ប្រែ​សម្រួលៈ​វាសនា​/ កា​ប៊ុល​៖ យុទ្ធជន​តា​លី​បង់​បាន​ចូល​ក្នុង​រដ្ឋធានី​កា​ប៊ុល​របស់​អា​ហ្វ​ហ្គានី​ស្ថាន​កាលពី​ថ្ងៃអាទិត្យ​ទី​១៥​សីហា នេះ​បើ​តាម​ការបញ្ជាក់​ពី​មន្ត្រី​ក្រសួង​មហាផ្ទៃ​ម្នាក់ នៅពេល​អាម៉េរិក​​ជម្លៀស​អ្នកការទូត​របស់​ខ្លួន​ចេញពី​ស្ថានទូត​តាម​ឧទ្ធម្ភាគចក្រ​។​

​មន្ត្រីជាន់ខ្ពស់​រូបនេះ​បាន​ប្រាប់​សារព័ត៌មាន​រ៉​យ​ទ័​រថា ក្រុម​បះបោរ​តា​លី​បង់​បាន​«​ចូលមក​ពី​គ្រប់​ទិស​»​តែ​លោក​មិន​បាន​ផ្តល់​ព័ត៌មាន​លម្អិត​ទេ​។​

​សារ​ក្នុង​ទ្វី​ត​ធើ​មួយ​ចេញពី​វិមាន​ប្រធានាធិបតី​អា​ហ្វ​ហ្គានី​ស្ថានបា​ននិយាយថា គេ​ឮ​ការបាញ់​គ្នា​នៅ​ជា​ច្រើន​ចំណុច​ជុំវិញ​ទីក្រុង​កា​ប៊ុល តេ​កងកម្លាំង​សន្តិសុខ​ក្នុង​កិច្ចសហការ​ជាមួយ​ដៃគូ​បរទេស​​នៅ​ត្រួតត្រា​ទីក្រុង​នេះ​នៅឡើយ​។​

​ក្នុងពេល​ជាមួយគ្នា មន្ត្រី​អាម៉េរិក​បាន​និយាយថា​ពួក​អ្នកការទូត​ត្រូវបាន​បញ្ជូន​ចេញពី​ស្ថានទូត​ទៅកាន់​អាកាសយានដ្ឋាន​។​ទាហាន​អាម៉េរិក​ច្រើន​ទៀត​នឹង​ត្រូវ​បញ្ជូន​មក​ជួយ​ការជម្លៀស​​ក្រោយ​ពី​ពួក​តា​លី​បង់​រុល​មកកាន់​រដ្ឋធានី​លឿន​ដូច​ផ្លេកបន្ទោរ​តែ​ក្នុង​រយៈពេល​ប៉ុន្មាន​ថ្ងៃ​សោះ​។​

​ទើបតែ​សប្តាហ៍​មុន ផ្នែក​ចារកម្ម​អាម៉េរិក​បាន​វាយ​តំលៃ​ថា​ទីក្រុង​កា​ប៊ុល​អាច​ទប់ទល់​បាន​យ៉ាង​យូរ​ត្រឹម​៣​ខែ​។​ឥឡូវ​សមាជិក​ក្រុម​អាម៉េរិក​កំពុង​ធ្វើការ​ចេញពី​អាកាសយានដ្ឋាន​កា​ប៊ុល​នៅ​​ពេល​មន្ត្រី​ម្នាក់​មក​ពី​សម្ពន្ធភាព​អង្គការ​ណា​តូ បាន​និយាយថា បុគ្គលិក​សហភាព​អឺរ៉ុប​ជាច្រើន​បាន​រើ​ទៅកាន់​កន្លែង​មាន​សុ​វត្ថ​ភាព​មួយ​នៅក្នុង​រដ្ឋធានី​។​

​នៅ​ថ្ងៃនេះ​ដែរ រដ្ឋមន្ត្រីក្រសួង​មហាផ្ទៃ​អា​ហ្វ​ហ្គានី​ស្ថាន បាន​និយាយថា​នឹង​មាន​ការផ្ទេរ​អំណាច​ដោ​យ​សន្តិវិធី​ទៅ​អោយ​រដ្ឋាភិបាល​អន្តរ​កាល​មួយ​។​លោក​បាន​និយាយ​នៅក្នុង​សារ​ថត​ទុក​មួយ​​ថា​«​ប្រជាជន​អា​ហ្វ​ហ្គានី​ស្ថាន​គួរ​កុំ​បារម្ភ​…​នឹង​មិន​មាន​ការវាយប្រហា​រលើ​ទីក្រុង​ទេ​ហើយ​នឹង​មាន​ការផ្ទេរអំណាច​ដោយ​សន្តិវិធី​មួយ​ទៅ​អោយ​រដ្ឋាភិបាល​អន្តរ​កាល​»​។​

​មន្ត្រី​ក្រុម​តា​លី​បង់​ម្នាក់​ក៏​បាន​ប្រាប់​សារព័ត៌មាន​រ៉​យ​ទ័​រថា ក្រុម​ខ្លួន​មិន​ចង់​ឃើញ​ការបាត់បង់​អាយុជីវិត​មនុស្ស​ទេ តែ​ក៏​មិន​មាន​ប្រកាស​បទ​ឈប់​បាញ់​ដែរ​។​

​នៅ​មិនទាន់​មាន​ការបញ្ជាក់​អំ​ពី​ស្ថានភាព​របស់​ប្រធានាធិបតី អាស​រ៉ា​ហ្វ ហ្កានី​យ៉ាងណា​នៅឡើយ​ទេ ។​កាលពី​ថ្ងៃ​សៅរ៍​លោក​បាន​និយាយថា​លោក​ចង់​ពិភាក្សា​ជាមួយ​មេដឹកនាំ​មូលដ្ឋាន​និង​​ដៃគូ​អន្តរជាតិ​អំពី​ស្ថានការណ៍​ស្រុកទេស​៕

​ឧទ្ធម្ភាគចក្រ​អាម៉េរិក​ហោះ​លើ​ស្ថានទូត​ដើម្បី​ជម្លៀស​បុគ្គលិក​ទូត​ទៅកាន់​អាកាសយានដ្ឋាន​

​ទាហាន​អា​ហ្វ​ហ្គានី​ស្ថានឈ​រយាម​នៅក្រុង​កាប៊ុល

​​កាលពី​ព្រឹក​ថ្ងៃអាទិត្យ ក្រុម​តា​លី​បង់​បាន​ដណ្តើមយក​ទីក្រុង​ចា​ឡា​ឡា​បាត​ដោយ​គ្មាន​ការប្រយុទ្ធ​គ្នា​ជាមួយ​កងកម្លាំង​រដ្ឋាភិបាល​ទេ​។​ក្នុង​រូប យុទ្ធជន​តា​លី​បង់​ចូល​ក្រុង​ចា​ឡា​ឡា​បាត​