​ដោយៈ អង្គា​រ៍​ហេង / ភ្នំពេញៈ នា​រសៀល ថ្ងៃទី​២៤ ខែសីហា ឆ្នាំ​២០២១ សមត្ថកិច្ច​ជំនាញ នៃ​ការិយាល័យ ប្រឆាំង​បទល្មើស​ព្រហ្មទណ្ឌ កងរាជអាវុធហត្ថ រាជធានី​ភ្នំពេញ បាន​បញ្ជូន​ជនសង្ស័យ ៣ នាក់ ទៅ​សាលាដំបូង រាជធានី​ភ្នំពេញ ដើម្បី​ផ្តន្ទាទោស តាម​នីតិវិធី​ច្បាប់ ពាក់ព័ន្ធ​បទល្មើស ៣ ករណី​ផ្សេងគ្នា បន្ទាប់ពី​ត្រូវបាន​កម្លាំង​មូលដ្ឋាន អាវុធហត្ថ​ខណ្ឌ ឃាត់ខ្លួន​បាន ជា​បន្តបន្ទាប់​។​

​កងរាជអាវុធហត្ថ រាជធានី​ភ្នំពេញ បានឱ្យដឹងថា​៖ ជនសង្ស័យ​ទី​១ ឈ្មោះ ប៉ិន រដ្ឋា ភេទ​ប្រុស អាយុ​២៨​ឆ្នាំ មុខរបរ មិន​ពិតប្រាកដ ទីលំនៅ ក្នុងភូមិ​ព្រែក​ថ្មី សង្កាត់​ព្រែក​ថ្មី ខណ្ឌ​ច្បារអំពៅ រាជធានី​ភ្នំពេញ ត្រូវបាន​មូលដ្ឋាន អាវុធហត្ថ​ខណ្ឌ​ច្បារអំពៅ ឃាត់ខ្លួន កាលពី​ថ្ងៃទី​២០ ខែសីហា ឆ្នាំ​២០២១ ពាក់ព័ន្ធ​ករណី ផ្លោះ​របង ចូល​លួច​គាស់​ផ្ទះ​ប្រជាពលរដ្ឋ បើក​សេវាកម្ម​ផ្ទេរ និង​ដក​ប្រាក់​វី​ង មួយកន្លែង ស្ថិតនៅ​ភូមិ​ព្រែក​ថ្មី សង្កាត់​ព្រែក​ថ្មី ខណ្ឌ​ច្បារអំពៅ ចំនួន ២ លើក ក្នុងអំឡុង ខែកក្កដា និង ខែសីហា ឆ្នាំ​២០២១ យកបាន​ទ្រព្យសម្បត្តិ អស់​មួយចំនួន​។​

​ជនសង្ស័យ​ទី​២ ឈ្មោះ ឯក សុខា​រ៉ូ ភេទ​ប្រុស អាយុ​៣១​ឆ្នាំ មាន​របរ ជា​សន្តិសុខ ស្រុកកំណើត ឃុំ​ច្រក​ពោន ស្រុក​ត្បូងឃ្មុំ ខេត្តកំពង់ចាម ទីលំនៅ​បច្ចុប្បន្ន ផ្ទះ​លេខ​២៧ សង្កាត់​កន្ទោក ខណ្ឌ​កំបូល ត្រូវបាន​មូលដ្ឋាន​អាវុធហត្ថ ខណ្ឌ​ពោធិ៍​សែន​ជ័យ ឃាត់ខ្លួន​កាលពី​ថ្ងៃទី​២០ ខែសីហា ឆ្នាំ​២០២១ ពាក់ព័ន្ធ​ករណី គាស់​ទ្វារ​បន្ទប់​ជួល លួច​យក​សម្ភារៈ បាន​មួយចំនួន នៅ​ចំណុច បន្ទប់​ជួល​លេខ​១៦ ភូមិ​អូរ​ឌឹ​ម សង្កាត់​ចោមចៅ​៣ ខណ្ឌ​ពោធិ៍​សែន​ជ័យ​។ ជនសង្ស័យ បាន​សារភាពថា ខ្លួន​បាន ធ្វើ​សកម្មភាព​លួច រយៈពេល ៣ ឆ្នាំ​មកហើយ និង​ធ្លាប់ធ្វើ​សកម្មភាព​លួច ជាច្រើនលើក ថ្មីៗ​នេះ បាន​ចូល​លួច​ក្នុងផ្ទះ ជនជាតិ​ចិន នៅ​ម្តុំ​អូ​ឌឹ​ម បាន​លុយ​ជាង មួយ​ម៉ឺន​ដុល្លារ និង​បាន​លួច នៅ​ម្តុំ​បុរី​ពិភពថ្មី កំបូល បាន​ម៉ូតូ ១ គ្រឿង ហើយ​ចុង​ក្រោយនេះ លួច​នៅក្នុង​ភូមិសាស្ត្រ ខណ្ឌ​ពោធិ៍​សែន​ជ័យ ក៏ត្រូវ​កម្លាំង​ល្បាត អាវុធហត្ថ​ខណ្ឌ​ពោធិ៍​សែន​ជ័យ ឃាត់ខ្លួន​តែម្តង​។​

​ជនសង្ស័យ​ទី​៣ ឈ្មោះ អាត ហេង​ឡុង ភេទ​ប្រុស អាយុ​១៧​ឆ្នាំ នៅ​ចំណុច​ផ្ទះ​លេខ​A33 ផ្លូវលំ ភូមិ​ត្រពាំង​ក្រសាំង ខណ្ឌ​ពោធិ៍​សែន​ជ័យ ត្រូវបាន​មូលដ្ឋាន អាវុធហត្ថ​ខណ្ឌ​ពោធិ៍​សែន​ជ័យ អន្តរាគមន៍ ឃាត់ខ្លួន កាលពី​ថ្ងៃទី​២០ ខែសីហា ឆ្នាំ​២០២១ ពាក់ព័ន្ធ​ករណី​គំរាមកំហែង ទារប្រាក់​ពី​ម្តាយបង្កើត និង​វាយ​បំផ្លិចបំផ្លាញ ទ្រព្យសម្បតិ្ត​ក្នុងផ្ទះ ជាច្រើនលើក ច្រើនសារ ដោយសារ​ជនសង្ស័យ​នេះ បាន​ប្រើប្រាស់​គ្រឿងញៀន រហូត​គ្រប់គ្រង​ខ្លួនឯង លែង​បាន​៕/V​