ដោយៈ គ្រញូង / បាត់ដំបងៈ លោក ហម សំខាន់ អតីតប្រធានច្រកទ្វារអន្តរជាតិដូង ស្រុកកំរៀង ត្រូវបានតែងតាំង ទៅជាអភិបាល ស្រុកសំពៅលូន។ ពិធីនេះ រៀបចំឡើងនៅក្នុងបរិវេណសាលាស្រុកសំពៅលូន នាព្រឹកថ្ងៃទី៦ ខែសីហា ឆ្នាំ២០២១ ក្រោមអធិបតីភាពលោក ងួន រតនៈ អភិបាលខេត្តបាត់ដំបង។
បន្ទាប់ពីការប្រគល់អនុក្រឹត្យ និងត្រាដល់លោក ហម សំខាន់ រួចមក លោកអភិបាល ស្រុក ទើបឡើងថ្មី បានធ្វើការប្តេជ្ញាចិត្ត អនុវត្តឲ្យបានសម្រេចរាល់ការណែនាំ បទបញ្ជារបស់ថ្នាក់ដឹកនាំខេត្ត ពិសេសរក្សាសាមគ្គីភាព ផ្ទៃក្នុង ឲ្យបានល្អប្រសើរ និងសាមគ្គីភាព ជាមួយអង្គភាពនានា ស្រុកជាប់ព្រំប្រទល់គ្នា ឲ្យបានល្អ។
បន្តមក លោកអភិបាលខេត្ត បានថ្លែងនូវការកោតសរសើរ និងវាយតម្លៃខ្ពស់ ចំពោះរដ្ឋបាលស្រុកសំពៅលូន រដ្ឋបាលឃុំ មន្ត្រីរាជការ ស៊ីវិល កងកម្លាំងប្រដាប់ អាវុធ និងប្រជាពលរដ្ឋ ទូទាំងស្រុកសំពៅលូន ដែលបានយកចិត្តទុកដាក់ចូលរួម អនុវត្តនូវធានការនានា ដែលបានដាក់ចេញ ដោយរាជរដ្ឋាភិបាល និងក្រសួងសុខា ភិបាល ក៏ដូចជា ក្រសួងមហាផ្ទៃ និងបានខិតខំចាត់វិធានការនានា ក្នុងការបង្ការ និងទប់ស្កាត់ ការរីករាលដាល នៃជំងឺកូវីដ ១៩ នៅក្នុងភូមិសាស្ត្រស្រុកសំពៅលូន នៅក្នុងកម្រិតសហគមន៍។ ទន្ទឹមនេះ អាជ្ញាធរ និងកងកម្លាំងមានសមត្ថកិច្ច គ្រប់លំដាប់ថ្នាក់ បានខិតខំរួមគ្នា ពុះពារជំនះនូវ ផលវិបាកនានា ដែលបណ្តាល មកពីជំងឺកូវីដ ១៩ ដោយបន្តបំពេញកិច្ចការសាធារណៈគ្រប់វិស័យ រួមទាំងការអនុវត្ត កម្មវិធីកំណែទម្រង់នានា របស់រាជរដ្ឋាភិបាល ការធានាថែរក្សា ការពារ សន្តិសុខ សណ្តាប់ធ្នាប់សាធារណៈ ការដោះស្រាយជីវភាពជូន ប្រជាជន និងការផ្តល់សេវា សាធារណៈចាំបាច់ និងជាមូលដ្ឋាននានា ជូនប្រជាជន សំដៅធានាបាននូវ ប្រក្រតីភាពនៃ ជីវភាពសង្គម ។ ក្រៅពីនេះ អាជ្ញាធរស្រុក ឃុំ បានយកចិត្តទុកដាក់ គ្រប់គ្រងដោះស្រាយ និងការទាមទារតវ៉ានានា ដោយសន្តវិធី ផ្អែកលើគោលការណ៍ ច្បាប់។
លោកអភិបាលខេត្ត បានមានប្រសាសន៍ថាៈ ជាអាជ្ញាធរស្រុកឃុំ ត្រូវយកចិត្ត ទុកដាក់ជំរុញ និងបំផុសវិធានការ របស់រាជរដ្ឋាភិបាល ពីវិបត្តិកូវីដ ១៩ ជាពិសេស មេរោគប្រភេទថ្មី Delta ដែលកំពុងបង្កហានិភ័យខ្ពស់ នៃការរាតត្បាត ក្នុងកម្រិត សហគមន៍ ។ ដូចនេះយើងទាំងអស់គ្នា ចាំបាច់ត្រូវបង្កើនការប្រុងប្រយ័ត្ន និងបន្ត យកចិត្តទុកដាក់ ក្នុងការបង្ការ ទប់ស្កាត់ នៃមេរោគរាតត្បាតនេះ ដែលធ្វើឲ្យប៉ះពាល់ ដល់សុខភាព សាធារណៈ សេដ្ឋកិច្ចសង្គម និងជីវភាពរស់នៅប្រចាំថ្ងៃរបស់ ប្រជាពលរដ្ឋ ពិសេសត្រូវជួយឧបត្ថម្ភគាំទ្រ ដល់ប្រជាជន ដែលខ្វះខាតជាពិសេស គ្រួសារក្រីក្រ ក្រុមជន ងាយរងគ្រោះ និងគ្រួសារបាត់បង់ការងារឬបាត់បង់ប្រាក់ ចំណូលទាំងស្រុង ដោយសារវិបត្តិកូវីដ១៩ នេះ ៕/V-PC
