ដោយៈ សាវ​រក្ស / ភ្នំពេញៈ នគរបាល​ខណ្ឌឫស្សីកែវ ឃាត់ខ្លួន​ជនសង្ស័យ ៣ នាក់ ករណី​លួច មាន​ស្ថាន​ទំងន់ទោស ដោយសារ​ការប្រព្រឹត្ត​អំពើហិង្សា (​ឆក់​កាបូប​ប្រាក់​) នៅ​ថ្ងៃទី​៨ ខែសីហា ឆ្នាំ​២០២១ វេលា​ម៉ោង​១៣​និង​៤០​នាទី នៅ​ចំណុច​បណ្តោយ ផ្លូវ​លេខ​៥ ក្រុម​៤ ភូមិ​ឃ្លាំង​សាំង សង្កាត់​ឫស្សីកែវ ខណ្ឌឫស្សីកែវ ហើយ​គេចខ្លួនបាត់ ។ លុះ​ថ្ងៃទី​៩ សីហា វេលា​ម៉ោង ១៩:០០ នាទី កំលាំង​ជំនាញ​ខណ្ឌ បើក​ការស្រាវជ្រាវ និង​បាន​ឃាត់ខ្លួន​ជនសង្ស័យ ទាំង​៣​នាក់ នៅ​ចំណុច​ក្រោយ ពេទ្យ​កាល់ម៉ែត សង្កាត់​ស្រះចក ខណ្ឌដូនពេញ​។

​លោក ហ៊ាង ថា​រ៉េត អធិការ​ខណ្ឌ បានបញ្ជាក់​ថាៈ ជនសង្ស័យ​ទាំង ៣ នាក់​នោះ រួមមានៈ ១-​ឈ្មោះ អាន សុខ​ទិ​ត្យ​ធិ​រាម អាយុ​១៧​ឆ្នាំ ស្នាក់​នៅផ្ទះ​លេខ​៤៧ ភូមិ​១៥ សង្កាត់​ស្រះចក ខណ្ឌដូនពេញ​។ ២-​ឈ្មោះ សុខ ហេង អាយុ ១៨​ឆ្នាំ មាន​ទីលំនៅ ផ្ទះជួល​ភូមិ​២ សង្កាត់​ស្រះចក ខណ្ឌដូនពេញ ។ ៣-​ឈ្មោះ ម៉ោញ ចាន់​ពិសិដ្ឋ អាយុ​១៧​ឆ្នាំ មាន​ទីលំនៅ ផ្ទះជួល​ភូមិ​១៥ សង្កាត់​ស្រះចក ខណ្ឌដូនពេញ​។ ក្មេងប្រុស​ទាំង​៣​នាក់​នេះ មានមុខ​របរ មិន​ពិតប្រាកដ ដូចគ្នា តែ​គ្មាន​សារធាតុ​ញៀន ក្នុង​ខ្លួន​ឡើយ​។​

​ចំណែក​ជនរងគ្រោះ ឈ្មោះ មាន ដា​នី ភេទ​ស្រី អាយុ​៣៣ ឆ្នាំ ស្នាក់​នៅផ្ទះ​លេខ ៣៦៨ ផ្លូវលំ ភូមិ​តា​ង៉ូ​វ សង្កាត់​និរោធ ខណ្ឌ​ច្បារអំពៅ​។​

​សមត្ថកិច្ច ក៏បាន​ដកហូត​សម្ភារៈ រួមមាន ម៉ូតូ​១​គ្រឿង ម៉ាក​ហុងដា ស្កូ​ប​ពី ពណ៌​ស ផ្លាកលេខ ភ្នំពេញ 1ID-6134​។ ដោយឡែក​សម្ភារៈ​បាត់បង់ រួមមាន ទូរស័ព្ទ​ម៉ាក ម៉ាក Iphone 11 ប្រូ​, ប្រាក់​ចំនួន ១០០.០០០ រៀល​, កាបូប​ប្រាក់ ពណ៌​ខ្មៅ​ចំនួន​១ ។​

​សមត្ថកិច្ច បានអោយដឹងថាៈ នៅ​ថ្ងៃខែ​ឆ្នាំ​ខាងលើ ជនសង្ស័យ បានធ្វើ​សកម្មភាព ឆក់​កាបូប ពី​ជនរងគ្រោះ នៅ​ចំណុចកើតហេតុ ខាងលើ បានសម្រេច​ហើយ​គេច ខ្លួន​បាត់ ។ លុះ​ថ្ងៃទី​៩ ខែសីហា ឆ្នាំ​២០២១ វេលា​ម៉ោង​១៩:០០ នាទី​កំលាំង​ជំនាញ ខណ្ឌ បើក​ការស្រាវជ្រាវ និង​ឃាត់​ខ្លូន​បាន​ជនសង្ស័យ ចំនួន​៣​នាក់​នៅ​ចំណុច ក្រោយ​ពេទ្យ​កាល់ម៉ែត សង្កាត់​ស្រះចក ខណ្ឌដូនពេញ យកមក​សាកសួរ នៅ​អធិការដ្ឋាន​នគរបាល​ខណ្ឌ ដើម្បី​កសាង​សំណុំរឿង បញ្ជូនទៅ​តុលាការ តាម​នីតិវិធី ៕/V-PC