អាចមាន​ភ្លៀង​ធ្លាក់​ក្នុង កម្រិត ពី មធ្យម​ទៅ​បង្គួរ ។ នៅលើ​ផ្ទៃសមុទ្រ​អាចមាន​ភ្លៀង លាយឡំ ខ្យល់​បក់​ខ្លាំង និង រលក​សមុទ្រ​ខ្ពស់ ។​

​អាស្រ័យ​ស្ថានភាព​ធាតុអាកាស​ដូច​បាន​ជម្រាបជូន​ខាងលើ ក្រសួង​ធន ធា ន​ទឹក​និង​ឧតុនិយម​បាន​អំពាវនាវ​ដល់​សាធារណជន​មានការ​ប្រុងប្រយ័ត្ន ចំពោះ បាតុភូត​ធាតុអាកាស​នានា​ដែល​អាច​បង្ក​គ្រោះថ្នាក់​ជាយថាហេតុ ៕​