ដោយៈ អង្គា​រ៍ហង / ភ្នំពេញៈ មនុស្ស​ប្រុស​ស្រី ចំនួន ៤ នាក់ បាន​រងរបួស​ធ្ងន់​ស្រាល ដោយសារ​រថយន្ត​ឡិច​ស៊ី​ស RX-330 បោះពួយ​ក្នុង​ល្បឿន​លឿន ជ្រុល​ទៅបុក​ឡាំ ប្រ៊ឺ​តា មួយគ្រឿង ពេញទំហឹង រួច​រេ​ចង្កូត ទៅបុក​រះ​ម៉ូតូ និង​កន្លែង​លក់ដូរ​មួយកន្លែង ទៀត ។

​ហេតុការណ៍​នេះ បានកើត​ឡើង កាលពី​វេលា​ម៉ោង ៨ យប់ ថ្ងៃទី​៨ ខែសីហា ឆ្នាំ​២០២១ នៅ​ចំណុច ស្តុ​ប​ថ្នល់​បត់ តាម​បណ្តោយ​ផ្លូវ ២១៧ កែង​នឹង​ផ្លូវ​បេតុង​ព្រៃ​ស ក្នុង​សង្កាត់​ដង្កោ ខណ្ឌដង្កោ ។ រថយន្ត​បង្ក​ព្យាយាម​បើក​រត់គេច ផ្អើល​សមត្ថកិច្ច ខណ្ឌដង្កោ ដេញតាម រហូតមកដល់​ចំណុច ផ្ទះ​លេខ 124EEo ផ្លូវ​03 ក្នុង​បូរី​ឡាយ​គង់ ទើប​សមត្ថកិច្ច ឃាត់​ជាប់​បានតែ​រថយន្ត ឯ​តៃកុង រត់​ចូល​ផ្ទះ​បាត់ ហៅ​មិន​ចេញពីផ្ទះ​។​

​តាម​ប្រភពព័ត៌មាន​ពី​កន្លែងកើតហេតុ បានឱ្យដឹងថាៈ មុន​កើតហេតុ គេ​ឃើញ បុរស​ម្នាក់ បើករថយន្ត​ឡិច​ស៊ី​ស RX-330 ពណ៌​ទឹកប្រាក់ ពាក់​ស្លាក​លេខ ភ្នំពេញ 2J-1731 ធ្វើដំណើរ​តាម បណ្តោយ​ផ្លូវ ២១៧ ទិសដៅ​ពី​ខាងត្បូង ទៅខាង​ជើង ក្នុង​ល្បឿន យ៉ា​លឿន លុះ​មកដល់​ចំណុច កើតហេតុ ខាងលើ បាន​ជ្រុល​ទៅបុក ឡាំ​ប្រ៊ឺ​តា ពណ៌​លឿង ពាក់​ស្លាក​លេខ 1GU 9698 បើកបរ​ដោយ បុរស​ម្នាក់ រួម​ដំណើរ​នឹង​ស្ត្រី​ម្នាក់ទៀត ធ្វើដំណើរ​តាម​បណ្តោយ​ផ្លូវ បេតុង​ព្រៃ​ស ទិសដៅ ពី​ខាងលិច ទៅខាង​កើត ពី​ចំហៀង​ខាងស្តាំ ពេញទំហឹង គាប​ជាប់​ជាមួយ​កង់​បី ។​

​ភ្លាមនោះ ប្រជាពលរដ្ឋ ជាច្រើន​នាក់ នៅ​កន្លែងកើតហេតុ នាំគ្នា​ឃាត់​រថយន្ត​បង្ក នោះដែរ តែ​រថយន្ត​បង្ក បាន​ថយក្រោយ រួច​បើក​រត់ រេ​ចង្កូត​ទៅបុក​រះ​ម៉ូតូ សង់​កូរ៉េ​មួយគ្រឿង ចត​ស្ងៀម និង​កន្លែង​លក់ដូរ មួយកន្លែង​ទៀត រង​ការខូចខាត យ៉ាងដំណំ និង​របួសធ្ងន់​ស្រាល មនុស្ស​ប្រុស​ស្រី ៤ នាក់ ក្នុងពេលនោះ​ទៅ​។

​ក្រោយមក សមត្ថកិច្ច បាន​យក​រថយន្ត​បង្ក ទៅ​រក្សាទុក នៅ​អធិការដ្ឋាន​នគរបាល ខណ្ឌដង្កោ ដើម្បី​ឲ្យ​ម្ចាស់​ចូលខ្លួន មក​ដោះស្រាយ​គ្នា តាមផ្លូវ​ច្បាប់​៕/V​-PC