​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ ពួក​តា​លី​បង់​បាន​រឹតបន្តឹង​ការឡោមព័ទ្ធ​ជុំវិញ​ភាគ​ខាងជើង​អា​ហ្វ​ហ្គានី​ស្ថាន​កាលពី​ថ្ងៃអាទិត្យ​ទី​៨​សីហា​ដោយ​ដណ្តើម​យក​បាន​ទី​រួម​ខេត្ត​ចំនួន​បី​​បន្ថែមទៀត ខណៈ​ពួកនេះ​ងាក​មក​ផ្តោតលើ​ការវាយលុក​ដណ្តើម​ទីក្រុង​នានា​បន្ទាប់ពី​ដណ្តើម​កាន់កាប់​តំបន់​ជនបទ​ភាគច្រើន​ក្នុង​រយៈពេល​ប៉ុន្មាន​ខែ​ចុងក្រោយ​នេះ​។​

​ក្រុម​បះបោរ​នេះ​បាន​ដណ្តើម​យក​ទី​រួម​ខេត្ត​ចំនួន​ប្រាំ​នៅក្នុង​ប្រទេស​អា​ហ្វ​ហ្គានី​ស្ថាន​ចាប់តាំងពី​ថ្ងៃ​សុក្រ​នៅក្នុង​ការវាយលុក​លឿន​ដូច​រន្ទះ​ដែល​ហាក់​មាន​គ្នា​ច្រើន​លើសលប់​សង្គ្រប់​លើ​កង​​កម្លាំង​រដ្ឋាភិបាល​។​

​ការប្រយុទ្ធ​គ្នា​នៅក្នុង​ជម្លោះ​រ៉ាំរ៉ៃ​របស់​អា​ហ្វ​ហ្គានី​ស្ថានបាន​កើនឡើង​យ៉ាង​ខ្លាំង​ចាប់តាំងពី​ខែ​ឧសភា នៅពេល​ដែល​កងកម្លាំង​បរទេស​ចាប់ផ្តើម​ដកទ័ព​ចេញ​ដែល​នឹង​បញ្ចប់​ទាំងស្រុង​នៅ​​ចុងខែ​សីហា​នេះ​។​

​ប្រភព​សមាជិកសភា សន្តិសុខ និង​ប្រជាពលរដ្ឋ​នៅក្នុង​ទី​រួម​ខេត្ត​ទាំងនោះ​បាន​បញ្ជាក់ថា ទីក្រុង​ឃុន​ឌូស ទីក្រុង​សាអេ​ផូល និង​ទីក្រុង​តា​ឡូ​កាន​នៅ​ភាគ​ខាងជើង​បាន​ដួលរលំ​ក្នុង​​រយៈពេល​តែ​ប៉ុន្មាន​ម៉ោង​ពី​គ្នា​កាលពី​ថ្ងៃអាទិត្យ​។​

​នៅ​ទីក្រុង​ឃុន​ឌូស ជាទី​រួម​ខេត្ត​ឃុន​ឌូស អ្នកស្រុក​ម្នាក់​បាន​ពណ៌​នា​ថា​ទីក្រុង​នេះ​បាន​ធ្លាក់ចូល “​ភាពវឹកវរ​ទាំងស្រុង​”​។​

​ពួក​តា​លី​បង់​បាន​និយាយ​នៅក្នុង​សេចក្តីថ្លែងការណ៍​មួយ​ថា “​បន្ទាប់ពី​មាន​ការប្រយុទ្ធ​គ្នា​យ៉ាង​សាហាវ កងជីវពល​យើង​ដោយ​មាន​គុណ​ព្រះ​ជួយ បាន​ដណ្តើម​កាន់កាប់​ទីក្រុង​ឃុន​ឌូស​។​កង​ជីវ​​ពល​យើង​ក៏​បាន​ដណ្តើម​ទីក្រុង​សាអេ​ផូល អគារ​រដ្ឋាភិបាល និង​អគារ​ស្ថាប័ន​ទាំងអស់​នៅ​ទីនោះ​ផងដែរ​”​។​

​ក្រុម​បះបោរ​នេះ​បាន​និយាយ​នៅ​លើ Twitter នៅ​ល្ងាច​ថ្ងៃអាទិត្យ​ថា ពួកគេ​ក៏​បាន​ដណ្តើម​យក​ទីក្រុង​តា​ឡូ​កាន​ដែល​ជាទី​រួម​ខេត្ត​នៃ​ខេត្ត​តា​ខា​ផងដែរ​៕

ពួក​តា​លី​បង់​ផ្តោតលើ​ការដណ្តើម​ទី​រួម​ខេត្ត ក្រោយ​វាយ​បាន​ទីជនបទ​ភាគច្រើន​នៃ​ប្រទេស​អា​ហ្វ​ហ្គានី​ស្ថាន។ទាហានរដ្ឋាភិបាលអាហ្វហ្គានីស្ថានដកថយចេញពីការវាយសន្ធាប់របស់ក្រុមតាលីបង់ជាបន្តបន្ទាប់