ដោយៈ អង្គា​រ៍​ហេង / ភ្នំពេញៈ លោក ម៉ូ​វ ម៉ានិត អភិបាលខណ្ឌ​សែន​សុខ បាន​ឲ្យ​ដឹង នា​ព្រឹក​ថ្ងៃទី​៧ ខែសីហា ឆ្នាំ​២០២១ នេះ នៅសល់តែ ៧ ថ្ងៃ​ទៀត​តែប៉ុណ្ណោះ ដំណើរការ នៃ​យុទ្ធនា​ការចាក់​វ៉ាក់សាំង បង្ការ​ជំងឺ​កូ​វីដ​-១៩ ជូន​យុវវ័យ និង​កុមារ ទូទាំង​ខណ្ឌ​សែន​សុខ ដែលមាន​អាយុ ចាប់ពី​១២​ឆ្នាំ ដល់​១៧​ឆ្នាំ នឹងត្រូវ​បញ្ចប់ ដូ​ស​ទី​១​។​

​លោក អភិបាលខណ្ឌ​សែន​សុខ ថ្លែង​យ៉ាងនេះ ខណៈពេល​លោក បាន​ចុះ​ពិនិត្យ ការចាក់​វ៉ា​សាំង ជូន​ក្មួយៗ នៅ​មណ្ឌល​សុខភាព​ទឹកថ្លា ស្ថិតនៅ​ភូមិ​ចុង​ថ្នល់​ខាងលិច សង្កាត់​ទឹកថ្លា ខណ្ឌ​សែន​សុខ ។​

​លោក​អភិបាលខណ្ឌ បាន​បន្ថែមថាៈ «​អាជ្ញាធរ​ខណ្ឌ សូម​អញ្ជើញ​បងប្អូន កូន ក្មួយ រួសរាន់​ទាក់ទង ទៅ​ភូមិ​/​សង្កាត់ ឬ​អញ្ជើញ​ទៅ​ផ្ទាល់ មណ្ឌល​វ៉ាក់សាំង​ជិត​ផ្ទះ​បំផុត ដើម្បី​ទទួលបាន​ការចាក់​វ៉ាក់សាំង បង្ការ​ជំងឺ​កូ​វីដ​-១៩ ឲ្យ​បាន​គ្រប់ៗ​គ្នា​»​។​

​ក្នុង​មូលដ្ឋាន​ខណ្ឌ​សែន​សុខ សម្រាប់​ដូ​ស​ទី​១ ចាប់ផ្ដើម​ពីថ្ងៃ​ទី​១ ដល់​ថ្ងៃទី​១៤ ខែសីហា ឆ្នាំ​២០២១​។ សូម​ទំនាក់ទំនង អាជ្ញាធរ​មូលដ្ឋាន ដែលមាន​លេខ​ទូរស័ព្ទ និង​ទីតាំង​កំណត់​ជូន​ស្រាប់ ដើម្បី​ទទួលបាន​លិខិត អញ្ជើញ​ទៅ​ចាក់​វ៉ាក់សាំង នោះ​មាន​៖ សង្កាត់​អូរ​បែកក្អម និង​សង្កាត់​ភ្នំពេញ​ថ្មី ទីតាំង​ដែល​ត្រូវ​ចាក់​វ៉ាក់សាំង នៅ​មន្ទីរពេទ្យបង្អែក​កម្ពុជា ចិន សែន​សុខ​។ សង្កាត់​ឃ្មួញ​គឺ​នៅ​មណ្ឌល​សុខភាព ឃ្មួញ​។ សង្កាត់​ក្រាំ​ធ្នង់ នៅ​មណ្ឌល​សុខភាព​ក្រាំងធ្នង់​។ សង្កាត់​គោក​ឃ្លាង នៅ​មណ្ឌល​សុខភាព​ភ្នំពេញ​ថ្មី និង​សង្កាត់​ទឹកថ្លា គឺ​នៅ​មណ្ឌល​សុខភាព​ទឹកថ្លា​។​

​លោក​អភិបាលខណ្ឌ​សែន​សុខ បញ្ជាក់ទៀតថាៈ នៅពេលដែល​ទៅ​ទទួល ចាក់​វ៉ាក់សាំង ប្រឆាំង​ជំងឺ​កូ​វីដ​១៩ នៅ​ទីតាំង​ខាងលើ សូម​ភ្ជាប់​មកជា​មួយ​ដូចជា អត្តសញ្ញាណប័ណ្ណ​សញ្ជាតិ​ខ្មែរ ឬ​លិខិតឆ្លងដែន សំបុត្រកំណើត សំបុត្រ​បញ្ជាក់ កំណើត សៀវភៅ​ស្នាក់នៅ ឬ សៀវភៅ​វ​គ្រួសារ ឬ សង្ឃដីកា ឬ លិខិតបញ្ជាក់ ទីលំនៅ ចេញ​ដោយ​រដ្ឋបាល​សង្កាត់​។​

​រដ្ឋបាល​ខណ្ឌ​សែន​សុខ បាន​សូម​ក្រើនរំលឹក និង​អំពាវនាវ​ជាថ្មី​ម្តងទៀត ចំពោះ បងប្អូន​ដែល​ត្រូវ ទទួល​ការចាក់​វ៉ាក់សាំង បង្ការ​ជំងឺ​កូ​វីដ​១៩​ត្រូវ​រក្សា​អោយបាន ដាច់ខាត នូវ​គម្លាត​សុ​វត្តិភាព​សង្គម ពាក់​ម៉ាស់ តម្រង​ជួរ ជៀសវាង​ការ​ប្រជ្រៀត​គ្នា កៀក​គ្នា ណែន​តាន់តាប់ ដោយ​ត្រូវ​ប្រកាន់​ភ្ជាប់ នូវ​វិធានការ​របស់​ក្រសួង​សុខា ភិ​បាល និង​វិធានការ ៣​ការពារ និង​៣​កុំ របស់​សម្តេច​អគ្គមហាសេនាបតី តេ​ជោ ហ៊ុនសែន នាយករដ្ឋមន្ត្រី នៃ​ព្រះ​ជាណា​ចក្រ​កម្ពុជា​៕/V​-PC