ដោយៈ អង្គា​រ៍​ហេង / ភ្នំពេញៈ យុវជន​មួយក្រុម មាន​គ្នា ៤ នាក់ ជិះ​ម៉ូតូ ២ គ្រឿង បាន​ឆក់យក​កាបូបស្ពាយ ពី​ស្ត្រី​ម្នាក់ បានសម្រេច ហើយ​ព្យាយាម​គេចខ្លួន តែ​ភ្លាមៗ​នោះ ជនរងគ្រោះ​ស្រែកថា​ចោរៗ ទើប​បង្ក​ការភ្ញាក់ផ្អើល ដល់​ប្រជាពលរដ្ឋ និង​សមត្ថកិច្ច ដេញតាម​ឃាត់ខ្លួន​បាន ២ នាក់ ចំណែក ២ នាក់​ទៀត គេចខ្លួនបាត់​។ ហេតុការណ៍ នេះ បានកើត​ឡើង នៅ​ថ្ងៃទី​៦ ខែសីហា ឆ្នាំ​២០២១ នៅ​ចំណុច​មុខ ទីស្នាក់ការ ភូមិ​ជ្រៃ​កោង តាម​បណ្តោយ​ផ្លូវ ចោមចៅ សង្កាត់​ចោមចៅ​ទី​២ ខណ្ឌ​ពោធិ៍​សែន​ជ័យ​។​

​ជនសង្ស័យ​ទាំង ២ នាក់​នោះ ១-​ឈ្មោះ សាន់ លី​ណា ភេទ​ប្រុស អាយុ​១៨​ឆ្នាំ មាន​ទីលំនៅ​ភូមិ​ជម្ពូ​វ័ន​២ សង្កាត់​ចោមចៅ​៣ ខណ្ឌ​ពោធិ៍​សែន​ជ័យ និង​២-​ឈ្មោះ យ៉េន វ៉ាន់​នី ភេទ​ប្រុស អាយុ​២២​ឆ្នាំ មាន​ទីលំនៅ តាមផ្លូវ​លេខ​៥៩៨ សង្កាត់​ទួល សង្កែ​២ ខណ្ឌឫស្សីកែវ ។​

​តាម​ប្រ​ភ​ព័ត៌មាន ពី​កន្លែងកើតហេតុ បានឱ្យដឹងថា មុនពេល​កើតហេតុ ជនរងគ្រោះ ជិះ​ម៉ូតូ​ម្នាក់ឯង ដោយ​ស្ពាយ កាបូប​លុយ ធ្វើដំណើរ​តាម​បណ្តោយ ផ្លូវ​ចោមចៅ ក្នុងទិសដៅ​ពី​ខាងលិច ទៅខាង​កើត ខណៈ​មកដល់​ចំណុច កើតហេតុ​ស្រាប់​តែមាន ជនសង្ស័យ មួយក្រុម មាន​គ្នា ៤ នាក់ ជិះ​ម៉ូតូ ២ គ្រឿង មួយគ្រឿង ម៉ាក Suzuki nex ពណ៌​ស ពាក់​ស្លាក​លេខ ភ្នំពេញ 1IU-3619 និង​មួយគ្រឿង​ទៀត មិន​ចាំ​ម៉ាក បាន​ជិះ​មកពី​ក្រោយ រួច​ធ្វើ​សកម្មភាព ឆក់យក​កាបូប​លុយ ពី​ស្ត្រី​រងគ្រោះ បានសម្រេច ហើយ​ព្យាយាម​ជិះ​ម៉​តូ​គេចខ្លួន ។ តែ​ភ្លាមៗ​នោះ ជនរងគ្រោះ បាន​ស្រែកថា​ចោរៗ បង្ក​ការភ្ញាក់ផ្អើល​ដល់ បងប្អូន​ប្រជាពលរដ្ឋ និង​សមត្ថកិច្ច ដេញតាម​ចាប់ រហូតដល់​ភូមិ​ព្រៃ​ល្វា ទើប​សមត្ថកិច្ច ចាប់បាន ២​នាក់ ចំណែក ២ នាក់​ទៀត គេចខ្លួនបាត់​។​

​ជនរងគ្រោះ បានបញ្ជាក់​ថាៈ ក្នុង​កាបូប​របស់គាត់ មាន​លុយ​ខ្មែរ និង​ដុល្លារ សរុប​ជាង ១ ពាន់​ដុល្លារ និង​គ្រឿងអលង្ការ មួយចំនួនទៀត​។

​ក្រោយ​កើតហេតុ ជនសង្ស័យ ត្រូវបាន​កម្លាំង​នគរបាល ចោមចៅ​ទី​២​នាំខ្លួន​យក ទៅ​សាកសួរ​បន្ត រង់ចាំ​បញ្ជូន ទៅ​ផ្នែក​ព្រហ្មទណ្ឌ នៃ​អធិការដ្ឋាន​ខណ្ឌ​ពោធិ៍ សែន​ជ័យ ចាត់ការ​តាមច្បាប់​។ ចំណែក​កាបូប​លុយ ត្រូវបាន​សមត្ថកិច្ច ប្រគល់ជូន​ម្ចាស់​ដើម​វិញ​៕/V​-PC