​ប្រែ​សម្រួលៈ​វាសនា​/​គូ​ឡា​ឡាំ​ពួរ​៖​នាយករដ្ឋមន្ត្រី​ម៉ាឡេស៊ី លោកមូ​យីត​ឌីន យ៉ាស​ស៊ីន នឹង​ដាក់​ពាក្យសុំ​លាឈប់​ពី​តំណែង​ទៅកាន់​ព្រះមហាក្សត្រ​នៅ​ថ្ងៃ​ចន្ទ​ទី​១៦​សីហា នេះ​បើ​តាម​ការផ្សាយ​របស់​​សារព័ត៌មាន​Malaysiakini​ដែល​យោង​តាម​សម្តី​របស់​រដ្ឋមន្ត្រី​ការិយាល័យ​នាយករដ្ឋមន្ត្រី​។​

​លោក​រដ្ឋមន្ត្រី ដា​ទុក សេរី ម៉ូ រ៉េត​ហ្សួ​ន បាន​និយាយថា លោកនាយក​រដ្ឋមន្ត្រី​ប្រកាស​ការសំរេច​របស់​លោក​នៅ​ពេល​លោក​ជួប​សមាជិកសភា​មក​ពី​គណបក្ស​Parti Pribumi Bersatu Malaysia​របស់​លោក​នៅ​ព្រឹក​ថ្ងៃអាទិត្យ​។​«​យើង​ទើប​បញ្ចប់​កិច្ចប្រជុំ ហើយ​នឹង​មាន​កិច្ចប្រជុំ​គណៈរដ្ឋមន្ត្រី​ពិសេស​មួយ​។​បន្ទាប់ពីនោះ លោក​នឹង​ទៅកាន់​វាំង​ដើម្បី​សុំ​លាឈប់​»​។​

​តាមពិត​លោកមូ​យីត​ឌីន យ៉ាស​ស៊ីន គ្រោង​ចូលគាល់​ស្តេច​នៅ​រសៀល​ថ្ងៃ​ចន្ទ ពេល​ដែល​ព្រះមហាក្សត្រ​ត្រូវ​គេ​រំពឹងថា​នឹង​គាបសង្កត់​អោយ​លោកមូ​យីត​ឌីន​រៀបចំ​ធ្វើ​ការបោះឆ្នោត​សម្តែង​ការទុក​​ចិត្ត​រដ្ឋាភិបាល​នៅ​សភា​ជា​បន្ទាន់ ឬ​ក៏​ចុះ​ចេញពី​តំណែង​។​

​លោកមូ​យីត​ឌីន​ដំបូង​រង់ចាំ​អ៊ុត​មើល​សម្លេងគាំទ្រ​នៅក្នុង​ការបោះឆ្នោត​សម្តែង​ការទុកចិត្ត​ដែល​គ្រោង​ធ្វើ​នៅ​ថ្ងៃ​០៧​កញ្ញា​ឯណោះ​តែ​បន្ទាប់​ពី​ការ​កៀរគរ​ការគាំទ្រ​ពេញ​មួយ​ថ្ងៃ​សុក្រ​មិន​ទទួលបាន​​ផល​ល្អ សមាជិកសភា​ក្រុម​កាន់​អំណាច​បន្ត​ប្រជុំ​មួយ​ថ្ងៃ​សៅរ៍​និង​ថ្ងៃអាទិត្យ​នេះ​ទៀត​ក្រោយពី​លោកនាយក​រដ្ឋមន្ត្រី​សុំ​ផ្តល់​សម្បទាន​ដល់​គណបក្ស​ប្រឆាំង​ជា​ថ្នូរ​នឹង​ការគាំទ្រ តែ​សំណើ​របស់​លោក​​ត្រូវបដិសេធ​ដាច់ខាត​។​

​ដើម្បី​បង្កើត​រដ្ឋាភិបាល​ឬ​ធ្វើ​ជា​នាយករដ្ឋមន្ត្រី​ម៉ាឡេស៊ី វា​ទាមទារ​ការគាំទ្រ​ពី​សមាជិក​សភា​យ៉ាងតិច​១១១​រូប តែ​លោក​លោកមូ​យីត​ឌីនមាន​ការគាំទ្រ​ពី​សមាជិកស​ភា​ត្រឹមតែ​១០០ ខណៈ​៨៨​ទៀត​​គាំទ្រ​មេដឹកនាំ​ប្រឆាំង​អាន់​វ៉ា អ៊ីប្រាហ៊ីម ១៥​គាំទ្រ​ប្រធាន​គណបក្ស​Umno​និង​១៧​ទៀត​គាំទ្រ​អតីត​នាយករដ្ឋមន្ត្រី​មហា​ធៀ ម៉ូ​ហា​ម៉ា​ត​។​

​ការ​កាន់អំណាច​របស់​លោកមូ​យីត​ឌីន​ហាក់​មិន​ឋិតថេរ​ចាប់តាំង​ពី​លោក​ឡើង​កាន់​អំណាច​នៅ​ខែ​មីនា​ឆ្នាំ​២០២០ ដោយសារតែ​រដ្ឋាភិបាល​លោក​មាន​ការគាំទ្រ​សម្លេង​ភាគច្រើន​ស្តួចស្តើង​ក្នុង​ស​​ភា​។​សម្ពាធ​កាន់តែ​កើន​ឡើង​នៅ​ពេល​ថ្មីៗ​ក្រោយ​សមាជិក​សភា​ខ្លះ​មក​ពី​គណបក្ស United Malays National Organisation (UMNO)​ដែល​ជា​ដៃគូ​ធំ​មួយ​ក្នុង​រដ្ឋា​​ភិបាល​ចម្រុះដ​កការគាំទ្រ​ពី​លោក​។​

​កាលពី​ថ្ងៃ​សុក្រ​លោកមូ​យីត​ឌីន​បាន​សារភាពជា​លើក​ដំបូង​ថា​លោកលែង​រកបាន​សម្លេង​ភាគច្រើន​និង​បាន​ព្យាយាម​ចុងក្រោយ​ដើម្បី​ទាក់ទាញ​ក្រុមប្រឆាំង​ជាមួយនឹង​ការសន្យា​កែ​ទំរង់​ន​យោ​​បាយ​និង​ប្រព័ន្ធ​បោះឆ្នោត ជា​ថ្នូរ​នឹង​ការគាំទ្រ​ក្នុង​ការបោះឆ្នោត​សម្តែង​ការទុកចិត្ត​លើ​មុខតំណែង​របស់​លោក តែ​ក្រុមប្រឆាំង​ច្រាន​ចោល​ដាច់អហង្ការ​៕

​លោកមូ​យីត​ឌីន យ៉ាស​ស៊ីន ប្រាប់​សមាជិក​គណបក្ស​របស់​លោក​អំពី​ការសំរេចចិត្ត​លាឈប់ នៅ​ពេល​លោក​អស់​លទ្ធភាព​រក្សា​រដ្ឋាភិបាល​នេះ​អោយ​បន្ត​នៅ​ក្នុង​អំណាច​