​ដោយៈ ស​រិ​ទ្ធ / ភ្នំពេញៈ មនុស្ស​ចំនួន ៦៥ នាក់​ទៀត ត្រូវបាន​ក្រសួងសុខាភិបាល រាយការណ៍ កាលពី​ថ្ងៃទី​១៣ សីហា​ថា បាន​ឆ្លង​កូ​វីដ ១៩ បំប្លែង​ថ្មី ប្រភេទ ដែល​តា​។ តាម​អត្តសញ្ញាណ​ជនរងគ្រោះ ក៏មាន​បុគ្គលិក​សុខាភិបាល ៥ នាក់ ដែល​តេស្ត​មាន​វិជ្ជមាន​កូ​វីដ ១៩ ដែល​តាម​ប្រភព មកពី​ឥណ្ឌា​នេះ​ផងដែរ​។​

​ខណៈដែល​មេរោគ​កាច​សាហាវ ដែល​តា បាន​បន្ត​រាតត្បាត ដល់ ២២ រាជធានី ខេត្ត ក្រសួងសុខាភិបាល បាន​ក្រើនរំលឹក ឲ្យ​ប្រជាពលរដ្ឋ បង្កើន​ការប្រុងប្រយ័ត្ន កុំ​ភ្លេចខ្លួន​ឲ្យ​សោះ​។​

​គួរ​បញ្ជាក់ថា បុគ្គលិក​សុខាភិបាល ទាំង ៥ នាក់ ដែល​ក្រសួង រាយការណ៍​ឆ្លង ដែល​តា មាន​ម្នាក់ ជា​បុគ្គលិក​ផ្នែកអនាម័យ នៅ​មន្ទីរពេទ្យ​ជ័យ​វរ្ម័នទី​៧ ម្នាក់​ជា​បុគ្គលិក សុខាភិបាល​ខេត្ត​ឧ​ត្ត​រ​មានជ័យ និង​ខេត្តបន្ទាយមានជ័យ ចំនួន ៣ នាក់​។​

​គិត​ចាប់ពី​ថ្ងៃទី ៣១ ខែមីនា រហូតដល់​ថ្ងៃទី ១៣ ខែសីហា ឆ្នាំ ២០២១ កម្ពុជា​បាន​រកឃើញ អ្នក​វិជ្ជមាន​វីរុស​កូ​វីដ​១៩ ប្រភេទ ដែល​តា​(Delta) លើ​ពលករ​ត្រឡប់ មកពី​ប្រទេស​ថៃ និង​ប្រទេស វៀតណាម អ្នកដំណើរ​មក​តាម ជើងហោះហើរ បុគ្គលិក​សុខាភិបាល មន្ត្រីរាជការ និង​អ្នកភូមិ នៅក្នុង​សហគមន៍ សរុប​ទាំងអស់ ចំនួន ៤៩៤ នាក់ ស្រី ២៤៣ នាក់ និង​បាន​ប៉ះពាល់​ដល់ ២២ រាជធានី ខេត្ត លើកលែងតែ​ខេត្ត ៣ ប៉ុណ្ណោះ គឺ​ខេត្ត​កែប ខេត្តតាកែវ និង​ខេត្តក្រចេះ នៅ​មិនទាន់​រកឃើញ ករណី​ដែល​តា​។​

​ក្រសួងសុខាភិបាល បានបញ្ជាក់​ថាៈ វីរុស​ដែល​តា (Delta) កំពុង​បន្ត​រា​ត្បា​ត វាយលុក​ចូល ក្នុង​សហគមន៍ ជាពិសេស ខេត្ត​ឧ​ត្ត​រ​មានជ័យ រាជធានី​ភ្នំពេញ សៀមរាប ព្រះវិហារ កំពង់ចាម កំពង់ធំ និង​បណ្ដា​ខេត្ត មួយចំនួនទៀត​៕/V