កម្លាំង​នគរបាល​ក្រុង​ប៉ោយប៉ែត ឃាត់ខ្លួន​ជនសង្ស័យ ៣ នាក់ ពាក់ព័ន្ធ​ការប្រើប្រាស់ និង​ជួញដូរ​គ្រឿងញៀន
​ដោយៈ ប​.​ជ័យ / បន្ទាយ​មាន​ជ័​យៈ កម្លាំង​នគរបាល ក្រុង​ប៉ោយប៉ែត បាន​ឃាត់ខ្លួន​ជនសង្ស័យ ប្រើប្រាស់ និង​ជួញដូរ​គ្រឿងញៀន ចំនួន ៣ នាក់ និង​រឹបអូស​កាំភ្លើង​កែ​ច្នែ រួមទាំង​កាំបិទ ជាច្រើន​ដើម រួច​បញ្ជូនទៅ ការិយាល័យ​ជំនាញ នៃ​ស្នងការដ្ឋាន​នគរបាល​ខេត្ត ចាត់ការ​បន្ត នៅ​រសៀល ថ្ងៃទី​១២ ខែសីហា ឆ្នាំ​២០២១​។​

​លោក​វរសេនីយ៍ឯក សៅ សារឿន អធិការនគរបាល ក្រុង​ប៉ោយប៉ែត បានអោយដឹងថាៈ ជាការ​ទទួលខុសត្រូវ ចំពោះ​ភារកិច្ច និង​អនុវត្ត​បទបញ្ជា​លោក ឧ​ត្ត​ម​សេនីយ៍​ទោ សិទ្ធិ ឡោះ ស្នងការ​នគរបាល ខេត្តបន្ទាយមានជ័យ កម្លាំង​ជំនាញ​គ្រឿងញៀន នៃ​អធិការដ្ឋាន​នគរបាល ក្រុង​ប៉ោយប៉ែត សហការ​ជាមួយ កម្លាំង​ប៉ុស្តិ៍នគរបាល រដ្ឋបាល​និមិត្ត រួមទាំង​មន្ត្រី​អាជ្ញាធរ​សង្កាត់ ចុះបង្ក្រាប​ករណី​ជួញដូរ និង​ប្រើប្រាស់​គ្រឿងញៀន មួយ​ករណី ដោយបាន​ឃាត់ខ្លួន​ជនសង្ស័យ បាន​ចំនួន ៣ នាក់​។​

​ជនសង្ស័យ​ទាំង ៣ នាក់​នោះ រួមមាន​៖ ១.​ឈ្មោះ ភិន ចាន់​រ៉ា ភេទ​ប្រុស អាយុ ១៦​ឆ្នាំ , ២.​ឈ្មោះ ហ៊ាង សុខ​ហឿន ភេទ​ប្រុស អាយុ​៣៦ ឆ្នាំ​។ តាម​ចម្លើយសារភាព​ជនសង្ស័យ ទាំង ២ នាក់​នេះ សមត្ថកិច្ច បាន​បន្ត​ឃាត់ខ្លួន​ជនសង្ស័យ​ម្នាក់ទៀត ឈ្មោះ ហេង ចំណង់ ហៅ អេ​វ ភេទ​ប្រុស អាយុ​២៧​ឆ្នាំ ។ ជនសង្ស័យ ទាំងបី​នាក់ មាន​ទីលំនៅ សង្កាត់​និមិត្ត ក្រុង​ប៉ោយប៉ែត ខេត្តបន្ទាយមានជ័យ​។

​ក្រោយពេល​ឃាត់ខ្លួន សមត្ថកិច្ច បាន​ដកហូត​វត្ថុតាង រូ​ម​មាន ម្សៅ​ក្រាម ពណ៌​ស​ថ្លា (​សង្ស័យ​សារធាតុ​ញៀន​) ចំនួន ៦ កូន​ថង់​តូច​, បំពង់​កែវ​១, បំពង់​ចូក​គ្រឿងញៀន ចំនួន​១ កាំភ្លើង​កែឆ្នៃ​ប៊ិច​១, គ្រាប់​២​គ្រាប់ (​គ្រាប់ AK ១​គ្រាប់​) កាំបិត ៤ ដើម​, ម្សៅ​ម៉ត់ ស លាយ​ជាមួយ កំទេច​ថ្នាំ ពណ៌​ផ្កាឈូក ១ កូន​ថង់​តូច​, ដង​កាំភ្លើង​ស្នប់​កែច្នៃ ៣ ដើម​, សំបក​ថង់​មួយចំនួន និង​ទូរស័ព្ទ ១ គ្រឿង​។​

​ជនសង្ស័យ​ខាងលើនេះ ត្រូវបាន​ឃាត់ខ្លួន នៅ​ថ្ងៃទី​១១ ខែសីហា ឆ្នាំ​២០២១ នៅ​ចំណុច​ខ្ទម ១ កន្លែង ស្ថិតក្នុង​ភូមិ​ដុង​អារញ្ញ សង្កាត់​និមិត្ត ក្រុង​ប៉ោយប៉ែត ខេត្តបន្ទាយមានជ័យ ។​

​បន្ទាប់ពី​ឃាត់ខ្លួន បាន​យកទៅ​ធ្វើ​សំណាក​បឋម ស្វែងរក​ជម្ងឺ​កូ​វីដ​-១៩ នៅ​មន្ទីរពេទ្យបង្អែក ប៉ោយប៉ែត (​ដី​ថ្មី​)​លទ្ធផល​អវិជ្ជមាន (-) ក៏​បន្ត​នាំខ្លួន មក​ផ្នែក​ជំនាញ ធ្វើតេស្ត​ស្វែងរក​សារធាតុ​ញៀន ក្នុង​ទឹកនោម ឃើញ​វិជ្ជមាន (+) ក៏​កសាង​សំណុំរឿង បញ្ជូនទៅ ការិយាល័យ​ជំនាញ នៃ​ស្នងការដ្ឋាន នគរបាល​ខេត្ត ដើម្បី​ចាត់ការ​បន្ត​៕/V​