ដោយៈមុនីរ័ត្ន/​ភ្នំពេញៈ លោក មាស សុ​ភ័​ណ្ឌ អ្នកនាំពាក្យក្រសួងព័ត៌មានបានប្រាប់រស្មីកម្ពុជានៅ​ព្រឹក​ថ្ងៃទី​១៣​ខែសីហា នេះ​ថា ​ការលើក​​ឡើង​របស់​អង្គការ​សង្គម​ស៊ីវិល​មួយចំនួន​តូច​ដែល​បង្ហាញ​អំពី​ការព្រួយបារម្ភ​ចំពោះ​ការបង្កើតគណៈកម្មការ​តាមដាន​វាយតម្លៃ​និង​លើកសរសើរ​ការអនុវត្ត​ក្រមសីលធម៌​វិជ្ជាជីវៈ​សារព័ត៌មាន​ដែល​ក្រសួង​ព័ត៌មាន​ទើបតែ​បង្កើតឡើង​កាលពីពេល​ថ្មីៗ​នេះ គឺជាការ​ព្រួយបារម្ភ​ដែល​មិនបាន​យល់ច្បាស់​និង​គ្រប់​ជ្រុងជ្រោយ​អំពី​តួនាទី​ភារកិច្ច​របស់គណៈកម្មការ​ដែលបង្កើតឡើងនេះ។​


លោក មាស សុ​ភ័​ណ្ឌ អ្នកនាំពាក្យក្រសួងព័ត៌មាន(រូបថតឯកសារ)

​លោកបានពន្យល់ថា ការព្រួយបារម្ភ​​នេះ​គឺ​គ្រាន់​តែមាន​ចេតនា​នៅក្នុង​ការញុះញង់​ទៅដល់​អ្នក​ប្រកប​វិជ្ជាជីវៈ​ព័ត៌មាន​នៅក្នុង​ព្រះរាជាណាចក្រ​កម្ពុជា​មិន​ឲ្យ​អនុវត្ត​តួនាទី​ភារកិច្ច​របស់ខ្លួន​ឲ្យ​បាន​ត្រឹម​ត្រូវ​ទៅតាម​ក្រមសីលធម៌​វិជ្ជាជីវៈ​ដែលមាន​ចែង​នៅក្នុង​ច្បាប់ ក៏ដូចជា​លិខិតបទដ្ឋាន​គតិយុត្ត​ដែលមាន​ជា​ធរមាន និង​ហាក់ដូច​ជាមាន​ចេតនា​ចង់​លើក​តឹក​ចិត្ត​ឲ្យ​អ្នកសារព័ត៌មាន​បំពេញ​វិជ្ជាជីវៈ​របស់ខ្លួន​ដោយ​ខ្វះ​ក្រមសីលធម៌​ទៅវិញ​។​

​លោក​បាន​បញ្ជាក់ថា គណៈកម្មការ​តាមដាន វាយតម្លៃ​និង​លើកសរសើរ​ការអនុវត្ត​ក្រមសីលធម៌​វិជ្ជាជីវៈសារព័ត៌មាន​បង្កើតឡើង​ក្នុង​គោលបំណង​ដើម្បី​លើកស្ទួយ​នូវ​កិត្តិយស សេចក្តីថ្លៃថ្នូរ និង​កិត្យានុភាព​របស់​អ្នកសារព័ត៌មាន ក៏ដូចជា​អង្គភាព​សារព័ត៌មាន​ព្រមទាំង​តម្រង់ទិស​ដល់​អ្នកសារព័ត៌មាន​ក៏ដូចជា​អង្គភាព​សារព័ត៌មាន​ឲ្យ​អនុវត្ត​តួនាទី​របស់ខ្លួន​ឲ្យ​បាន​ត្រឹមត្រូវ​ទៅតាម​ក្រមសីលធម៌​វិជ្ជាជីវៈ​ជា​អ្នកសារព័ត៌មាន​។​មិនមែន​បង្កើតឡើង​ដើម្បី​យក​អ្នកសារព័ត៌មាន​ជា​គោលដៅ​ដើម្បី​ធ្វើការ​តាមដាន​បំភិតបំភ័យ​ដាក់​សំពាធ ឬ​បំបិទ​សិទ្ធិ​សរី​ភាព​ខាង​សារព័ត៌មាន​នោះទេ​។​

​អ្នកនាំពាក្យ​បានបន្ថែមថាដោយ​ឈរលើ​ស្មារតី​លើ​កម្ពស់​សិទ្ធិសេរីភាព​ខាង​សារព័ត៌មាន​ការការពា​រ​ផលប្រយោជន៍ ចំពោះ​អ្នកសារព័ត៌មាន ទើប​ក្រសួង​ព័ត៌មាន​បង្កើត​គណៈកម្មកា​រ​នេះ​ឡើង ដោយ​ឲ្យ​មានការ​ចូលរួម​ពី​សហព័ន្ធ សមាគម និង ក្លិប​សារព័ត៌មាន​មួយចំនួន​ចូលរួម​នៅក្នុង​គណៈកម្មការ​នេះ​ដើម្បី​ផ្តល់​មតិយោបល់​ក្នុងការ​វាយតម្លៃ​ទៅលើ​ការអនុវត្ត ក្រមសីលធម៌​វិជ្ជាជីវៈ​ជា​អ្នកសារព័ត៌មាន​នៅក្នុង​ព្រះរាជាណាចក្រ​កម្ពុជា ដែល​កន្លងមក​ការអនុវត្ត​វិធានការ​ការវាយតម្លៃ ផ្សេងៗ​ពាក់ព័ន្ធ​ទៅនឹង​ការប្រកប​វិជ្ជាជីវៈ​សារព័ត៌មាន​គឺជា​សិទ្ធិផ្តាច់មុខ​របស់​ក្រសួង​ព័ត៌មាន​ប៉ុន្តែ​ដោយ​ឈរលើ​ស្មារតី​នៃ​កា​រលើ​កម្ពស់​សិទ្ធិ​សរី​ភាព​ខាង​សារព័ត៌មាន​ក៏ដូចជា​គិត​ផលប្រយោជន៍​ដល់​អ្នកសារព័ត៌មាន​ទើប​ក្រសួង​ព័ត៌មាន​បង្កើត​នូវ​គណៈកម្មការ​នេះ​ឡើង​ដើម្បី​ឲ្យ​មានការ​ចូលរួម​ពី​សមាសភាព​តំណាង​សហព័ន្ធ សមាគម ក៏ដូចជា​ក្លិប​សារព័ត៌មាន​ចូលរួម ពិនិត្យ​និង​វាយតម្លៃ​ទៅលើ​ការអនុវត្ត​ក្រមសីលធម៌​វិជ្ជាជីវៈ​នេះ​។

​លោក សុភ័ណ្ឌ បញ្ជាក់ថា ដូច្នេះ​តាមរយៈ​យន្តការ​នេះ​យើង​មិនអាច​ចាត់ទុកថា​ជា​យន្ត​ការដែល​បង្កើតឡើង​ដើម្បី​ដាក់​សម្ពាធ​បំភិតបំភ័យ​ឬ​តាមដាន​អ្នកសារព័ត៌មាន​ដូចជា​ការលើកឡើង​របស់​អង្គការ​សង្គម​ស៊ីវិល​មួយចំនួន​តូច​នោះទេ​៕សរន