ដោយៈ តាកែវ / តាកែវ៖ ថ្លែងក្នុងពិធីប្រគល់រថយន្ត Ford Ranger Pick-up ចំនួន ៤ គ្រឿង ដល់បណ្ដាអធិការដ្ឋាននគរបាលស្រុក ចំនួន ៤ ស្រុក នៅក្នុងខេត្តតាកែវ លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានជំរុញ ទៅដល់កងកម្លាំងនគរបាល ឲ្យពង្រឹងការងារសន្តិសុខ សណ្ដាប់ធ្នាប់ និងបង្កើន ការយាមល្បាត តាមមូលដ្ឋាននានា កុំភ្លេចខ្លួន បើទោះបីជាមានការមមាញឹក ក្នុងយុទ្ធនាការ ប្រយុទ្ធឆ្នាំងនិងជំងឺកូវីដ១៩ យ៉ាងណាក៏ដោយ ។
លោកស្នងការ បានបន្តថាៈ រថយន្តចំនួន ៤ គ្រឿង ដែលប្រគល់ជូនអធិការ ស្រុកត្រាំកក់ ស្រុកបាទី ស្រុកទ្រាំង និងក្រុងដូនកែវ នាព្រឹកថ្ងៃទី៧ ខែសីហា ឆ្នាំ២០២១នេះ គឺជាអំណោយដ៏ថ្លៃថ្លា របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និង នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការ នគរបាលជាតិ ក្នុងការជួយសម្រួល ដល់កងកំលាំងនគរបាល ជាតិ នៅមូលដ្ឋានទាំងអស់ ប្រើប្រាស់ ក្នុងកិច្ចការពារសន្តិសុខ សណ្តាប់ធ្នាប់ ជូនដល់បងប្អូនប្រជាពលរដ្ឋ ក៏ដូចជា ការប្រើប្រាស់រថយន្តនេះ សម្រាប់បង្កើន ការយាមល្បាត អនុវត្តន៍តាមបទបញ្ជា របស់រាជរដ្ឋាភិបាលក្នុងការចេញនូវបំរាម គោចរ ស្តីពីការបិទតំបន់នានា នៅតាមមូលដ្ឋាន ។
លោកឧត្តមសេនីយ៍ទោ សុខ សំណាង បានបញ្ជាក់ថាៈ សម្រាប់ស្នងការដ្ឋាន នគរបាល ខេត្តតាកែវ គឺទទួលបាន រថយន្ត Ford Ranger Pick-up ចំនួន ១០ គ្រឿងហើយ សម្រាប់បែងចែកទៅ បណ្តាអធិការដ្ឋានស្រុក ក្រុង ទាំង ១០ ។ ជាមួយគ្នានេះដែរ ទទួលបានរថយន្ត សម្រាប់ប្រើប្រាស់ នៅតាមអធិការដ្ឋាន រៀងៗខ្លួនផងដែរ កងកំលាំងនគរបាលជាតិ ត្រូវគិតគូរពីសុខភាពខ្លួនជាចំបង និងគោរពតាមវិធានការ សុខាភិបាល ឱ្យបានខ្ជាប់ខ្ជួន ។ ស្របពេលជាមួយគ្នានោះ កងកំលាំងនគរបាលជាតិ ក៏ត្រូវយកចិត្តទុកដាក់ បំពេញភារកិច្ចជាចាំបាច់ ដើម្បីថែរក្សាសន្តិសុខ សុវត្ថិភាព និងសណ្ដាប់ធ្នាប់សាធារណៈជូនប្រជាពលរដ្ឋ ឲ្យខានតែបានផងដែរ ៕/V-PC
