ដោយៈ ស​រិ​ទ្ធ / ភ្នំពេញៈ ស្ត្រី​២​នាក់ ត្រូវបាន​សមត្ថកិច្ច នគរបាល​ខណ្ឌចំការមន ឃាត់ខ្លួន​ភ្លាមៗ បន្ទាប់ពី​ត្រួតពិនិត្យ ឃើញ​វត្ថុតាង ក្រាម​ស​ថ្លា សង្ស័យ​គ្រឿងញៀន មាន​ចំនួន ១ កញ្ចប់​ធំ​ល្មម និង ៤២ កញ្ចប់​ថង់​តូច កាលពី​ល្ងាច ថ្ងៃទី​៨ ខែ សីហា ឆ្នាំ​២០២១ នៅ​ចំណុច​ខាងក្រោយ ក្រុមហ៊ុនទូរស័ព្ទ ០១៣ តាមផ្លូវ​ព្រះមុនីវង្ស ក្រុម​៣២ ភូមិ​៥ សង្កាត់​ផ្សារ​ដើមថ្កូវ ខណ្ឌចំការមន ។​

​ស្ត្រី​២​នាក់​នេះ ឈ្មោះ យ៉េន សុ​ខេន ហៅ ចាន់ ធី អាយុ ៥៧​ឆ្នាំ មុខរបរ បោក​ខោអាវ និង​ឈ្មោះ ហូ ចិន្តា ហៅ ថុំ អាយុ ២៨​ឆ្នាំ មុខរបរ​គ្មាន ទាំង​២​នាក់ ស្នាក់នៅ​ផ្ទះជួល​គ្មាន​លេខ ផ្លូវលំ ក្រុម​៣២ ភូមិ​៥ សង្កាត់​ផ្សារ​ដើមថ្កូវ ខណ្ឌចំការមន ។​

​លោក​វរសេនីយ៍ទោ ផន អូន អធិការរង ទទួល​ផែន​ប្រឆាំង​គ្រឿងញៀន ខណ្ឌចំការមន បានអោយដឹងថាៈ មុនពេល​កើតហេតុ លោក​បាន​ដឹកនាំ​កម្លាំង​ប៉ុស្តិ៍ និង​ផ្នែក​ជំនាញ ដើម្បី​ល្បាត​ក្នុងភូមិ​សាស្ត្រ ជាពិសេស​តំបន់​ស្មុ​គ្រ​ស្មាញ លួច​ជក់​ប្រើប្រាស់​គ្រឿងញៀន​។ លុះ​មកដល់​ចំណុចកើតហេតុ កងកម្លាំង​ល្បាត បាន​ប្រទះឃើញ​ស្ត្រី ២ នាក់ កំពុង​អង្គុយ​ក្បែរ​គ្នា មុខផ្ទះ​ជួល​គ្មាន​លេខ ហើយក៏​ធ្វើការ​ត្រួតពិនិត្យ ឃើញ​មាន​វត្ថុតាង ក្រាម​ស​ថ្លា សង្ស័យ​ជា គ្រឿងញៀន ១ កញ្ចប់​ធំ​ល្មម នៅក្នុង​ហោប៉ៅ​អាវ ខាងឆ្វេង និង ៤២ កញ្ចប់​ទៀត នៅក្នុង​ឆ្នាំងដី ក្បែរ​ជើង​ខាងស្តាំ របស់​ជនសង្ស័យ ជា​ស្ត្រី​ឈ្មោះ យ៉េន សុ​ខេន ហៅ ចាន់ ធី ទើប​សមត្ថកិច្ច ឃាត់ខ្លួន​នាំមក​ប៉ុស្តិ៍​ផ្សារ​ដើមថ្កូវ ដើម្បី​សាកសួរ​បន្តទៀត​។​

​សមត្ថកិច្ច បាន​បន្តទៀតថាៈ នៅមុខ​សមត្ថកិច្ច ជនសង្ស័យ ជា​ស្ត្រី​ឈ្មោះ យ៉េន សុ​ខេន បាន​អះអាងថា ក្រាម​ស​ថ្លា​សង្ស័យ ជា​ថ្នាំញៀន​នេះ ពិតជា​របស់ខ្លួន ពិតប្រាកដ​មែន​។ បន្ទាប់ពី​ធ្វើការ​សាកសួរ​រួច ជនសង្ស័យ ជា​ស្ត្រី​ទាំង​២​នាក់​នេះ ត្រូវបាន​សមត្ថកិច្ច​ប​ញ្ជូ​ន ទៅ​អធិការដ្ឋាន​ខណ្ឌចំការមន ដើម្បី​ចាប់​ការ តាម​នីតិវិធី​ច្បាប់ ៕/V