ដោយៈ ប​.​ជ័យ / បន្ទាយ​មាន​ជ័​យៈ ផ្សារ​សិរីសោភ័ណ ស្ថិតនៅ​សង្កាត់​ព្រះ​ពន្លា ជា​ផ្សារ​រដ្ឋ​ធំ​បង្អស់​ទី​២ នៅ​ក្រុង​សិរីសោភ័ណ ត្រូវ​បិទ​ខ្ទប់​ដែរ ខណៈ​ផ្សារ​រដ្ឋ​ធំ​បង្អស់​ទី​១ គឺ​ផ្សារ​ចម្ការ​គ ស្ថិតនៅ​សង្កាត់​កំពង់ស្វាយ មិនទាន់​បើក​ឡើងវិញ​ផង​នោះ ។ បន្ថែម​លើ​នោះ អ្នក​នៅ​ខាងក្រៅ​ផ្សារ តែ​ស្ថិតក្នុង​ក្រុង​ជាង ៨០ នាក់ យក​សំណាក បាន​រកឃើញ​វិជ្ជមាន​កូ​វីដ​១៩ ពាក់កណ្តាល ។​

​លោក ហឹ​ុ​ល រ៉ា​យ៉ា អភិបាលក្រុង​សិរីសោភ័ណ បានអោយដឹង នៅ​ថ្ងៃទី​១៤ ខែសីហា​ថាៈ ក្នុង​ផ្សារ​សិរីសោភ័ណ​នេះ មាន​ករណី​អ្នក​វិជ្ជមាន​កូ​វីដ ១៩ ដោយ​ក្នុងនោះ មាន​ការជាប់​ពាក់ព័ន្ធ​ផ្ទាល់ ប្រយោល សង្ស័យ​ជាច្រើន ពី​ព្រឹក​ថ្ងៃទី​១៤ សីហា ២០២១ មកទល់​ល្ងាច​ថ្ងៃ​ដដែល​នេះ ។​

​លោក​បាន​បន្តថាៈ គិត​ត្រឹម​ល្ងាច​នេះ មាន​អាជីវករ និង​អ្នកពាក់ព័ន្ធ ប្រមាណ​ជាង ៥០០ នាក់ ត្រូវបាន​យក​សំណាក ដោយ​គ្រូពេទ្យ​ជួរមុខ នៃ​មន្ទីរ​សុខាភិបាល​ខេត្ត ក្នុងនោះ រកឃើញ​វិជ្ជមាន ចំនួន​តែ ២២ នាក់​នៅឡើយ​។​

​ប៉ុន្តែ​លោក ហឹ​ុ​ល រ៉ា​យ៉ា បាន​សម្តែង​ក្តីបារម្ភ​ថាៈ នៅ​ថ្ងៃទី​១៤ ខែសីហា ដដែល​នេះ អ្នក​នៅ​ក្រៅពី​ផ្សារ សិរីសោភ័ណ​នេះ ដែល​ទៅអោយ​គ្រូពេទ្យ​ជួរមុខ នៃ​មន្ទីរពេទ្យបង្អែក ក្រុ​ុ​ង​សិរីសោភ័ណ នៅ​មណ្ឌល សាលាបឋមសិក្សា​សូ​ភី យក​សំណាក​ធ្វើតេស្ត ចំនួន ៨៥ រកឃើញ​វិជ្ជមាន​កូ​វីដ​១៩ ចំនួន ៤៤ នាក់ ឯណោះ ។​

​ចំណែក​លោក​អ៊ុំ រាត្រី អភិបាលខេត្ត​បន្ទាយមានជ័យ បានអោយដឹង នៅ​ថ្ងៃទី​១៤ សីហា ដែរ​ថាៈ ក្រុមការងារ​ចម្រុះ គ្រូពេទ្យ បាន​បន្តធ្វើ​ការពិនិត្យ យក​សំណាក​អាជីវករ និង​អ្នកពាក់ព័ន្ធ​ទាំងអស់ នៃ​ផ្សារ​នេះ នៅ​ទីតាំង​ផ្សារ​សិរីសោភ័ណ ផ្នែក​ខាងកើត ហើយ​បាន​រកឃើញ មាន​អ្នក​វិជ្ជមាន​ជា​បន្ត ។​
​ដូច្នេះ​ផ្សារ ត្រូវបាន​បិទ​ខ្ទប់ ជា​បណ្តោះអាសន្ន​។ ពោលគឺ​ផ្សារ​នេះ ត្រូវ​បិទ​ខ្ទប់​ដែរ បន្ទាប់ពី​ផ្សារ​ចម្ការ​គ ជា​ផ្សារ​រដ្ឋ​ធំ​បង្អស់​ទី​១ នៅ​ក្រុង​សិរីសោភ័ណ បាន​បិទ​ខ្ទប់ កាលពី​ថ្ងៃទី​២ ខែសីហា ឆ្នាំ​២០២១ ដោយ​រកឃើញ​អ្នក​វិជ្ជមាន​ជិត ៤០ នាក់ ។​

​ដូច្នេះ​ដើម្បី​ទប់ស្កាត់ នៃ​ការរីក​រាលដាល នៃ​ជំងឺ​កូ​វីដ​១៩ ក្នុងនាម​គណៈកម្មការ​ខេត្ត ប្រយុទ្ធ​នឹង​ជំងឺ​កូ​វីដ ១៩ សូមអោយ​អាជីវករ និង​អ្នកពាក់ព័ន្ធ ត្រូវធ្វើ​ច​ត្តា​ឡី​ស័ក​នៅតាម​ផ្ទះ និង​អ្នក​វិជ្ជមាន ត្រូវ​ព្យាបាល​នៅតាម​ផ្ទះ ឬ​នៅ​មណ្ឌល / ម​ន្ទូ​ី​ររ​ពេទ្យ ព្យាបាល​អោយបាន​ត្រឹមត្រូវ និង​គោរព​វិធានការ សុខាភិបាល ៣​ការពារ និង​៣​កុំ ស្តាប់​តាម​ការណែនាំ ការផ្សព្វផ្សាយ​អាជ្ញាធរ​មូលដ្ឋាន កងកម្លាំង​មាន​សមត្ថកិច្ច រួមគ្នា​ដើម្បី ទប់ស្កាត់​ការចម្លង​៕/V​