​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ការសិក្សា​ស្រាវជ្រាវ​មួយ​ដោយ​មជ្ឈមណ្ឌល​គ្រប់គ្រង​និង​បង្ការ​ជំងឺ​អាម៉េរិក (CDC)​បាន​និយាយ​កាលពី​ថ្ងៃ​សុក្រ​ទី ៦ ខែសីហា​ថា​មនុស្ស​ដែល​មិនបាន​​ចាក់​វ៉ាក់សាំង​គឺ​ទំនងជា​អាច​ឆ្លងកូវី​ដ​១៩ ឡើងវិញ​ទ្វេដង​ធៀប​នឹង​អ្នក​ចាក់​វ៉ាក់សាំង​ពេញលេញ​។​

​ទីភ្នាក់ងារ​អាម៉េរិក​មួ​យ​នេះ​បាន​និយាយថា ការរកឃើញ​នេះ​គឺ​គាំទ្រ​អនុសាសន៍​របស់​ខ្លួន​ដែលថា “​អ្នក​ដែល​មាន​សិទ្ធិ​ទាំងអស់​ត្រូវតែ​ទទួល​វ៉ាក់សាំង​ការពារ​ជំងឺ​កូវី​ដ​១៩​ដោយ​មិន​គិត​ពី​ស្ថាន​​ភាព​នៃ​ការឆ្លង​មេរោគ Sars-CoV-2 កាលពីមុន​”​។​

​អ្នកនយោបាយ​អាម៉េរិក​មួយ​ចំនួន​រួម​ទាំង​ព្រឹទ្ធ​សមាជិក រ៉ា​ន់ ផូល កាលពី​មុន​បាន​និយាយថា ពួកគេ​មិន​មាន​គម្រោង​ចាក់​វ៉ាក់សាំង​ការពារកូ​វីដ​១៩​ទេ​ដោយសារតែ​ភាពស៊ាំ​ពី​ធម្មជាតិ​របស់​​ពួកគេ​បាន​មក​ពី​ការឆ្លង​មេរោគ​កូរ៉ូ​ណា​ពី​មុន​។​

​ការសិក្សា​ថ្មី​នេះ​គឺ​ផ្អែក​លើ​មនុស្ស​ពេញវ័យ​នៅ​រដ្ឋ​កេន​ថា​ក់គី​ចំនួន ២៤៦ នាក់​ដែល​បាន​ឆ្លង​មេរោគ​កូរ៉ូណា​ឡើង​វិញ​កាលពី​ខែ​ឧសភា​និង​មិថុនា​ឆ្នាំ​នេះ បន្ទាប់ពី​បាន​ឆ្លង​មេរោគ​នេះ​កាលពី​ឆ្នាំ ២០២០ ។​

​ពួកគេ​ត្រូវបាន​ប្រៀបធៀប​ជាមួយ “​ក្រុមមនុស្ស​ដែល​ស្ថិត​ក្រោម​ការត្រួតពិនិត្យ​” ចំនួន ៤៩២ នាក់ ដែល​ត្រូវបាន​ផ្គូរ​ផ្គង​តាម​ភេទ អាយុ និង ពេលវេលា​នៃ​ការ​ធ្វើតេស្តិ៍​វិជ្ជមាន​ដំបូង​។​

​ការវិភាគ​បាន​រកឃើញថា មនុស្ស​ដែល​មិន​បាន​ចាក់​វ៉ាក់សាំង​មាន​ហានិភ័យ​ឆ្លង​ឡើងវិញ ២,៣៤ ដង​ធៀប​នឹង​មនុស្ស​ដែល​បាន​ចាក់​វ៉ាក់សាំង​ពេញលេញ ជាមួយនឹង​វ៉ាក់សាំង Pfizer, Moderna ឬ Johnson & Johnson៕

​បាតុករ​ប្រឆាំង​ការចាក់​វ៉ាក់សាំង​កូវី​ដ​១៩ ជួបជុំគ្នា​នៅ​សួន​កណ្តាល​ក្រុង​ញូវយ៉ក​កាលពី​ថ្ងៃទី​២៤​កក្កដា​២០២១