ដោយៈ អូរស្មាច់ / ឧត្តរមានជ័យៈ នៅល្ងាចថ្ងៃទី៦ ខែសីហា ឆ្នាំ២០២១ អាជ្ញាធរខេត្ត ឧត្តរមានជ័យ បានសម្រេច បិទខ្ទប់ចំនួន ៩ ភូមិ និងផ្សារចំនួន៣ ក្នុងសង្កាត់ចំនួន២ គឺសង្កាត់សំរោង និងសង្កាត់កូនក្រៀល ក្រុងសំរោង ដែលស្ថិតក្នុងតំបន់មាន ហានិភ័យ ដើម្បីកាត់ផ្តាច់ចរន្ធ នៃការចម្លងជំងឺកូវីដ-១៩ បន្តចូលទៅក្នុងសហគមន៍ ផ្សេងទៀត។
លោក ឃិន ញ៉ាណ អភិបាលរងខេត្តឧត្តរមានជ័យ បានមានប្រសាសន៍ ឲ្យដឹងថាៈ តំបន់ដែលត្រូវបិទខ្ទប់ ចំនួន ១១ ភូមិខាងលើ អាជ្ញាធរបានកំណត់ជា (តំបន់លឿងទុំ) រួមមាន÷ ភូមិអូរក្រវ៉ាន់. ភូមិដូនកែន. ភូមិភ្នៀត. ភូមិដូនកែនសែនជ័យ. ភូមិសំរោង. ភូមិឈូក. ផ្សារសំរោង. ផ្សារឈូក ក្នុងសង្កាត់សំរោង និងភូមិខ្ទុំ. ភូមិថ្នល់បត់. ភូមិថ្មី. ភូមិតាម៉ាន. ផ្សារផ្អុង ក្នុងសង្កាត់កូនក្រៀល ក្រុងសំរោង។
លោកបានបន្តថាៈ តំំបន់បិទខ្ទប់ ដែលមានហានិភ័យ នៃការឆ្លងរីករាលដាល ជំងឺកូវីដ-១៩ ក្នុងសហគមន៍នេះ ហាមដល់ប្រជាពលរដ្ឋ ដើរចេញក្រៅពីលំនៅ ដ្ឋានខ្លួន ហាមឃាត់សកម្មភាព អាជីវកម្ម មុខរបរ ដែលមិនរៀបរយ នាំឱ្យឈាន ដល់ការឆ្លងរាលដាល ក្នុងសហគមន៍, ហាមការជួបជុំលក្ខណៈឯកជន តាមអាហារដ្ឋាន បិទការបម្រើសេវា ក្នុងទីតាំង តែអាចវេចខ្ចប់បាន (លើកលែងទីតាំង ដែលអនុវត្តតាមវិធានសុខាភិបាល) និងបើបំពានបំរាម របស់រដ្ឋបាលខេត្ត ត្រូវទទូលនៅការផាកពិន័យ និងឈានដល់ការកសាង សំណុំរឿងបញ្ជូនទៅ តុលាការ ចាត់ការតាមផ្លូវច្បាប់ ផងដែរ។
សូមបញ្ជាក់ថា ខេត្តឧត្ដរមានជ័យ ករណីឆ្លងកូវីដ-១៩ បានកើនឡើងដល់ សរុបចំនួន ៥.១៨៥ ករណី ខណៈរកឃើញថ្មី ៣៦ ករណី (២៨ករណី ក្នុងសហគមន៍ និង ៨ ករណីនាំចូលពីប្រទេសថៃ ដែលសម្រាក នៅមណ្ឌលធ្វើចត្តាឡីស័ក) និងជាសះ ស្បើយ ចំនួន ១៩២ នាក់បន្ថែមទៀត៕/V-PC
