​ប្រែ​សម្រួលៈ​វាសនា​/​បាងកក​៖ ក្រុម​សភា​ប្រឆាំង​ថៃ​កាលពី​ថ្ងៃ​ចន្ទ​ទី​១៦​សីហា​បាន​ដាក់​ញត្តិ​សម្តែង​ការមិនទុកចិត្ត​នាយករដ្ឋមន្ត្រី ប្រា​យុទ្ធ ចាន់​អូ​ចា និង​រដ្ឋមន្ត្រី​៥​រូប​ទៀត ដោយសារតែ​​ដំណោះស្រាយ​របស់​រដ្ឋាភិបាល​រយៈពេល​១​ឆ្នាំ​មកនេះ​ចំពោះ​វិបត្តិ​ជំងឺ​ឆ្លងកូវី​ដ​១៩​និង​ការចាត់ចែង​ចាក់​វ៉ាក់សាំង ព្រម​ទាំង​កិច្ចការ​សេដ្ឋកិច្ច​។​

​ប្រធាន​គណបក្ស​ភឿ​ថៃ លោក សំ​ពង់ អា​ម៉ន​វីវ៉ា​ត(ស្តាំ) ប្រគល់​ញត្តិ​ដល់​ប្រធានសភា​

​ដឹកនាំ​ដោយ​ប្រធាន​គណបក្ស​ភឿ​ថៃ លោក សំ​ពង់ អា​ម៉ន​វីវ៉ា​ត គណបក្សប្រឆាំង​ថៃ​យ៉ាងតិច​ចំនួន​៥​បានរួម​គ្នា​ដាក់​ញត្តិ​សុំ​ហៅ​សមាជិក​គណៈរដ្ឋមន្ត្រី​មក​ជជីក​សួរ​ដេញដោល​នៅក្នុង​សភា​​និង​បោះឆ្នោត​សម្តែង​ការ​មិន​ទុកចិត្ត​ពួកគេ​។​ញត្តិ​នេះ​ត្រូវបាន​ដាក់​ជូន​ប្រធាន​សភា​លោក​ឈួន លី​ក ផៃ​។​

​លោក​សំពង់​បាន​និយាយថា ក្រុម​ប្រឆាំង​បាន​សង្កេតឃើញ​មាន​ការខ្វះខាត​និង​បរាជ័យ​នៅ​ផ្នែក​ខ្លះ​របស់​រដ្ឋាភិបាល​នៅក្នុង​រយៈពេល​មួយ​ឆ្នាំ​មកនេះ ជាពិសេស​ការដោះស្រាយ​ជំងឺ​កូវី​ដ​១៩​និង​​ការចាត់​ចែក​ចាក់​វ៉ាក់សាំង​ព្រម​ទាំង​កិច្ចការ​សេដ្ឋកិច្ច​។​

​រដ្ឋមន្ត្រី​ដែល​នឹង​ត្រូវ​ហៅ​មក​ជជីក​សួរ​រួម​មាន​រដ្ឋមន្ត្រី​សុខាភិបាល រដ្ឋមន្ត្រី​គមនាគមន៍ រដ្ឋមន្ត្រី​កសិកម្ម រដ្ឋមន្ត្រី​ការងារ​និង​រដ្ឋ​មន្ត្រី​ហិរញ្ញវត្ថុ​។​

​ការដាក់​ញត្តិ​សុំ​ការសម្តែង​ការមិនទុកចិត្ត​នាយករដ្ឋមន្ត្រី​នេះ​កើតឡើង​ចំ​ពេល​សកម្មជន​និង​ក្រុមប្រឆាំង​ក្រៅ​សភា​បាន​នាំគ្នា​ធ្វើ​បាតុកម្ម​នៅ​ក្រុង​បាងកក​និង​បណ្តា​ខេត្ត​ដើម្បី​ដេញ​នាយក​​រដ្ឋ​​មន្ត្រី​ចេញពី​តំណែង ដោយសារ​ហេតុផល​ស្រដៀង​គ្នា​។​

​ក្នុង​ការតវ៉ា​ប្រឆាំង​កាលពី​ថ្ងៃអាទិត្យ បាតុករ​បាន​ប៉ះទង្គិច​ជាមួយ​ប៉ូលិស ទោះ​ជា​មេដឹកនាំ​បាតុកម្ម​ម្នាក់​អំពាវនាវ​អោយ​អ្នកគាំទ្រ​អត់ធ្មត់​កុំ​ប្រឈម​មុខ​ជាមួយ​អាជ្ញាធរ​ក្តី​។​

​អ្នក​ប្រឆាំង​តវ៉ា​មួ​ក្រុម​ប្រដាប់​ដោយ​ចំ​ពាម​កៅស៊ូ​និង​ផាវ បាន​ប្រឈម​ជាមួយ​ប៉ូលិស ដែល​បាន​បាញ់​គ្រាប់​បែកផ្សែង​និង​បាញ់​ទឹក​នៅ​ផ្លូវបំបែក​មួយ​ក្នុង​ក្រុង​បាងកក​។​ក្នុងពេល​ប៉ះទង្គិច​មេដឹកនាំ​ក្រុម​អាវ​ក្រហម​ថៃ​លោក​ណាត់​តាវុ​ធ សាយ​កឿ បាន​បង្ហាញ​ខ្លួន​នៅ​កន្ទុយ​រថយន្ត​និង​ធ្វើ​ការអំពាវនាវ​ជា​ថ្មី​សុំ​អោយ​អត់ធ្មត់​កុំ​បង្ក​អំពើហិង្សា​។​

​សូមបញ្ជាក់​ថា បាតុកម្ម​គាំទ្រ​លទ្ធិប្រជាធិបតេយ្យ​កាន់តែ​មាន​សម្ទុះ​ឡើង​នៅ​ប៉ុន្មាន​សប្តាហ៍​មក​នេះ​នៅ​ពេល​កំហឹង​សាធារណជន​លើ​រដ្ឋាភិបាល​អំពី​ដំណោះស្រាយ​កូវី​ដ​១៩​និង​ផលប៉ះពាល់​សេដ្ឋ​​កិច្ច​ក៏​កាន់តែ​ពុះកញ្ជ្រោល​ផងដែរ​។​បាតុកម្ម​ជាច្រើន​កាលពី​សប្តាហ៍​មុន​ក៏​ជួប​ការបាញ់ទឹក គ្រាប់​បែកផ្សែង​និង​កាំភ្លើង​គ្រាប់​ជ័រ​ពី​ប៉ូលិស​៕

​បាតុកម្ម​អហិង្សា​កាលពី​ថ្ងៃអាទិត្យ​បាន​ប្រែជា​ការប្រឈមុខ​ជា​មួយ​ប៉ូលិស​នៅ​បាងកក​