ដោយៈ ភ្នំ​ស​ន្ទុ​ក -​ភ្នំ​ស្វាយ / កំពង់ធំៈ អភិបាលក្រុង​ស្ទឹងសែន អំពាវនាវ​ដល់​អាជីវករ ផ្សារ​កំពង់ធំ និង​អ្នកពាក់ព័ន្ធ ចូលរួម​ផ្តល់​សំណាក ដោយ​ឧបករណ៍ តេស្ត​រហ័ស ឲ្យ​បាន​គ្រប់គ្នា នៅ​មណ្ឌល​យក​សំណាក សាលាបឋមសិក្សា ក្រុង​ស្ទឹងសែន ។ លោក ម៉ាក់ ប៊ុន​ហុង អភិបាលក្រុង​ស្ទឹងសែន បាន​អំពាវនាវ​បែបនេះ នៅ​ថ្ងៃទី​៩ ខែសីហា ឆ្នាំ​២០២១ ។​

​លោក​អភិបាលក្រុង​ស្ទឹងសែន បាន​បន្តថាៈ អាជ្ញាធរ បាន​បិទ​ខ្ទប់​ផ្សារ​កំពង់ធំ កាលពី​ថ្ងៃទី​៨ ខែសីហា ម្សិលមិញ​នេះ ដោយសារ​មាន​បងប្អូន​អាជីវករ ផ្សារ​កំពង់ធំ បានមក​យក​សំណាក ដោយ​តេស្ត​រហ័ស រក​មេរោគ​កូ​វីដ​-១៩ ចំនួន ៤៤៨ នាក់ ក្នុងនោះ រកឃើញ​អ្នក​វិជ្ជមាន ចំនួន​ជាង ២០ នាក់ ។
​ដោយ​បានឃើញ​ទិន្នន័យ​អ្នក​វិជ្ជមាន មេរោគ​កូ​វីដ​-១៩ លើ​អាជីវករ ក្នុង​ផ្សារ​កំពង់ធំ ហេតុនេះ អាជ្ញាធរ កំពុងតែ​មានការ​ព្រួយបារម្ភ​ខ្លាំង ចំពោះ​ពួកគេ ។ ដូច្នេះហើយ សូម​បងប្អូន ប្រជាពលរដ្ឋ​ទាំងអស់ ដែល​រស់នៅក្នុង​ក្រុង​ស្ទឹងសែន ខេត្តកំពង់ធំ សូម​បន្ត​ការប្រុងប្រយ័ត្ន បន្ថែមទៀត ចំពោះ​សុវត្ថិភាព ។​

​ទន្ទឹមនឹង​នោះដែរ លោក សុក ហៃ អភិបាលរង​ខេត្តកំពង់ធំ បានអោយដឹងថាៈ ចំពោះ​ការលក់​ក្នុង​ផ្សារ នា​ខេត្តកំពង់ធំ ទាំងអស់ គឺ​អាជ្ញា​ធរមាន​សមត្ថកិច្ច អនុញ្ញាត អោយ​លក់ដូរ​ត្រឹមតែ​ការ​វេច​ខ្ចប់​ប៉ុណ្ណោះ ហើយ​គ្រប់​មធ្យោបាយ​មិន​អនុញ្ញាតអោយ ដាក់តាំង មាន​តុ អង្គុយ បញ្ឈប់​ទទួលភ្ញៀវ ចូល​សម្រាក ហូប នៅក្នុង​អាហារ​ដ្ឋា​ន របស់ខ្លួន​ឡើយ ។​

​លោក​អភិបាលរង​ខេត្តកំពង់ធំ បាន​បន្តថាៈ សូម​បញ្ឈប់​ការជួបជុំ ជួបគ្នា​ក្នុងការ ពិសា​គ្រឿង​ស្រវឹង និង​យោងតាម សារាចរ របស់​រដ្ឋបាល​ខេត្តកំពង់ធំ ចុះ​លេខ ៤៤ ៨០ គឺ​ផ្អាក​ធ្វើចរាច​ណ៍​ចេញចូល ចាប់​វេលា​ម៉ោង ៩ យប់ ដល់​ម៉ោង ៣ ទៀបភ្លឺ ៕/V​-PC