ដោយៈ​តាកែវ /​តាកែវៈ អគារ​សាលប្រជុំ​ខ្នាតតូច ដ៏​ប្រណិត​របស់ ស្នងការដ្ឋាន នគរបាល ខេត្តតាកែវ ដែលមាន​កម្ពស់ ២ ជាន់ ទំហំ ១៧,៥ ម៉ែត្រ គុណ​នឹង ១៦ ម៉ែត្រ តម្លៃ​ជាង ៣២ ម៉ឺន​ដុល្លារ គ្រោង​នឹង​បញ្ចប់ ការសាងសង់ នៅ​ដំណាច់ឆ្នាំ ២០២១ នេះ ក្រោយពី​បាន​សាងសង់ ជិត ២ ឆ្នាំ​មកហើយ​។​

​ថ្លែងប្រាប់​អ្នកសារព័ត៌មាន នៅក្នុង​ការចុះ​ត្រួតពិនិត្យ អគារ​សាលប្រជុំ​ខ្នាតតូច​នេះ លោក​ឧ​ត្ត​ម​សេនីយ៍​ទោ សុខ សំណាង ស្នងការ​នគរបាល​ខេត្តតាកែវ បាន​លើក ឡើង​ថាៈ ដើម្បី​ជា​ប្រយោជន៍​រួម រូបលោក​បាន​ផ្តើមគំនិត​សាងសង់​អគារ​សាល ប្រជុំ​នេះ​ឡើង ដើម្បី​ជម្រុញ​ដល់ទី​តាំង​បម្រើ​ការងារ រដ្ឋបាល​នានា​ដល់​បងប្អូន​ប្រជា ពលរដ្ឋ ឱ្យ​កាន់តែ​ឆាប់រហ័ស និង​មាន​ផាសុកភាព ហើយ​អគារ​នេះដែរ​គឺ លោក​ធ្វើ យ៉ាង​សម្រិតសម្រាំង សាងសង់ ឱ្យមាន​គុណភាព ស្របតាម​ស្តង់ដារ និង​បំពាក់​ទៅ ដោយ ឧបករណ៍​បរិក្ខារ​ទំនើប និង​ទាន់សម័យ​ជាទីបំផុត ជាពិសេស​គិតគូរ​ពី ប្រព័ន្ធ​សុវត្ថិភាព ជា​ចំបង ទើប​ធ្វើឱ្យ​តម្លៃ នៃ​ការសាងសង់ អគារ​មាន​កម្ពស់ ២ ជាន់​នេះ មានតម្លៃ​ជាង ៣២ ម៉ឺន​ដុល្លារ ដែល​បានមកពី​ការគៀងគរ ពី​បណ្តា​សប្បុរជន​នានា និង​រូបលោក​ផ្ទាល់ ដើម្បី​សម្រេច​នូវ​ការសាងសង់ អគារ​មួយ​នេះ​ឡើង ឱ្យបាន ដើម្បី​ជា​សម​ទ្ធិ​ផល​ថ្មី​មួយទៀត នៅក្នុង​អង្គភាព នៃ​ស្នងការដ្ឋាន​នគរបាល ខេត្តតាកែវ ៕/V-PC