​ប្រែ​សម្រួល : កញ្ញា​ដា​លី​ស (​ស្ពុត​និក​) ៖ រថយន្តយោធា​មួយចំនួន​ដែល​ដំណើរការ​ដោយ​កងទ័ពអាកាស​អា​ហ្វ​ហ្គានី​ស្ថានដែល​ឈរជើង​នៅ​អាកាសយានដ្ឋាន​កាន់ដា​ហា​បាន​ធ្លាក់​ក្នុង​ដៃ​របស់​តា​លី​បង់ បន្ទាប់ពី​ក្រុម​ភេរ​វករ​នេះ​បាន​ដណ្តើម​កាន់កាប់​មូលដ្ឋាន​ទ័ពអាកាស​មួយ​កាលពីដើម​សប្តាហ៍​នេះ​។​

​នៅក្នុង​វីដេអូ​និង​រូបថត​ជាច្រើន​ដែល​ក្រុម​ភេរ​វករ​នេះ​បាន​ផ្សាយ ឧទ្ធម្ភាគចក្រ​ធុន UH-60 Black Hawks ចំនួន ២ គ្រឿង​និង​ឧទ្ធម្ភាគចក្រ Mi-17 ចំនួន ២​គ្រឿង​ត្រូវបាន​​បោះបង់ចោល​ដោយ​កងកម្លាំង​រដ្ឋាភិបាល​ដែល​ដកថយ​ចេញពី​អាកាសយានដ្ឋាន​។ ឧទ្ធម្ភាគចក្រ Black Hawks ត្រូវបាន​ផ្គត់ផ្គង់​ដោយ​សហរដ្ឋ​អាម៉េរិក​និង​ជា​ផ្នែក​មួយ​នៃ​ការចំណាយ ៨៨​ពាន់​លាន​ដុល្លារ​របស់​ទីក្រុង​វ៉ាស៊ីនតោន​ទៅលើ​សន្តិសុខ​ប្រទេស​នេះ​និង​កិច្ចខិតខំ​ប្រឹងប្រែង​ដើម្បី​បង្កើន​ការត្រៀមខ្លួន​របស់​យោធា​អា​ហ្វ​ហ្គានី​ស្ថាន​ដើម្បី​ប្រយុទ្ធ​ជាមួយ​តា​លី​បង់​ដោយ​គ្មាន​​ជំនួយ​ពី​ខាងក្រៅ​។​

​លើសពីនេះ គេ​ឮ​សំឡេង​មនុស្ស​ម្នាក់​ស្រែក​ពី​ខាងក្រោយ​វីដេអូ​ថា ឧទ្ធម្ភាគចក្រ​យោធា​សរុប​ចំនួន ៥​គ្រឿង​និង​យន្តហោះ​ជាច្រើន​ទៀត​ត្រូវបាន​តា​លី​បង់​រឹបអូស​បាន​នៅ​អាកាសយានដ្ឋាន​​កាន់​ដា​ហា​។ ទោះយ៉ាងណា វីដេអូ​នោះ​បង្ហាញ​ថា​មិនមែន​ឧបករណ៍​ទាំងអស់​សុទ្ធតែ​អាច​ដំណើរការ​បាន​នោះ​ទេ​។ ឧទ្ធម្ភាគចក្រ Mi-17 មួយ​គ្រឿង​បាន​បាត់​ស្លាបចក្រ​អស់រលីង​ចំណែក​​ឧទ្ធម្ភាគចក្រ​មួយទៀត​ត្រូវបាន​គ្រប​ដោយ​ក្រណាត់​មួយ ដោយ​ស្លាបចក្រ​ត្រូវបាន​ដក​ចេញ​ទៅ​ទុក​មួយ​ឡែក​។​

​ឧទ្ធម្ភាចក្រ Black Hawks មួយ​គ្រឿង​ដែល​ផ្គត់ផ្គង់​ដោយ​អាម៉េរិក​ត្រូវបាន​ពុះ​ម៉ាស៊ីន​ទំនង​សម្រាប់​ជួសជុល​។ ក្នុងពេល​ជាមួយគ្នា​នេះ​ដែរ​ឧទ្ធម្ភាគចក្រ​អាម៉េរិក​មួយទៀត​ឃើញ​នៅ​លើ​​ទីវាល​ទំនង​ត្រៀម​ហោះ​ចេញ​។ គ្មាន​នរណា​អាច​ប្រាប់​បានទេ​ថា​តើ​ពួក​តា​លី​បង់​មាន​អ្នក​មាន​សមត្ថភាព​បើក​យន្តហោះ​ទាំងនេះ​បាន​ឬ​អត់​ប៉ុន្តែ​វីដេអូ​មួយ​ដែល​ផ្សាយ​នៅ​ដើម​សប្តាហ៍​នេះ​បាន​​បង្ហាញ​ក្រុម​យុទ្ធជន​តា​លី​បង់​ត្រូវបាន​ដឹកជញ្ជូន​តាម​ឧទ្ធម្ភាគចក្រ​ទៅកាន់​ទីតាំង​មិន​ស្គាល់​មួយ​។​

​ក្រុម​តា​លី​បង់​កាលពីមុន​បាន​រឹបអូស​យក​អាវុធ​ធុន​តូច ឧបករណ៍​នានា​និង​រថពាសដែក​ដែល​ផ្តល់​ដោយ​វ៉ាស៊ីនតោន​ពី​កងទ័ព​អា​ហ្វ​ហ្គានី​ស្ថានដែល​រត់គេចឬ​ចុះចូល​ជាមួយ​ពួកគេ​។ ​ចលនា​ភេរ​វករ​នេះ​បាន​បង្កើន​ការ​រុលទៅមុខ​លឿន​គួរ​ឱ្យ​កត់សម្គាល់​ក្នុង​រយៈពេល​ប៉ុន្មាន​ខែ​ចុងក្រោយ​នេះ​ចំ​ពេល​ដែល​អាម៉េរិក​និង​ណា​តូ​ដកខ្លួន​ចេញពី​ប្រទេស​នេះ​ដោយ​ពួក​នេះ​បាន​ចូលដល់​​រដ្ឋធានី​កា​ប៊ុល​កាលពី​ថ្ងៃអាទិត្យ​ទី​១៥ ខែសីហា​ខណៈ​ប្រធានាធិបតី អាស​រ៉ា​ហ្វ ហ្គានី បាន​ចាកចេញ​ពី​ប្រទេស​បន្ទាប់​ពី​ការចរចា​សុំ​ចុះចាញ់​។ កាល​ពី​មួយ​ខែ​មុន​ប្រធានាធិបតី​អាម៉េរិក​លោក​​ចូ​បៃ​ដិនបាន​ទទូច​អំឡុង​ពេល​សន្និសីទ​សារព័ត៌មាន​មួយ​ថា ការ​ដែល​តា​លី​បង់​ដណ្តើម​កាន់កាប់​អា​ហ្វ​ហ្គានី​ស្ថាន “​មិនមែន​មិន​អាច​បញ្ចៀស​បាន​នោះទេ​” ហើយ​លើកឡើងថា កងទ័ព​អា​ហ្វ​ហ្គានី​ស្ថាន​មានកម្លាំង​គ្រប់គ្រាន់​ដើម្បី​ប្រយុទ្ធ​ជាមួយ​ក្រុម​នេះ​ហើយ​៕
ពួក​តា​លី​បង់​អះអាងថា​រឹបអូស​បាន​យន្តហោះ​និង​ឧទ្ធម្ភាគចក្រ​អាម៉េរិក​ជាច្រើន​គ្រឿង​នៅ​ទីក្រុង​កាន់​ដា​ហា​