​ប្រែ​សម្រួល​៖​វាសនា​/​បាងកក​៖ អ្នកជំងឺ​កូវី​ដ​១៩​ច្រើន​បំផុត​ចំនួន​២៣៩​នាក់​បាន​ស្លាប់​និង​មនុស្ស​២០.១២៨​នាក់​បាន​ឆ្លងកូវី​ដ​១៩​នៅ​២៤​ម៉ោង​កន្លងទៅ នេះ​បើ​តាម​ការប្រកាស​របស់​​ក្រសួង​សុខាភិបាល​ថៃ​កាលពី​ព្រឹក​ថ្ងៃ​អង្គារ​។​

​ក្នុងចំណោម​អ្នក​ឆ្លង​ថ្មី មាន​១៩.៨៥៦​នាក់​ជា​ប្រជាជន​ទូទៅ​និង​២៧២​នាក់​ជា​អ្នកទោស​។​២៤​ម៉ោង​កន្លង​ទៅ​ថៃ​ក៏​មាន​អ្នកជំងឺ​កូវី​ដ​១៩​ជា​ចេញពី​ពេទ្យ​ចំនួន​២០.៧៩១​នាក់​ផង​ដែរ​។

​សូមបញ្ជាក់​ថា ចាប់តាំងពី​ថ្ងៃ​០១​មេសា​ពេល​កូវី​ដ​១៩​រលក​ទី​៣​វាយប្រហារ​ព្រះរាជាណាចក្រ​នេះ​មក មាន​អ្នក​ឆ្លង​សរុប​៩១៩.៥៧៩​នាក់​តែ​ជាង​៧០០.០០​នាក់​បាន​ជា​ចេញពី​ពេទ្យ និង​៧.៨៧៩​នាក់​​បាន​ស្លាប់​។​

​ថៃ​ដែល​ជា​ប្រទេស​ផលិត​វ៉ាក់សាំង​AstraZeneca​បែរ​ជា​ខ្វះ​វ៉ាក់សាំង​ចាក់អោយ​ប្រជាជន​និង​កំពុង​ពិចារណា​ខ្ចី​វ៉ាក់សាំង​កូវី​ដ​១៩​ចំនួន​១៥០.០០០​ដូសពី​ប្រទេស​ប៊ូ​តង់​។​

​អ្នកនាំពាក្យ​ក្រសួង​ការបរទេស​ថៃ​បាន​និយាយ​កាលពី​ថ្ងៃ​ចន្ទ​ថា «​កម្មវិធី​ដោះដូរ​វ៉ាក់សាំង​រវាង​ថៃ​និង​ប៊ូ​តង់​…​ឈរ​លើ​មូលដ្ឋាន​ថា ថៃ​នឹង​បញ្ជូន​វ៉ាក់សាំង​អោយ​ប៊ូ​តង់​វិញ​នៅពេល​ក្រោយ​»​។​

​សូមបញ្ជាក់​ថា​ថៃ​កំពុង​បង្កើនល្បឿន​ចាក់​វ៉ាក់​ចំ​ពេល​ខ្លួន​ជួប​ការផ្ទុះកូ​វីដ​១៩​ដ៏​អាក្រក់​បំផុត​អស់​ពេល​ជាង​៣​ខែ​មក​ហើយ​និង​បន្ទាប់​ពី​ចាប់ផ្តើម​កម្មវិធី​ចាក់​វ៉ាក់សាំង​កូវី​ដ​១៩​ទ្រង់ទ្រាយ​ធំ​កាលពី​​ខែមិថុនា​។​

​ថៃ​ទោះជា​ផលិត​វ៉ាក់សាំង​AstraZeneca​ក៏​ក្រុមហ៊ុន​បាន​និយាយថា ខ្លួន​មាន​លទ្ធភាព​ផ្គត់ផ្គង់​អោយ​ថៃ​បាន​តែ​៥​ទៅ​៦​លាន​ដូស​ក្នុង​មួយខែ គឺ​ស្មើ​ពាក់កណ្តាល​នៃ​តំរូវការ​របស់​រដ្ឋាភិបាល​​ថៃ​៕

តាំងពី​មុន​មក ថៃ​ទើប​ចាក់​វ៉ាក់សាំង​ពេញលេញ​(២​ដូស​)​អោយ​ប្រជាជន​ខ្លួន​បាន​ប្រមាណ​៧,១​ភាគរយ​