ដោយៈ គ្រញូង / បាត់ដំបងៈ កាលពី​ព្រឹក​ថ្ងៃទី​៧ ខែសីហា ឆ្នាំ ២០២១ នគរបាល ស្រុក​បាណន់ បាន​បញ្ជូន​ជនសង្ស័យ​ម្នាក់ និង​ថ្នាំញៀន ប្រភេទ​ម៉ា​ទឹកកក ចំនួន ៧ ថង់​តូច ទម្ងន់ ១,៦៦ ក្រាម មក​ការិយាល័យ​ប្រឆាំង គ្រឿងញៀន​ខេត្ត ដើម្បី​ចាត់ការ​បន្ត​។​

​លោក ប៉ាន់ វ៉ាន់​នី អធិការនគរបាល ស្រុក​បាណន់ បាន​ឲ្យ​ដឹងថាៈ ជនសង្ស័យ មានឈ្មោះ ថង ចាប ភេទ​ប្រុស អាយុ​៦៦​ឆ្នាំ នៅ​ភូមិ​ភ្នំ​សំពៅ​កើត ឃុំ​ភ្នំ​សំពៅ ស្រុក​បាណន់​។ វត្ថុតាង ដែល​ដកហូត​បាន រួមមាន​ថ្នាំញៀន ប្រភេទ​ម៉ា​ទឹកកក (ICE) ចំនួន ៧ ថង់​តូច ទម្ងន់​១,៦៦​ក្រាម ទូរស័ព្ទដៃ ២​គ្រឿង លុយ​ខ្មែរ ៣ ម៉ឺន​រៀល និង​ថង់ សម្រាប់​ច្រក​ថ្នាំញៀន លក់​មួយចំនួន​។

​លោក​អធិការ​ស្រុក បានបញ្ជាក់​ថាៈ ក្រោយ​ជនសង្ស័យ ឆ្លើយ​សារភាព​រួចមក កម្លាំង​ជំនាញ​ស្រុក បាន​កសាង សំណុំរឿង បញ្ជូន​ជនសង្ស័យ​ទៅ​ការិយាល័យ ប្រឆាំង​គ្រឿងញៀន​ខេត្ត ដើម្បី​ចាត់ការ​បន្ត​តាម​នីតិវិធី​៕/V-PC