​ដោយៈ សុ​ផានី​តា / កោះកុង​៖ បុរស​អ្នកបើកបរ​ម្នាក់ ស្ទើរ​ផុត​ជីវិត​ទៅហើយ កុំ​តែ​បាន​សមត្ថកិច្ច មកដល់​ទាន់ ពេលវេលា ករណី​អ្នកបើកបរ​ម្នាក់​នោះ ត្រូវ​គៀប​ជាប់ ក្នុង​រថយន្ត​របស់ខ្លួន ក្នុង​ហេតុការណ៍​ដ៏​រន្ធត់​មួយ ត្រង់ចំណុច​អន្ទង់អាំង​ធំ ស្ថិតក្នុង​ភូមិ​ជី​មាល ឃុំ​អណ្តូងទឹក ស្រុក​បុ​ទុម​សាគរ ខេត្តកោះកុង នៅ​រសៀល​ថ្ងៃទី​៦ សីហា ២០២១ នេះ​។​

​សមត្ថកិច្ច​ស្រុក​បុ​ទុម​សាគរ បាន​ញាប់ដៃ​ញាប់ជើង ដឹក​អ្នករងគ្រោះ ទៅ​មណ្ឌល​ព្យាបាល​ជាបន្ទាន់​។ សមត្ថកិច្ច ស្រុក​បុ​ទុម​សាគរ បាន​អះអាងថា ក្រោយពី​សង្គ្រោះ​ហេតុការណ៍ គ្រោះថ្នាក់​ចរាចរ​នេះ ឃើញថា មាន​មនុស្ស ទាំងពីរ​នាក់ បាន​ឆ្លង​ផុត ពី​គ្រោះថ្នាក់ ដល់​អាយុជីវិត ខណៈ​ម្នាក់​រងរបួស យ៉ាងធ្ងន់ធ្ងរ​និង ម្នាក់ទៀត​របួសស្រាល​។​

​សមត្ថកិច្ច​ស្រុក​បុ​ទុម​សាគរ បញ្ជាក់​បន្ថែមថាៈ ករណីនេះ បង្ករ​ឡើង​ដោយ​ខ្លួនឯង ពេល​រថយន្ត​នេះ ចុះ​ចំណោត ហើយ​ដាច់​ហ្វ្រាំង ក្រឡាប់​លើ​ថ្នល់​តែម្តង បណ្តាល​មនុស្ស​ចំនួន ២ នាក់ ម្នាក់​ជា​អ្នកបើកបរ ជា​ជនជាតិខ្មែរ ឈ្មោះ ផុន ភក្ត្រា អាយុ​២៩ ឆ្នាំ ជា​អ្នកស្រុក​ឃុំ​កោះ​រការ ស្រុក​កំពង់សៀម ខេត្តកំពង់ចាម និង​ព្រូឡាន​ម្នាក់ទៀត ឈ្មោះ នេ​ត សាវ៉ន់ អាយុ​១៩​ឆ្នាំ មកពី​ស្រុក​សំពៅ​មាស ខេត្តពោធិសាត់​។​

​ប្រភព​ដដែល បានបញ្ជាក់​ទៀតថាៈ រថយន្ត​មួយគ្រឿង​នេះ ម៉ាក HINO ពណ៌​ខៀវ ពាក់​ស្លាក​លេខ ភ្នំពេញ 3D 2711 ដឹក​ស្រា​បៀរ ពី​ភ្នំពេញ មក​ខេត្តកោះកុង ។

​បច្ចុប្បន្ន ជនរងគ្រោះ សមត្ថកិច្ច បាន​បញ្ជូនទៅ​សម្រាក​ព្យាបាល នៅ​មណ្ឌល​សុខភាព​អណ្តូងទឹក និង​រថយន្ត រង​ការខូចខាត​ធ្ងន់ធ្ងរ នៅនឹងកន្លែង​៕/V​