ដោយៈ សៅ​វ៉ាន់ឌី / ព្រះ​វិហារៈ សាលាដំបូង​ខេត្តព្រះវិហារ នៅ​ថ្ងៃទី​៧ ខែសីហា ឆ្នាំ​២០២១ នេះ បានចេញ សេចក្តីជូនដំណឹង ពី​ការផ្អាក​ការកោះហៅ​ការចូល​ឆ្លើយ បំភ្លឺ និង​នីតិវិធី​ផ្សេងៗ​ទៀត ពី​ស្រុក​ជាំ​ក្សាន្ត មកកាន់ សាលាដំបូង​ខេត្ត​ជា​បណ្តោះ អាសន្ន ដើម្បី​ទប់ស្កាត់ ការឆ្លង​រាលដាល​ជំងឺ​កូ​វីដ​-១៩​។ នេះ​បើ​យោងតាម​លិខិត ជូនដំណឹង​របស់​សាលាដំបូង ខេត្តព្រះវិហារ ដែល​អ្នកយកព័ត៌មាន​យើង ទទួលបាន នៅ​ថ្ងៃទី​៧ ខែសីហា ឆ្នាំ​២០២១​នេះ​។​

​ការសម្រេច​ចេញ​សេចក្តីជូនដំណឹង ឱ្យ​ផ្អាក​ជា​បណ្តោះអាសន្ន ចំពោះ​ការកោះហៅ ឱ្យចូល​ឆ្លើយបំភ្លឺ និង​នីតិវិធី​ផ្សេងៗ​ទៀត ពី​ស្រុក​ជាំ​ក្សាន្ត របស់​សាលាដំបូង ខេត្តព្រះវិហារ នាពេលនេះ បន្ទាប់ពី​លោក ប្រាក់ សុវណ្ណ អភិបាលខេត្ត​ព្រះវិហារ បានសម្រេច​បិទ​ខ្ទប់ និង​កំណត់​ស្រុក​ជាំ​ក្សាន្ត ស្ថិតក្នុង​ភូមិសាស្ត្រ ខេត្តព្រះវិហារ ជា​តំបន់​ក្រហម ដើម្បី​ទប់ស្កាត់​ការឆ្លង​រាលដាល ជំងឺ​កូ​វីដ​-១៩ បំប្លែង​ថ្មី ដែល​តា (Delta)​។​

​សាលាដំបូង​ខេត្ត បានឱ្យដឹងថាៈ ដោយសារ​ស្ថានភាព​នៃ ការឆ្លង​រាលដាល​នៃ​ជំងឺ កូ​វីដ​-១៩ ពាក់ព័ន្ធ​នឹង​ព្រឹត្តិការណ៍ សហគមន៍ ២០ កុម្ភៈ​នៅ​ស្រុក​ជាំ​ក្សាន្ត ខេត្តព្រះវិហារ មាន​ឆ្លង​រីក​រាលដាល គួរឱ្យកត់សម្គាល់ ដើម្បី​ចូលរួម​ទប់ស្កាត់ ការឆ្លង​រាលដាល នៃ​ជំងឺ​នេះ សាលាដំបូង និង​អយ្យការ​អម​សាលាដំបូង ខេត្តព្រះវិហារ «​សម្រេច​ផ្អាក​នីតិវិធី កោះហៅ​ការចូល​ឆ្លើយបំភ្លឺ និង​នីតិវិធី​ផ្សេងៗ មួយចំនួនទៀត ពី​ស្រុក​ជាំ​ក្សាន្ត ខេត្តព្រះវិហារ ជា​បណ្តោះអាសន្ន​» ចាប់ពី​ថ្ងៃទី​៦ ខែសីហា ឆ្នាំ​២០២១ រហូតដល់​មានការ​ជូនដំណឹង​ជាថ្មី បន្ទាប់ពី​ស្ថានភាព​ជំងឺ​កូ​វីដ​-១៩ បាន​ធូរស្រាល និង​ប្រសើរ​ឡើងវិញ​។​

​សាលាដំបូង​ខេត្ត បានបញ្ជាក់​ថាៈ ដោយឡែក ពាក់ព័ន្ធ​នឹង​សំណុំរឿង​ជាក់ស្តែង ឬ​នីតិវិធី​ដែល​ចាំបាច់ មួយចំនួន ទៀត សាលាដំបូង និង​អយ្យការ អម​សាលាដំបូង ខេត្តព្រះវិហារ នឹង​ចាត់ការ​ជាក់ស្តែង តាម​ករណី​នីមួយៗ ដោយ​គោរព​តាម​វិធានការ សុខាភិបាល និង​វិធានការ​រដ្ឋបាល ដែល​ដាក់ចេញ​ដោយ​អាជ្ញា​ធរមាន​សមត្ថកិច្ច​។​

​សូមបញ្ជាក់ថា ស្រុក​ជាំ​ក្សាន្ត ត្រូវបាន​អាជ្ញាធរខេត្ត ចេញ​សេចក្តីសម្រេច​បិទ​ខ្ទប់​ជា បណ្តោះអាសន្ន និង​កំណត់​ជា​តំបន់​ក្រហម ដោយ​អនុវត្តន៍ ពីថ្ងៃ​ទី​៦ ខែសីហា ដល់​ថ្ងៃទី​២០ ខែសីហា ឆ្នាំ​២០២១៕/V-PC

​ខាងក្រោម​នេះ ជា​សេចក្តីជូនដំណឹង របស់​សាលាដំបូង​ខេត្តព្រះវិហា​រៈ​