​ប្រែ​សម្រួលៈ​វាសនា​/​កា​ប៊ុល​៖ ពួក​បះបោរ​តា​លី​បង់​វិល​មក​កាន់​អំណាច​នៅ​ក្រុង​កា​ប៊ុល​ឡើង​វិញ​កាលពី​ថ្ងៃ​ចន្ទ​ទី​១៦​សីហា ក្រោយ​ការ​វាយ​ដណ្តើម​កាន់កាប់​ទឹក​ដី​នៅ​ទូ​ទាំង​អា​ហ្វ​ហ្គានី​ស្ថាន​នៅពេល​​កងកម្លាំង​ដឹកនាំ​ដោយ​អាម៉េរិក​ដកចេញ និង​បណ្តា​ប្រទេស​លោកខាងលិច​បង្កើន​ការជម្លៀស​ពលរដ្ឋ​របស់​គេ​ចេញពី​រដ្ឋធានី​កាប៊ុល​។​

ពួកយុទ្ធជនតាលីបង់ចូលកាន់កាប់វិមានប្រធានាធិបតីអាហ្វហ្គានីស្ថានកាលពីថ្ងៃអាទិត្យ

​ប្រធានាធិបតី អាស​រ៉ា​ហ្វ ហ្កានី បាន​ភៀសខ្លួន​ចេញ​ក្រៅ​ប្រទេស​កាលពី​ថ្ងៃអាទិត្យ នៅ​ពេល​ពួក​សកម្មប្រយុទ្ធ​អ៊ីស្លាម​ចូល​ក្នុង​រដ្ឋធានី ដោយ​លោក​បាន​បញ្ជាក់ថា​លោក​ចង់​បញ្ចៀស​ការបង្ហូរ​​ឈាម​។​ក្នុងពេល​ជាមួយគ្នា អ្នកនាំពាក្យ​តា​លី​បង់​បានប្រកាសថា សង្គ្រាម​ត្រូវ​ចប់​ហើយ​ប្រជាជន​អា​ហ្វ​ហ្គានី​ស្ថាននឹ​ងរៀន​អំពី​អ្វី​ដែល​របប​គ្រប់គ្រង​ថ្មី​មួយ​នឹង​កើតឡើង​។​

​នៅ​រដ្ឋធានី​វ៉ាស៊ីនតោន​ឯណោះ​វិញ ពួក​ប្រឆាំងនឹង​ការសំរេចចិត្ត​របស់​ប្រធានាធិបតី ចូ បៃ​ដិន ក្នុង​ការបញ្ចប់​សង្គ្រាម​យូរ​បំផុត​របស់​អាម៉េរិក បាន​និយាយ​ថា​ភាពវឹកវរ​នេះ​ត្រូវ​បាន​បង្កឡើង​​ដោយ​បរាជ័យ​នៃ​ភាព​ជា​អ្នក​ដឹកនាំ​មួយ​នៅពេល​អាម៉េរិក​បញ្ជូនទាហាន​អាម៉េរិក​បន្ថែម​ទៅ​ជួយសង្គ្រោះ​ពលរដ្ឋ​អាម៉េរិក​។​

​ពេញ​មួយ​យប់​ថ្ងៃអាទិត្យ ចំណុច​ផ្តោត​គឺ​អាកាសយានដ្ឋាន​ក្រុង​កា​ប៊ុល កន្លែង​ដែល​ជនជាតិ​អា​ហ្វ​ហ្គានី​ស្ថាន​រាប់រយ​នាក់​បាន​ស្វះស្វែង​ភៀសខ្លួន​ចេញពី​ប្រទេស​និង​កំពុង​រង់ចាំ​ជើងហោះហើរ ដោយ​អ្នកខ្លះ​អូសទាញ​វ៉ា​លី​ស​អីវ៉ាន់​កាត់​ផ្លូវ​យន្តហោះ​ទាំង​ងងឹត​។​

​ប្រភព​ព័ត៌មាន​មួយ​នៅ​អាកាសយានដ្ឋាន ការ​ប្រវាយប្រតប់​គ្នា​មួយ​បាន​កើតឡើង​ក្នង​ចំណោម​មនុស្ស​ដែល​មិន​អាច​ទទួល​បាន​ការ​ឡើង​ជិះ​យន្តហោះ​នៅ​ពេល​ការចាកចេញ​ត្រូវបាន​បញ្ឈប់​។​

​ទូរទស្សន៍​ក្នុងស្រុក​1TV​ក៏​បាន​រាយការណ៍​ការ​ផ្ទុះ​គ្រាប់​ជាច្រើន​នៅក្នុង​រដ្ឋធានី​ក្រោយ​មេឃងងឹត តែ​ទីក្រុង​ជាទូទៅ​មាន​ភាព​ស្ងាត់​ក្នុងអំឡុង​ថ្ងៃអាទិត្យ​។​ក្រុម​ជួយសង្គ្រោះ​បាន​និយាយថា មនុស្ស​​របួស​៨០​នាក់​ត្រូវបាន​នាំ​មក​មន្ទីរពេទ្យ​ក្រុង​កា​ប៊ុល​។​

​គេ​នៅ​មិនទាន់​ដឹង​ថា​តើ​លោក​ហ្កានី​ភៀសខ្លួន​ទៅ​កាន់​ប្រទេស​ណា និង​ប្រគល់​អំណាច​អោយ​នរណា​នៅពេល​ពួក​តា​លី​បង់​វាយ​រុលចូល​លឿន​ដូច​ផ្លេកបន្ទោរ​។​

​ក្នុងការ​ការ​បង្ហោះ​សារ​តាម​ហ្វេ​សប៊ុក លោក​ហ្កានី​បាន​និយា​ថា​លោក​បាន​ចាកចេញ​ពី​ប្រទេស​ដើម្បី​បញ្ចៀស​ការប៉ះទង្គិច​គ្នា​ជាមួយ​ពួក​តា​លី​បង់​ដែល​អាច​នឹង​បង្ក​គ្រោះថ្នាក់​ជន​ស៊ីវិល​រាប់លាន​​នាក់​នៅ​ក្រុង​កា​ប៊ុល​។​លោក​មិន​បាន​បញ្ជាក់ថា​លោក​កំពុង​ស្ថិតនៅ​ទីណា​ទេ​។​

​អ្នកប្រើប្រាស់​បណ្តាញ​សង្គម​ខ្លះ​នៅ​កា​ប៊ុល​បាន​ហៅ​លោក​ហ្កានី​ថា​ជា​មនុស្ស​កំសាក​ដោយសារ​លោក​ភៀសខ្លួន​យករួចខ្លួន​តែឯង​ហើយ​ដោយ​ទុក​អោយ​ពួកគេ​ជ្រួលច្របល់​។​

​ក្នុងពេល​ជាមួយគ្នា​អ្នកនាំពាក្យ​តា​លី​បង់​បាន​ប្រាប់​ទូរទស្សន៍​Al Jazeera​ថា ក្រុម​ខ្លួន​ចង់​បាន​ទំនាក់ទំនង​ល្អ​មួយ​សហគមន៍​អន្តរជាតិ​៕

​យុទ្ធជន​តា​លី​បង់​ជិះ​រថយន្ត​Humvee របស់​អាម់េរិក​ចូល​ក្រុង​កា​ប៊ុល​កាលពី​ថ្ងៃអាទិត្យ​