​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ កាលពី​ថ្ងៃទី​១២​សីហា រុស្ស៊ី​បាន​ចាប់ខ្លួន​អ្នកវិទ្យាសាស្ត្រ​កំពូល​ម្នាក់ ដែល​មាន​ជំនាញ​ខាង​មី​ស៊ី​ល​លឿន​ជាង​សំឡេង​ពី​បទ​សង្ស័យ​ក្បត់ជាតិ​។

​សាស្ត្រាចារ្យ ឈ្មោះ អា​ឡិច​សាន់ឌ័​រ គូ​រ៉ា​នូវ អាយុ ៧៣ ឆ្នាំ​ត្រូវបាន​ឃុំខ្លួន​ដោយ​សេវាកម្ម​ប្រឆាំង​ចារ​កម្ម FSB​ដែល​ចោទ​គាត់​ថា​បានប្រគល់​អាថ៌កំបាំង​ឱ្យ​ទៅ​ប្រទេស​សមាជិក​អង្គការ​ណា​តូ​​ដែល​មិន​បញ្ចេញ​ឈ្មោះ​មួយ​។​

​លោក​នឹង​ត្រូវ​ឡើង​តុលាការ Lefortovo​នៅ​ទីក្រុង​មូ​ស្គូ​នៅ​ថ្ងៃ​ព្រហស្បតិ៍​ទី​១៩​សីហា ហើយ​រំពឹង​ត្រូវ​ជាប់​ឃុំ​រយៈពេល ២ ខែ​ដើម្បី​រង់ចាំ​ការស៊ើបអង្កេត​។​

​ការចាប់ខ្លួន​លោក​ធ្វើឡើង​បន្ទាប់​ពី​ជនជាតិ​អង់គ្លេស​ឈ្មោះ ដេវីដ ស្មី​ត ដែល​ជា​សន្តិសុខ​ម្នាក់​នៅ​ស្ថានទូត​អង់គ្លេស​ប្រចាំ​ប្រទេស​អាល្លឺម៉ង់ ត្រូវបាន​នាំ​ខ្លួន​ទៅ​សាកសួរ​ដោយ​សង្ស័យថា​បាន​​បញ្ជូន​ព័ត៌មាន​សម្ងាត់​ទៅ​វិមាន​ក្រឹម​ឡាំង​។​

​លោក​ដេវីដ ស្មី​ត ត្រូវបាន​ចោទប្រកាន់​ពី​បទ​បញ្ជូន​ឯកសារ​សម្ងាត់​ឱ្យទៅ​ចារកម្ម​រុស្ស៊ី​។​

​ការចាប់ខ្លួន​លោក​បាន​កើតឡើង​នៅពេល​ដែល​រុស្ស៊ី​កំពុង​ប្រញាប់ប្រញាល់​ដាក់ពង្រាយ​មី​ស៊ី​ល​លឿន​ជាង​សំឡេង​ដែល​ជា​ផ្នែក​មួយ​នៃ​ការធ្វើ​ទំនើបកម្ម​ដ៏​ធំ​មួយ​នៃ​ក្បាលម៉ាស៊ីន​យោធា​របស់​វិមាន​​ក្រឹម​ឡាំង​ដែល​ត្រួតពិនិត្យ​ដោយ​លោក​វ្ល៉ា​ឌី​មៀរ ពូ​ទីន ផ្ទាល់​។​

​លោក​គូ​រ៉ា​នូវ​គឺជា​តួអង្គ​សំខាន់​ក្នុង​ការអភិវឌ្ឍ​បច្ចេកវិជ្ជា​មី​ស៊ី​ល​លឿន​ជាង​សំឡេង​នៅក្នុង​ប្រទេស​រុស្ស៊ី ប៉ុន្តែ FSB ដែល​កាលពី​មុន​គេ​ស្គាល់​ថា KGB ជឿ​ថា​គាត់​បាន​បញ្ជូន​ទិន្នន័យ​សម្ងាត់​ឱ្យ​​ទៅ​ប្រភព​ចារកម្ម​របស់​លោក​ខាងលិច​។​

​លោក​គឺជា​អគ្គនាយក​និង​ជា​អ្នក​រចនា​ម៉ូដ​មី​ស៊ី​ល​នៃ​សហគ្រាស​ស្រាវជ្រាវ​វិទ្យាសាស្ត្រ​នៃ​ប្រព័ន្ធ​មី​ស៊ី​ល​លឿន​ជាង​សំឡេង ហៅ​កាត់​ថា NIPGS៕

​លោក អា​ឡិច​សាន់ឌ័​រ គូ​រ៉ា​នូវ ត្រូវបាន​ចាប់ខ្លួន​ដោយ​សង្ស័យ​ប្រគល់​ការសម្ងាត់​ឱ្យទៅ​ប្រទេស​សមាជិក​អង្គការ​ណា​តូ