ដោយ: ម៉េងឆៃ / ភ្នំពេញ: បើមើលទៅ ដូចជារឿងអស់សំណើចបន្តិច ដែលអាជ្ញាធរសមត្ថកិច្ចចាប់ផ្តើមអ្នកជិះកង់ហាត់ ប្រាណ នាពេលព្រឹកព្រលឹមស្រ៊ាងៗ នៅសួនច្បាររង្វង់មូលវិមានឯករាជ្យ ចំណុចចំមុខផ្ទះសម្តេចតេជោ ហ៊ុន សែន។ អាជ្ញាធរសមត្ថកិច្ចខណ្ឌដូនពេញ សំអាងថា អ្នកជិះកង់ហាត់ប្រាណទាំងនោះ ជិះខុសច្បាប់ ដោយជិះបញ្ច្រាស’ទិសដៅ ទើបត្រូវចាប់កង់ និងម្ចាស់ លើកដាក់ឡាន យកទៅប៉ុស្តិ៍ប៉ូលិស។
នោះគឺកាលពីព្រឹកថ្ងៃទី១៧ ខែសីហា ឆ្នាំ២០២១ អ្នកជិះកង់ចំនួន ១២គ្រឿង និងម៉ូតូចំនួន ៤គ្រឿងបានជិះបញ្ច្រាស់ ទិសចរាចរណ៍នៅសួនច្បារ និងរង្វង់មូលវិមានឯករាជ្យ ត្រូវបានសមត្ថកិច្ចចាប់ឃាត់អប់រំ និងផាកពិន័យ។ ការចាប់ឃាត់នេះ បានអនុវត្តរួចមកហើយលើឡានម៉ូតូ ដែលល្មើសទិសដៅចរាចរណ៍ នៅចំណុចសួនច្បារវិមានឯករាជ្យ មុខផ្ទះសម្តេចតេជោ ហ៊ុន សែន នេះ។
នៅចំណុចសួនច្បារវិមានឯករាជ្យមុខផ្ទះសម្តេចតេជោ ហ៊ុន សែន គឺចាប់ពីថ្ងៃទី១ខែមករាឆ្នាំ២០១៨កងកម្លាំងគណៈបញ្ជាការ ឯកភាពខណ្ឌដូនពេញបានសហការជាមួយប៉ូលិសការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ បានចាប់ឃាត់ម៉ូតូ និងរថយន្ត បើកបរបញ្ច្រាសទិសដៅចរាចរណ៍។
នៅពេលនេះ គឺវិធានការច្បាប់ ត្រូវអនុវត្តលើអ្នកជិះកង់ហាត់ប្រាណ ដែលតែងតែជួបជុំ ជិះកង់ព្រឹកៗ និងល្ងាចៗ នៅលើផ្លូវជុំវិញសួនច្បារវិមានឯករាជ្យ ដោយនាំគ្នាជិះបញ្ច្រាស់ទិសដៅ។ ពោលគឺនៅពេលជិះមកពីមាត់ទន្លេ ដល់មុខផ្ទះសម្តេចតេជោ ហ៊ុន សែន គឺក្រុមអ្នកជិះកង់ មិនព្រមជិះទៅមួយជុំវិមានឯករាជ្យទេ បែរជាមកជិះសសៀរៗអៀបឆ្វេងដៃ ខាងសួនច្បារមុខផ្ទះសម្តេចតេជោ ឆ្លងទៅកាន់ផ្លូវខាងត្បូងសួនច្បារ។ ផ្លូវជុំវិញសួនច្បារវិមានឯករាជ្យ មុខផ្ទះសម្តេចតេជោ ហ៊ុន សែន ដែលតម្កល់ព្រះបរមរូបសម្តេចព្រះបរមរតនកោដ្ឋ គឺជាផ្លូវឯកទិស ដែលផ្លូវខាងត្បូង សម្រាប់អ្នកដំណើរទៅពីវិមានឯករាជ្យ ឆ្ពោះទៅមាត់ទន្លេ ហើយផ្លូវម្ខាងទៀត ជាប់ផ្ទះសម្តេចតេជោ ហ៊ុន សែន សម្រាប់តែអ្នកមកពីមាត់ទន្លេប៉ុណ្ណោះ។
ករណីធ្វើដំណើរបញ្ច្រាស់រង្វង់មូលវិមានឯករាជ្យនេះ ត្រូវបានអាជ្ញាធរខណ្ឌដូនពេញ បញ្ជាក់ថា អ្នកជិះល្មើសច្បាប់ចរាចរណ៍ ទាំងអ្នកជិះកង់ ម៉ូតូ និងយានជំនិះផ្សេងៗ នៅវិមានឯករាជ្យត្រូវតែអនុវត្តការផាកពិន័យដូចអ្នកល្មើសច្បាប់ចរាចរណ៍ជើងគោក ដែរ។ ការងារនេះ ត្រូវប្រគល់ឱ្យការិយាល័យប៉ូលិសចរាចរណ៍ជើងគោក ចាត់ការ ដោយខណ្ឌ មិនលូកដៃទេ។
មានបងប្អូនអ្នកជិះកង់មួយចំនួន មានការយល់ច្រឡំថា ខ្លួនដូចអ្នកដើរហាត់ប្រាណដែរ គឺអ្នកហាត់ប្រាណ គាត់ដើរលើសួនច្បារ ហើយបត់មួយជុំ ដោយមិនដើរឆ្លង ឆ្វែលវិមានឯករាជ្យទេ។ កន្លងមក ក៏មានអ្នកជិះកង់ ជាអ្នកហាត់ប្រាណ ជិះលើសួនច្បារ វិលជុំ ដូចអ្នកដើរដែរ។ តែការជិះកង់លើសួនច្បារដូច្នេះ មិនត្រឹមត្រូវឡើយ។
មួយផ្នែកទៀត មានអ្នកជិះកង់លើទ្រូងផ្លូវជុំវិញសួនច្បារ នៅពេលដល់មុខភូមិគ្រឹះសម្តេចតេជោ បត់ឆ្វេងតែម្តង ដោយមិនវង់មួយជុំវិមានឯករាជ្យនោះទេ។ នេះជាករណីបញ្ច្រាសទិសចរាចរណ៍ ដែលអាជ្ញាធរ និងសមត្ថកិច្ចជំនាញ ត្រូវតែស្ទាក់ចាប់ ដើម្បីអប់រំណែនាំ និងពិន័យ ដើម្បីឱ្យរាងចាល។
អាជ្ញាធរខណ្ឌដូនពេញ ប្រកាសថា ចាប់ពីពេលនេះតទៅ មិនអនុញ្ញាតឱ្យមានអ្នកជិះកង់ ជិះលើសួនច្បារទៀតទេ ទោះក្នុងរូបភាពហាត់ប្រាណ ឬកីឡាក៏ដោយ គឺសួនច្បារ សម្រាប់ទុកឱ្យបងប្អូនយើង ដើរកម្សាន្ត ឬហាត់ប្រាណ ដោយថ្មើរជើងតែប៉ុណ្ណោះ។ រីឯការជិះកង់ បញ្ច្រាសទិសដៅរង្វង់មូលវិមានឯករាជ្យ ក៏ត្រូវហាមឃាត់ដែរ។
កន្លងមក អ្នកជិះកង់ហាត់ប្រាណ នៅភ្នំពេញ ងើបជិះកង់ ពេលទៀបភ្លឺ ចន្លោះពីម៉ោង ៤ ដល់ម៉ោង ៦ព្រឹក គឺជិះនៅសួនច្បារវិមានឯករាជ្យ ហើយតែងតែបញ្ច្រាសទិសដៅចរាចរណ៍ នៅចំណុចវិមានឯករាជ្យ ដោយមកដល់ផុតសួនច្បារមុខផ្ទះសម្តេចតេជោ ហ៊ុន សែន បានបត់ឆ្វេងតែម្តង។ នេះជារឿងល្មើសច្បាប់ចរាចរណ៍។ តែពេលល្ងាច មិនសូវមានទេ។
យ៉ាងណាក៏ដោយ ករណីចាប់ផាកអ្នកជិះកង់ជាលើកដំបូងនេះ គួរតែអាជ្ញាធរសមត្ថកិច្ចយើង យកវិធានការអប់រំសិន។ ថ្នាក់ដឹកនាំនៅសាលាខណ្ឌដូនពេញ ក៏ជាអ្នកជិះកង់ហាត់ប្រាណដែរ អាចយល់ពីបេះដូងអ្នកជិះកង់ដូចគ្នា។ អាជ្ញាធរសមត្ថកិច្ច គួរតែផ្សព្វផ្សាយ ឲ្យអ្នកនិយមជិះកង់ បានដឹង ហើយលើកស្លាកនៅកែងផ្លូវនោះ ដាក់សញ្ញាហាមជិះកង់ និងយានយន្តគ្រប់ប្រភេទ។
កន្លងមក នៅចំណុចសួនច្បារវិមានឯករាជ្យនេះ ដោយអាងតែអាចជិះបញ្ច្រាសបាន ក៏ចេះតែនាំគ្នាជិះ ក្នុងបំណងហាត់ប្រាណ ដើម្បីតែសុខភាពប៉ុណ្ណោះ។ ណាមួយ នៅពេលព្រឹកៗទៀបភ្លឺ និងភ្លឺស្រ៊ាងៗនេះ ចំណុចនោះ ក៏មិនសូវមានអ្នកធ្វើដំណើរច្រើនឡើយ។ ម្យ៉ាងទៀត អ្នកជិះកង់ហាត់ប្រាណ ក៏គិតថា បើជិះបត់តាមទិសដៅចរាចរណ៍ ដោយឆ្វែលរង្វង់មូលវិមានឯករាជ្យ ខ្លាចគ្រោះថ្នាក់ ដោយត្រូវឆ្លងកាត់ផ្លូវបំបែកច្រើន។ ដូច្នេះក៏ត្រូវបត់ឆ្វេង ឆ្លងទៅផ្លូវម្ខាងទៀតតាមគេតាមឯងដូច្នេះទៅ។
ករណីនេះ នៅចុងម្ខាងទៀត នៃសួនច្បារវិមានឯករាជ្យ ខាងផ្លូវសុធារស ទិសដៅឆ្ពោះទៅមាត់ទន្លេ ក៏មានអ្នកធ្វើចរាចរណ៍ ជិះដូចខាងរង្វង់មូលវិមានឯករាជ្យដែរ កន្លងមក។ ប៉ុន្តែថ្មីៗនេះ អាជ្ញាធរសមត្ថកិច្ច បានសម្រួលកែផ្លូវ ដោយធ្វើផ្លូវថែមជាប់នឹងសួនច្បារ សម្រាប់អ្នកដែលត្រូវបត់ត្រឡប់ក្រោយ ឆ្វែលសួនច្បារវិមានឯករាជ្យនេះ។ ការកែសម្រួលផ្លូវដូច្នេះ គឺបញ្ចៀសបាននូវការកកស្ទះចរាចរណ៍ផង និងបញ្ចៀសបានទាំងគ្រោះថ្នាក់ចរាចរណ៍ផង ហើយសម្រួលដល់ការធ្វើដំណើរបាន ដោយងាយផង។
យ៉ាងណាក៏ដោយ ក្នុងករណីអ្នកជិះកង់ហាត់ប្រាណយើងវិញ ទាំងអស់គ្នា ដាច់ខាត ត្រូវទាមទារឲ្យគោរពច្បាប់ទម្លាប់ដូចអ្នកធ្វើដំណើរ និងអ្នកបើកបរយានជំនិះដទៃទៀតដែរ។ ពោលគឺដាច់ខាតអ្នកជិះកង់ មិនថា ហាត់ប្រាណ ឬជិះកង់ទៅរៀន ទៅផ្សារ ឬជិះលេងទេ គឺត្រូវតែមានមួកសុវត្ថិភាព សម្រាប់ជិះកង់ ហើយក៏ត្រូវគោរពច្បាប់ចរាចរណ៍ ដូចគេដូចឯង ដោយគោរពទាំងភ្លើងសញ្ញាចរាចរណ៍ នៅចំណុចភ្លើងស្តុប រួមទាំងទិសដៅចរាចរណ៍នេះឯង។ នៅលើសួនច្បារ ក៏រឹងរឹតតែមិនត្រូវជិះកង់នោះទេ។
ការតម្រូវឲ្យអ្នកជិះកង់ហាត់ប្រាណក្តី ជិះកង់ដើរលេង ជិះកង់ទៅរៀន ឬក៏ទៅណាណាក៏ដោយ ត្រូវតែមានមួកសុវត្ថិភាព និងត្រូវគោរច្បាប់ទម្លាប់ ពិសេសទិសដៅចរាចរណ៍នេះ គឺដើម្បីតែសុវត្ថិភាពរបស់អ្នកជិះកង់នោះឯង។ ជួនកាល ភ្លើងក្រហម នៅចំណុចភ្លើងស្តុប តែអ្នកជិះកង់ មិនឈប់ នៅតែបន្តជិះឆ្លងផ្លូវទៀត គឺអាចនឹងមានគ្រោះថ្នាក់ជាយថាហេតុ ហើយក៏មិនប្រកបដោយសេចក្តីថ្លៃថ្នូរនោះទេ។ ធ្ងន់ធ្ងរជាងគេ ការជិះបញ្ច្រាសទិសដៅចរាចរណ៍ គឺជាគ្រោះថ្នាក់ ដែលប្រឈមនឹងហានិភ័យខ្ពស់ នឹងត្រូវគេបុក។ បើមានគ្រោះថ្នាក់ គឺអ្នកជិះកង់នោះឯង ដែលរងគ្រោះធ្ងន់ធ្ងរ។
យ៉ាងណាក៏ដោយចុះ អ្នកជិះកង់ មិនថា ជិះហាត់ប្រាណ ជិះដើរលេង ឬក៏ជិះទៅរៀន ទៅផ្សារអ្វីទេ ត្រូវតែពាក់មួកសុវត្ថិភាព និងគោរពច្បាប់ចរាចរណ៍ដូចអ្នកបើកបរ និងអ្នកធ្វើដំណើរតាមយានជំនិះដទៃទៀតដែរ។
តែក្នុងករណីថ្មីចុងក្រោយ នៅសួនច្បារវិមានឯករាជ្យនេះ ដែលអាជ្ញាធរសមត្ថកិច្ច ស្ទាក់ចាប់អ្នកជិះកង់នេះ គួរតែអាជ្ញាធរសមត្ថកិច្ចយើង អប់រំណែនាំនៅកន្លែង ដោយអនុគ្រោះកុំផាកពិន័យ ហើយយកវិធានការផ្សព្វផ្សាយ និងលើកស្លាកសញ្ញា សរសេរអក្សរនៅដើមផ្លូវ ក៏ល្អម្យ៉ាងដែរ។
ពេលនេះ កូវីដឆ្លងរាតត្បាតរ៉ាំរ៉ៃយូរចូលជិត ២ឆ្នាំមកហើយ។ ក្លិបហាត់ប្រាណក៏បិទ ហើយការជួបជុំហាត់ប្រាណ តាមទីសាធារណៈ ក៏ហាមឃាត់ ធ្វើឲ្យម្នាក់ៗ ជ្រើសយកការហាត់ប្រាណ ដោយជិះកង់។ តែបែរជាត្រូវចាប់ផាកទៅវិញ។
ម្យ៉ាងទៀត មហាជនលើកឡើងថា អាជ្ញាធរខណ្ឌដូនពេញ គួរតែយកពេលទៅរៀបចំសណ្តាប់ធ្នាប់តាមផ្លូវសាធារណៈដទៃផ្សេងទៀត ធ្វើអនាម័យ រំដោះចិញ្ចើមផ្លូវ ពិសេសនៅតាមផ្សារ មុខក្រុមហ៊ុន ហាងលក់ទំនិញនានា ដែលរំលោភមិនត្រឹមតែចិញ្ចើមផ្លូវ គឺរំលោភទាំងទ្រូងផ្លូវ យកធ្វើជាចំណត និងយកផ្លូវធ្វើជាកន្លែងផ្ញើម៉ូតូឡាន អាចប្រសើរជាជាងប្រើកងកម្លាំងសន្តិសុខ និងប៉ូលិសច្រើននាក់ មកស្ទាក់ចាប់អ្នកជិះកង់ គ្រាន់តែដើម្បីហាត់ប្រាណឲ្យបែកញើសដូច្នេះ៕សរន