ដោយ៖តារារិទ្ធ/ភ្នំពេញ​៖​ប្រមុខ​រាជរដ្ឋាភិបាល​កម្ពុជា​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​បានធ្វើ​ការណែនាំ​ឲ្យ​ពលរដ្ឋ​ទៅរក​សេ​វ៉ា​តេស្ត មេរោគ​កូ​វីដ​១៩ នៅ​មន្ទីរពេទ្យ​រដ្ឋ​ឬ​ទីតាំង​យក​សំណាក​របស់​រដ្ឋ​ដែល​បានរៀបចំ​គឺ​មិន​គិតថ្លៃ​ទេ តែ​ប្រសិនបើ​មន្ទីរពេទ្យ​ឯកជន​គឺមាន​តម្លៃ​ថ្លៃ​ដោយសារតែ​គេ​គិត​បញ្ចូល ទាំង​ថ្លៃ​សម្លៀកបំពាក់​ពេទ្យ​ពាក់​ពេលធ្វើ​តេស្ត ។

​ការណែនាំ​របស់​សម្តេច​តេ​ជោ​ជាការ​ឆ្លើយតប​ទៅនឹង​ប្រជាពលរដ្ឋ​ដែល​បានលើកឡើង​ពី​តម្លៃ​ធ្វើតេស្ត​រក​មេរោគ​កូ​វីដ​១៩ នៅ​មន្ទីរពេទ្យ​ឯកជន​មានតម្លៃ​ថ្លៃ​ដោយបាន ចូលមក​លើក​ជា​សំណួរ នៅលើ​ទំព័រ​ហ្វេ​ស​ប៊ុ​ក​របស់​សម្តេច នៅ​ថ្ងៃទី​១៥ ខែសីហា ឆ្នាំ​២០២១​នេះ​។​

​ប្រជាពលរដ្ឋ​ដែលមាន​គណនី​ហ្វេ​ស​ប៊ុ​ក «Bou Pheakdey» បាន​ចោទសួរ​សម្តេចនាយករ​ដ្ឋ​មន្ត្រី​ថា​៖ «​ពេទ្យ​ឯក​ធ្វើតេស្ត​កូ​វីដ​១៩ អី​ក៏​ថ្លៃ​ម្ល៉េះ​?»​។​ឆ្លើយតប​សំណួរ​នេះ សម្តេច​តេ​ជោ​បាន​គូសបញ្ជាក់ថា​ការធ្វើ​តេស្ត​នៅ​ពេទ្យ​ឯក ជន​ថ្លៃ​ដោយសារ​ការធ្វើ​តេស្ត​នោះ​គឺ​គិត​ទាំង​ថ្លៃ​ឧបករណ៍​ធ្វើតេស្ត​និង​ថ្លៃ​សម្លៀកបំពាក់​ដែល​ពេទ្យ​ពាក់​នៅពេល ធ្វើតេស្ត​នោះ​។ សម្តេច​តេ​ជោ​ប្រមុខ​រាជរដ្ឋាភិបាល​ក៏បាន​ណែនាំ​ឱ្យទៅ​រក​ការធ្វើ​តេស្ត​នៅ​កន្លែង​ដែល​រដ្ឋ​រៀបចំ​ដែលជា​ការធ្វើ​តេស្ត​មិនមាន​គិតថ្លៃ​។​

​សម្តេច​តេ​ជោ​បានបញ្ជាក់​យ៉ាង​ដូច្នេះ​«​ខ្ញុំ​ក៏បាន​សួរ​រឿង​នេះដែរ​។​ចម្លើយ​ត្រឡប់មកវិញ​គឺ​ផ្នែក​ឯកជន​មិនមែន​គិតតែ​ឧបករណ៍​ធ្វើតេស្ត​ទេ​គឺ​គិត​ទាំង​តម្លៃ​ខោអាវ​ពេទ្យ​ដែល ពាក់​សម្រាប់​ធ្វើតេស្ត​ផងដែរ​។​ចម្លើយ​នេះ​សម​ហេតុផល​ព្រោះ​ពេលធ្វើ​តេស្ត​ត្រូវ​ពាក់​ខោអាវ​ពេទ្យ​ដើម្បី​ការពារ​ខ្លួន​របស់​គ្រូពេទ្យ ។ ប្រសិន​យល់ថា​ពេទ្យ​ឯកជន​ថ្លៃ​សូម​ទៅ យក​សំណាក​នៅ​កន្លែង​រដ្ឋ​រៀបចំ​» ៕​