ដោយៈអង្គារ៍ហេង/ភ្នំពេញៈ លោក ម៉ូវ ម៉ានិត អភិបាលខណ្ឌសែនសុខ បានបញ្ជាក់ឲ្យដឹងថា ការងារចាក់វ៉ាក់សាំងបង្ការជំងឺកូវីដ-១៩ ជូនកុមារ យុវវ័យ ចាប់ពីអាយុ១២ដល់១៧ឆ្នាំ នៅខណ្ឌសែនសុខ មាន៦សង្កាត់ ដែលមានតួរលេខរួមសរុបចំនួនជាង២០.០០០នាក់។ នេះបើតាមការបញ្ជាក់ឲ្យដឹងពីលោក ម៉ូវ ម៉ានិត អភិបាលខណ្ឌសែនសុខ និងមន្ដ្រីជំនាញ ចុះពិនិត្យ និងពន្លឿនការងារចាក់វ៉ាក់សាំង នៅមណ្ឌលសុខភាពទឹកថ្លា សង្កាត់ទឹកថ្លា ខណ្ឌសែនសុខ នាព្រឹកថ្ងៃទី៧ ខែសីហា ឆ្នាំ២០២១។
លោក ម៉ូវ ម៉ានិត បានបញ្ជាក់ថា ចាប់តាំងពីរាជរដ្ឋាភិបាលកម្ពុជា បានបើកយុទ្ធនាការថ្ងៃទី១ ខែសីហា ឆ្នាំ២០២១ គឺជាថ្ងៃនៃការចាប់ផ្តើមដំណើរការចាក់វ៉ាក់សាំងការពារជំងឺកូវីដ-១៩ ជូនកុមារ និងយុវវ័យ អាយុចាប់ពី១២ឆ្នាំ ដល់ ១៧ឆ្នាំ ក្នុងភូមិសាស្ត្ររាជធានីភ្នំពេញ រហូតមកដល់ថ្ងៃទី៧ ខែសីហានេះ កុមារចាប់ពីអាយុ ១២ដល់ ១៧ឆ្នាំ បានសម្រុកមកទទួលការចាក់វ៉ាក់សាំងទៅតាមមណ្ឌលដែលយើងមានចំនួន៥ ទីតាំងបានចំនួនជាងមួយម៉ឺននាក់ហើយ។ ទីតាំងចាក់វ៉ាក់សាំងទាំង៥កន្លែង គឺនៅសង្កាត់អូរបែកក្អម និងសង្កាត់ភ្នំពេញថ្មី ទីតាំងដែលត្រូវចាក់វ៉ាក់សាំងនៅមន្ទីរពេទ្យបង្អែកកម្ពុជា-ចិន សែនសុខ។ សង្កាត់ឃ្មួញ គឺនៅមណ្ឌលសុខភាពឃ្មួញ។ សង្កាត់ក្រាំធ្នង់ នៅមណ្ឌលសុខភាពក្រាំងធ្នង់។ សង្កាត់គោកឃ្លាងនៅមណ្ឌលសុខភាពភ្នំពេញថ្មី និងសង្កាត់ទឹកថ្លា គឺនៅមណ្ឌលសុខភាពទឹកថ្លា។
ក្នុងឱកាសនោះដែរ លោក ម៉ូវ ម៉ានិត ក៏បានធ្វើការអំនាវនាវចំពោះមាតាបិតា សូមនាំកូនចៅកុមារ និងយុវវ័យ មានអាយុចាប់ពី១២ ដល់១៧ឆ្នាំ មកចាក់វ៉ាក់សាំងបង្ការជំងឺកូវីដ-១៩ នៅលើទីតាំងដែលបានកំណត់ចំនួន៥កន្លែង ឲ្យបានគ្រប់គ្នាៗ ព្រោះថា នៅសល់តែ៧ថ្ងៃទៀតប៉ុណ្ណោះ ការចាក់វ៉ាក់សាំងបង្ការជំងឺកូវីដ១៩ ជូនកូនចៅកុមារដូសទី១ និងត្រូវបិទបញ្ចប់។ ហើយអាណាព្យាបាល គ្រាន់តែយកមកជាមួយនូវឯកសារមួយចំនួនដូចជា៖ សំបុត្រកំណើត ឬសៀវភៅស្នាក់នៅ ឬសៀវភៅគ្រួសារ ឬលិខិតឆ្លងដែន ដើម្បីយកមកបង្ហាញ អាជ្ញាធរភូមិសង្កាត់ដែលបងប្អូន កូន ក្មួយ រស់នៅ នោះបងប្អូន និងទទួលបាន លិខិតអនុញ្ញាត្ដិ ចាក់វ៉ាក់សាំងបានហើយ ដោយមិនមានការបង់ប្រាក់នោះទេ។
ក្នុងឱកាសនោះដែរ លោក ម៉ូវ ម៉ានិត ក៏បានរំលឹកផងដែរថា បន្ទាប់ពីមានបញ្ជាពីអភិបាលរាជធានីភ្នំពេញ លោក ឃួង ស្រេង ឲ្យអាជ្ញាធរខណ្ឌសង្កាត់ភូមិ គឺមិនអនុញ្ញាត្តឱ្យមានជាដាច់ខាត ចំពោះការយកលុយជាថ្នូរនៃការផ្តល់ប័ណ្ណចាក់សាំងជូនកុមារ។ បើមានករណីបែបនេះ នឹងមានបញ្ហាប្រឈមជាមួយនឹងអាជ្ញាធររាជធានីភ្នំពេញ ពោលគឺរដ្ឋបាលរាជធានីភ្នំពេញ មិនមានការយោគយល់ឡើយ។
លោកអភិបាលខណ្ឌសែនសុខ បានសូមក្រើនរំលឹក និងអំពាវនាវជាថ្មីម្តងទៀត ចំពោះបងប្អូនដែលត្រូវទទួលការចាក់វ៉ាក់សាំងបង្ការជំងឺកូវីដ១៩ ត្រូវរក្សាឲ្យបានដាច់ខាតនូវគម្លាតសុវត្តិភាពសង្គម ពាក់ម៉ាស់ តម្រងជួរ ជៀសវាងការប្រជ្រៀតគ្នា កៀកគ្នា ណែនតាន់តាប់ ដោយត្រូវប្រកាន់ភ្ជាប់នូវវិធានការរបស់ក្រសួងសុខាភិបាល និងវិធានការ «៣ការពារ និង៣កុំ» របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះជាណាចក្រកម្ពុជា៕
