​ប្រែ​សម្រួល : កញ្ញា​ដា​លី​ស (​បាងកក​ប៉ុស្តិ៍​) ៖ អភិបាលរដ្ឋ​ញូវយ៉ក​លោក អេន​ឌ្រូ ខូ​ម៉ូ ដែល​កំពុង​ប្រឈម​នឹង​លទ្ធភាព​ចោទប្រកាន់​ជុំវិញ​ការអះអាង​អំពី​ការ​បៀតបៀន​ផ្លូវភេទ​ពី​ស្ត្រី ១១ នាក់​និង​សម្ពាធ​កាន់តែខ្លាំង​ឡើង​ឱ្យ​លាលែង​ពី​តំណែង​ពី​សមាជិក​គណបក្ស​ប្រជាធិបតេយ្យ បាន​ប្រកាស​លាលែង​ពី​តំណែង​កាលពី​ថ្ងៃ​អង្គារ​ទី​១០​សីហា​។​

​វា​គឺជា​ការធ្លាក់ចុះ​ដ៏​គួរឱ្យភ្ញាក់ផ្អើល​មួយ​សម្រាប់​លោកខូ​ម៉ូ​អាយុ ៦៣ ឆ្នាំ​ដែល​ទើប​តែ​មួយ​ឆ្នាំ​មុន​នេះ​បានទទួល​ការកោតសរសើរ​ចំពោះ​ការគ្រប់គ្រង​របស់​គាត់​លើ​ជំងឺ​រាតត្បាត​មុនពេល​​ហ៊ុមព័ទ្ធ​ដោយ​ការចោទប្រកាន់​ពី​បទ​បៀតបៀន​ផ្លូវភេទ​និង​ការចោទប្រកាន់​នានា​ថា​គាត់​បាន​លាក់បាំង​ពី​ទំហំ​នៃ​ការស្លាប់​ដោយកូវី​ដ​នៅតាម​មណ្ឌល​ថែទាំ​មនុ​ស្ស​ចាស់​។​

​លោក​មក​ពី​គ្រួសារ​មួយ​ដែល​អ្នក​រដ្ឋ​ញូវយ៉ក​ចាត់ទុក​ជា​រាជវង្ស​នយោបាយ​ព្រោះ​លោក​ម៉ា​រី​អូ​ជា​ឪពុក​របស់​គាត់​បានកា​ន់​តំណែង​បី​អាណត្តិ​ជា​អភិបាលរដ្ឋ​ហើយ​ប្អូនប្រុស​របស់​គាត់​ឈ្មោះ​គ្រីស​​គឺជា​ពិធីករ​ល្បី​បំផុត​នៅ​ទូរទស្សន៍ CNN ប៉ុន្តែ​ក្នុង​រយៈពេល​ពីរ​សប្តាហ៍​ទៀត លោកខូ​ម៉ូ​នឹង​ចាកចេញ​ពី​តំណែង​។​

​លោកខូ​ម៉ូ​បាន​និយាយ​នៅក្នុង​សុន្ទរកថា​តាម​កញ្ចក់​ទូរទស្សន៍​ថា “​ខ្ញុំ​គិតថា​ក្រោម​កាលៈទេសៈ​បែបនេះ វិធី​ល្អ​បំផុត​ដែល​ខ្ញុំ​អាច​ជួយ​បាន​នៅពេលនេះ​គឺ​ខ្ញុំ​ត្រូវ​ដើរ​ចេញ​ហើយ​ទុក​ឱ្យ​រដ្ឋាភិបាល​​វិលត្រឡប់​មក​គ្រប់គ្រង​វិញ​។ ការលាលែង​ពី​តំណែង​របស់​ខ្ញុំ​នឹង​ចូល​ជា​ធរមាន​ក្នុង​រយៈពេល ១៤ ថ្ងៃ​”​។​

​លោកខូ​ម៉ូ​នឹង​ប្រគល់​លិខិត​លាលែង​ពី​តំណែង​អភិបាលរដ្ឋ​ដែល​មាន​ប្រជាជន​ច្រើន​បំផុត​ទី​បួន​របស់​ប្រទេស​នេះ​ដល់​អភិបាលរង លោកស្រី ខា​ធី ហូ​ឈុល​ជា​អ្នកប្រជាធិបតេយ្យ​ម្នាក់​ដែល​នឹង​ក្លាយ​​ជា​អភិបាល​ស្រី​ដំបូងបង្អស់​របស់​ញូវយ៉ក​។​

​លោកខូ​ម៉ូ​បាន​បដិសេធ​ម្តង​ហើយ​ម្តងទៀត​នូវ​ការអះអាង​អំពី​ការ​បៀតបៀន​ផ្លូវភេទ​ដែល​សរសេរ​នៅក្នុង​របាយការណ៍​ព័ត៌មាន​ដ៏​កក្រើក​មួយ ដែល​ចេញផ្សាយ​កាលពី​សប្តាហ៍​មុន​ដោយ​ការិយាល័យ​របស់​អគ្គ​រដ្ឋអាជ្ញារដ្ឋ លោក​ឡេ​ធី​ធ្យា ជេ​មស៍​។​

​លោកខូ​ម៉ូ​និយាយថា “​របាយការណ៍​បាន​និយាយថា​ខ្ញុំ​បាន​បៀតបៀន​ផ្លូវ​ភេទស្ត្រី ១១ នាក់​។ នោះ​គឺជា​ចំណងជើង​ព័ត៌មាន​ដែល​មនុស្ស​បាន​ដឹងឮ​និង​មើលឃើញ​។ ប្រតិកម្ម​គឺ​ពោរពេញ​ដោយ​កំហឹង​។ ប្រតិកម្ម​គឺ​គួរតែ​បែប​នេះ​ឯង​។ ទោះយ៉ាងណា វា​ជា​រឿង​មិន​ពិត​ទេ​”​។

​ប៉ុន្តែ​គាត់​បាន​និយាយថា​គាត់​ចង់​សុំទោស​យ៉ាង​ជ្រាលជ្រៅ​ចំពោះ​ស្ត្រី​ណា​ដែល​អាច​រង​ការប្រមាថ​ដោយ​សកម្មភាព​របស់​គាត់​៕

​លោកខូ​ម៉ូ​ប្រកាស​លាលែង​ពី​តំណែង​អភិបាលរដ្ឋ​ញូវយ៉ក​កាលពី​ថ្ងៃ​អង្គារ