ដោយៈ រ៉ា​ម៉ន / ភ្នំពេញៈ រដ្ឋបាល​រាជធានី​ភ្នំពេញ នៅ​ថ្ងៃទី​១៣ ខែសីហា ឆ្នាំ​២០២១ នេះ បានសម្រេច បិទ​ខ្ទប់ កំណាត់​ផ្លូវ​លេខ ៣៥ នៅ​ភូមិ​ព្រែក​តា​ឡុង​២ សង្កាត់​ចាក់អង្រែ​ក្រោម ខណ្ឌមានជ័យ ដែល​ឆ្លង​រាលដាល វីរុស​កូ​វីដ​១៩ បំប្លែង​ថ្មី Delta​។​

​សេចក្តីសម្រេច​របស់ រដ្ឋបាល​រាជធានី​ភ្នំពេញ បានបញ្ជាក់​យ៉ាង​ដូច្នេះ​ថាៈ «​ត្រូវបាន​ការបិទ​ខ្ទប់ មិនឱ្យ​មានការ​ចេញ​-​ចូល ចំពោះ​កំណាត់​ផ្លូវ​លេខ ៣៥ ក្រុម​១៧ ភូមិ​ព្រែក​តា​ឡុង​២ សង្កាត់​ចាក់អង្រែ ក្រោម ខណ្ឌមានជ័យ ដែលមាន​ការឆ្លង​រាលដាល នៃ​មេរោគ​បំប្លែង​ខ្លួន​ថ្មី ប្រភេទ​ដែល​តា (Delta) សម្រាប់​រយៈពេល ១៤ ថ្ងៃ ចាប់ពី​ម៉ោង​សូន្យ ថ្ងៃទី​១៣ ដល់ ថ្ងៃទី​២៦ ខែសីហា ឆ្នាំ​២០២១ ដើម្បី​ទប់ស្កាត់ ការឆ្លង​រាលដាល នូវ​មេរោគ​បំប្លែង​ខ្លួន​ថ្មី ប្រភេទ​ដែល​តា (Delta) នៅក្នុង​សហគមន៍​»​។​

​រដ្ឋបាល​រាជធានី​ភ្នំពេញ បាន​បន្ថែមថាៈ ក្នុងអំឡុងពេល នៃ​ការអនុវត្ត​វិធាន​ការបិទ​ខ្ទប់ ត្រូវបាន​ហាមឃាត់ រាល់​ការចេញ​-​ចូល និង​រាល់​ការជួបជុំ​ឬ ការប្រមូលផ្តុំ​មនុស្ស ក្នុង​ទីតាំង​ខាងលើ លើកលែងតែ​ករណី​ចំ​បាច់ ដូចខាងក្រោម ៖
​ការចេញ​-​ចូល ដោយ​មូលហេតុ​សុខភាព​បន្ទាន់​។​
​ការចេញ​-​ចូល ដើម្បី​ផ្តល់​វត្ថុ​សំណាក ធ្វើតេស្ត​រក​ជំងឺ​កូ​វីដ​-១៩ តាម​ការណែនាំ របស់​អាជ្ញាធរ​មូលដ្ឋាន​។​
​ការវិលត្រឡប់​ទៅ​លំនៅឋាន ឬ ទី​សំណាក់​របស់ខ្លួន​វិញ​របស់​បុគ្គល ដែល​បានបញ្ចប់​ការធ្វើ​ប​ត្តា​ឡី​ស័ក និង​អ្នកជំងឺ​ចេញពី​មន្ទីរពេទ្យ ឬ កន្លែង​សម្រាក​ព្យាបាល ចូលក្នុង​ទីតាំង​បិទ​ខ្ទប់ ដោយ​មានការ​សម្រប សម្រួល របស់​អាជ្ញា​ធរមាន​ស​ម​ត្ថ​កិច្ច​។​
​ការចេញ​-​ចូល និង​ការជួបជុំ​របស់ បុគ្គលិក​សុខាភិបាល និង​អាជ្ញា​ធរមាន​សមត្ថកិច្ច ដើម្បី​អនុវត្ត​វិធានការ សុខាភិបាល ក្នុងការ​ស្រាវជ្រាវ ទប់ស្កាត់ និង​កាត់ផ្ដាច់​ការឆ្លង​រាលដាល នូវ​មេរោគ​បំប្លែង​ខ្លួន​ថ្មី ប្រភេទ​ដែល​តា (Delta) នៅក្នុង​សហគមន៍​។​
​ការចេញ​-​ចូល និង​ការជួបជុំ​របស់ អាជ្ញា​ធរមាន​សមត្ថកិច្ច ដើម្បី​ផ្គត់​ផ្គត់​គ្រឿង ឧបភោគ​-​បរិភោគ ចាំបាច់ ក្នុងអំឡុងពេល​បិទ​ខ្ទប់​។​
​ការចេញ​-​ចូល និង​ការជួបជុំ​របស់ អាជ្ញា​ធរមាន​សមត្ថកិច្ច និង​កម្លាំង​គណៈបញ្ជាកា​រ​ឯកភាព រដ្ឋបាល​គ្រប់លំដាប់​ថ្នាក់ ក្នុងការ​បំពេញការងា​រ ថែរក្សា​សន្តិសុខ សណ្តាប់ធ្នាប់ និង​របៀបរៀបរយ សាធារណៈ​។​

​សេចក្តីសម្រេច​ដដែល បានបញ្ជាក់​ថាៈ រាល់​ការចេញ​-​ចូល និង​ការជួបជុំ ឬ ការប្រមូលផ្តុំ​មនុស្ស ដែល​ត្រូវបាន​លើកលែង ខាងលើនេះ ត្រូវអនុវត្ត វិធានការ​សុវត្ថិភាព ផ្នែក​សុខាភិបាល ឱ្យបាន​ម៉ឺងម៉ាត់ ជាអាទិ៍ កាតព្វកិច្ច​ពាក់​ម៉ាស កាតព្វកិច្ច​រក្សា​គម្លាត​សុវត្ថិភាព ការធ្វើ​អនាម័យ ដើម្បី​សម្លាប់​មេរោគ ការ​វាស់​កម្តៅ និង​ត្រូវអនុវត្ត តាម​ការណែនាំ​របស់ ក្រសួងសុខាភិបាល ជាពិសេស​ត្រូវ​ប្រកាន់ខ្ជាប់ ជានិច្ច​នូវ​វិធានការ «៣ ការពារ និង ៣ កុំ​» របស់ សម្តេច​តេ​ជោ ហ៊ុន សែន​នាយករដ្ឋមន្ត្រី​នៃ​កម្ពុជា​។​

​ជាមួយគ្នានេះ រដ្ឋបាល​រាជធានី​ភ្នំពេញ បានប្រគល់​ភារកិច្ច ជូន​រដ្ឋបាល​ខណ្ឌមានជ័យ ដើម្បី​បង្កើត ក្រុមការងារ​ប្រចាំការ នៅ​ទីតាំង ដែល​ត្រូវ​បិទ​ខ្ទប់ ក្នុងនោះ ក្រៅពី​ភារកិច្ច​អនុវត្ត វិធានការ​រដ្ឋបាល ក្នុង​ការបិទ​ខ្ទប់ ត្រូវបំពេញ​ការងារ អាទិភាព ជាអាទិ៍​៖ ការងារ​ផ្នែក​សន្តិសុខ និង​សណ្តាប់ធ្នាប់​សាធារណៈ​។​
​ការងារ​ផ្គត់ផ្គង់​គ្រឿងឧបភោគ​-​បរិភោគ​ចាំបាច់ ជូន​ប្រជាពលរដ្ឋ ដែលមាន​ការខ្វះខាត ក្នុង​ទីតាំង​បិទ​ខ្ទប់​។​
​ការងារ​ទាក់ទង​នឹង​ការអនុវត្ត វិធានការ​សុខាភិបាល និង​ការផ្តល់សេវា សុខាភិបាល​ទូទៅ​៕/V​