ដោយៈ ភ្នំ​ស្វាយ / បន្ទាយ​មាន​ជ័​យៈ មន្ត្រី​ក្រុមការងារ និង​គ្រូពេទ្យ​ជួរមុខ បានបញ្ចប់​ការយក​សំណាក រក​មេរោគ​កូ​វីដ​១៩ នៅ​ផ្សារ​ចក្រី ក្នុង​ឃុំ​ជប់​វា​រី ស្រុក​ព្រះនេត្រព្រះ នៅ​រសៀល ថ្ងៃទី​២៤ ខែសីហា ឆ្នាំ​២០២១ នេះ ដោយ​ក្នុងចំណោម អ្នកផ្ដល់​សំណាក ជា​អាជីវករ និង​អ្នកពាក់ព័ន្ធ ចំនួន ៤៥១ នាក់ ក្រុមគ្រូពេទ្យ បាន​រកឃើញ វិជ្ជមាន តែ ៣ នាក់ ប៉ុណ្ណោះ ក្រោយពី​ទីតាំង​ផ្សារ​ធំជាងគេ និង​ដំបូង​គេ មួយ​នេះ បាន​ផ្ទុះ​ការឆ្លង​រាលដាល ជំងឺ​កូ​វីដ ១៩ ។ ពោលគឺ អ្នកស្រី ព្រំ ពិសី ជា​ប្រពន្ធ​ម្ចាស់​ហាង លក់​គុយទាវ​មួយ នៅក្នុង​ផ្សារ​នេះ មាន​វិជ្ជមាន​កូ​វីដ ១៩ ក្រោយពី​គាត់ បាន​យក​សំណាក នៅ​ក្រុង​សិរីសោភ័ណ ។​

​សូម​រំលឹកថា កាលពី​ព្រឹក ថ្ងៃទី​២៣ ខែសីហា ឆ្នាំ​២០២១ លោក ឃូ ពៅ អភិបាលស្រុក​ព្រះនេត្រព្រះ និង​ក្រុមការងារ រួមទាំង​គ្រូពេទ្យ​ជួរមុខ បាន​ទៅពិនិត្យ​ទីតាំង​ផ្សារ ។​

​នៅ​រសៀល ថ្ងៃ​ដដែល លោក និង​មន្ត្រី បានទទួល​ដំណើរ​លោក អ៊ុំ រាត្រី អភិបាលខេត្ត បាន​ចុះ​ពិនិត្យ ការយក​សំណាក អាជីវករ ក្នុង​ផ្សារ​ចក្រី ចំនួន ១២៥ នាក់ ពាក់ព័ន្ធ​នឹង​អ្នកមាន​វិជ្ជមាន​កូ​វីដ ១៩​។​

​លុះដល់​ព្រឹក រហូត​រសៀល ថ្ងៃទី​២៤ ខែសីហា ការយក​សំណាក ដោយ​តេស្ត​រហ័ស បាន​បន្តធ្វើ រហូត​សរុប​ចំនួន ៤៥១ នាក់ ក្នុងនោះ រកឃើញ​វិជ្ជមាន​តែ ៣ នាក់​ប៉ូ​ណ្ណោះ ។​

​ទោះយ៉ាងណា លោក ឃូ ពៅ បានអោយដឹងថាៈ ផ្សារ​ចក្រី ត្រូវបាន​បិទ​ខ្ទប់ បណ្តោះអាសន្ន រយៈពេល ១៤ ថ្ងៃ ៕/V​