​ប្រែ​សម្រួល : កញ្ញា​ដា​លី​ស (​បាងកក​ប៉ុស្តិ៍​) ៖ ថ្នាក់ដឹកនាំ​ក្រុមហ៊ុន Samsung Group ត្រូវបាន​លើកលែង​ទោស​ឱ្យ​មាន​សេរីភាព​នៅ​ថ្ងៃ​សុក្រ​នេះ​ដែល​ជា​ឧទាហរណ៍​ចុងក្រោយ​បំផុត​​នៃ​ប្រពៃណី​ដោះលែង​មេដឹកនាំ​ធុរកិច្ច​ដែល​ជាប់​ពន្ធនាគារ​ដោយសារ​អំពើ​ពុករលួយ​ឬ​ការ​គេច​ពន្ធ​ដោយយោង​លើ​ហេតុផល​សេដ្ឋកិច្ច​។​

​លោក លី ជេ​យ៉ុង ជា​អ្នក​មាន​បំផុត​ទី ២០២ នៅលើ​ពិភពលោក​យោង​តាម​ទស្សនា​វ​ដ្តី Forbes ជាមួយ​ទ្រព្យសម្បត្តិ​សរុប​ចំនួន ១១,៤ ពាន់​លាន​ដុល្លារ​។​លោក​បាន​បំពេញ​ការ​ជាប់ពន្ធនាគា​រ​​រយៈពេល​ពីរ​ឆ្នាំ​កន្លះ​ពី​បទ​សូកប៉ាន់ កេង​បន្លំ និង​បទល្មើស​ផ្សេង​ទៀត​ទាក់ទង​នឹង​រឿង​អាស្រូវ​ពុករលួយ ដែល​បាន​ទាញ់​ទម្លាក់​អតីត​ប្រធានាធិបតី​កូរ៉េខាងត្បូង​លោកស្រី ប៉ាក គុន​ហេ​ឱ្យ​​ធ្លាក់​ពី​តំណែង​។​

​ប៉ុន្តែ​ការអំពាវនាវ​ឱ្យ​ដោះលែង​រូប​លោក​ឱ្យបាន​ឆាប់​ពី​សំណាក់​ក្រុម​អ្នកនយោបាយ​និង​ក្រុម​មេដឹកនាំ​ជំនួញ​បាន​កើន​ឡើង​ក្នុង​រយៈពេល​ប៉ុន្មាន​ខែ​ចុងក្រោយ​នេះ​ជុំវិញ​អ្វី​ដែល​ពួកគេ​អះអាង​​ថា​ជា​កង្វះ​ការដឹកនាំ​នៅក្នុង​ក្រុមហ៊ុន​ធំ​បំផុត​របស់​កូរ៉េខាងត្បូង​។​

​ក្រសួង​យុត្តិធម៌​បាន​ប្រកាស​កាលពី​ថ្ងៃ​ចន្ទ​ថា គាត់​ត្រូវបាន​លើកលែង​ទោស​ក្នុងចំណោម​អ្នកទោស​ប្រហែល ៨០០ នាក់​ដោយ​លើកឡើង​ពី​ការព្រួយបារម្ភ​អំពី​ផលប៉ះពាល់​នៃ​ជំងឺ​រាតត្បាត​​មក​លើ​សេដ្ឋកិច្ច​។​

​លោក​លី​អាយុ ៥៣ ឆ្នាំ​បាន​ឱនក្បាល​គោរព​ដល់​អ្នកយកព័ត៌មាន​ដែល​កំពុង​រង់ចាំ​នៅ​ខាងក្រៅ​មណ្ឌល​ឃុំឃាំង​មួយ​នៅ​ភាគខាងត្បូង​ទីក្រុង​សេ​អ៊ូ​ល ហើយ​ប្រាប់​ពួកគេ​ថា​”​ខ្ញុំ​បាន​បង្ក​ការ​​ព្រួយបារម្ភ​ច្រើន​ដល់​ប្រជាជន ខ្ញុំ​ពិតជា​សុំទោស​”​។​

​ដោយ​ស្លៀកពាក់​ឈុតខ្មៅ គាត់​បាន​បន្ថែមថា “​ខ្ញុំ​នឹង​ស្តាប់​ដោយ​យកចិត្តទុកដាក់​ចំពោះ​កង្វល់ ការរិះគន់ ការបារម្ភ និង​ការរំពឹងទុក​ខ្ពស់​របស់​អ្នក​អំពីខ្ញុំ​”​មុន​ពេល​គាត់​ឡើង​ជិះ​ឡាន​​ពណ៌​ខ្មៅ​ចេញ​ទៅ​បាត់​។​

​លោក​លី​ដំបូង​ឡើយ​ត្រូវបាន​កាត់ទោស​ជាប់​ពន្ធនាគារ​រយៈពេល ៥ ឆ្នាំ​កាល​ពី​ឆ្នាំ ២០១៧ បន្ទាប់​ពី​លោកស្រី​ប៉ាក​ត្រូវ​បាន​បណ្តេញចេញ​ពី​អំណាច ហើយ​នៅ​ឆ្នាំ​បន្ទាប់​គាត់​បាន​ដើរហើរ​ដោយ​សេរី នៅពេល​សាលាឧទ្ធរណ៍​បាន​ច្រាន​ចោល​ការផ្តន្ទាទោស​គាត់​ពី​បទ​សូកប៉ាន់ ហើយ​បាន​ផ្តល់​ការព្យួរទោស​ដល់​គាត់​។​

​ប៉ុន្តែ​ក្រោយមក​តុលាការ​កំពូល​បាន​បញ្ជា​ឱ្យ​លោក​លី​ប្រឈម​មុខ​នឹង​ការកាត់ក្តី​ឡើងវិញ ដែល​បាន​ផ្តន្ទាទោស​និង​ដាក់គុក​គាត់​ម្តងទៀត​។​

​ទោះយ៉ាងណា លោក​លី​នៅ​ត្រូវ​ឡើង​សវនាការ​ជំនុំជម្រះ​លើ​ការចោទប្រកាន់​ពី​បទ​បន្លំ​ភាគហ៊ុន ដែល​បាន​ដកហូត​សិទ្ធិ​របស់​គាត់​សឹង​ទាំងអស់​ក្នុង​ការគ្រប់គ្រង​ក្រុមហ៊ុន​គ្រួសារ​មួយ​នេះ​៕

​លោក លី ជេ​យ៉ុង ត្រូវបាន​លើកលែង​ទោស​ឱ្យ​មាន​សេរីភាព​នៅ​ថ្ងៃ​សុក្រ​នេះ​