​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ ប្រធានាធិបតី​ហ្វីលីពីន​លោក​រ៉ូ​ឌ្រី​ហ្គោ ឌុយ​ទែត​បានប្រកាសថា​លោក​នឹង​ឈរឈ្មោះ​ប្រជែង​តំណែង​អនុ​ប្រធានាធិបតី​នៅ​ឆ្នាំក្រោយ​ដើម្បី​បន្ត​”​បូជនីយ​​កិច្ច​” ប្រឆាំង​គ្រឿងញៀន​និង​ក្រុម​បះបោរ ជា​ចំណាត់ការ​មួយ​ត្រូវបាន​ក្រុម​អ្នក​រិះគន់​និយាយថា​ជា “​ការប៉ុនប៉ង​គេចកែ​” និង​ជំរុញ​ដោយ​ការភ័យខ្លាច​អំពី​ការចោទប្រកាន់​ពី​បទ​ព្រហ្មទណ្ឌ​។​

​លោក​ឌុយ​ទែត ដែល​បាន​ជាប់ឆ្នោត​ប្រធានាធិបតី​ក្នុង​ឆ្នាំ ២០១៦ និង​ត្រូវបាន​រារាំង​ក្រោម​រដ្ឋធម្មនុញ្ញ​មិន​ឱ្យ​ស្វែងរក​អាណត្តិ​ថ្មី​នោះ​ពី​មុន​ធ្លាប់​បាន​បង្ហើប​ឱ្យដឹង​ពី​លទ្ធភាព​នៃ​ការប្រកួតប្រជែង​​យក​តំណែង​ខ្ពស់​បំផុត​ទី​ពីរ​របស់​ប្រទេស​។​

​លោក​ឌុយ​ទែតបាន​និយាយ​នៅ​ល្ងាច​ថ្ងៃ​អង្គារ​នៅក្នុង​សុន្ទរកថា​ថត​ទុកជាមុន ដើម្បី​បញ្ជាក់​ពី​ការប្រកាស​មុន​នេះ​ដោយ​គណបក្ស PDP-Laban​របស់​គាត់​ថា​គាត់​បាន​យល់ព្រម​ប្រជែង​​តំណែង​នេះ យ៉ាង​ដូច្នេះ​ថា “​ខ្ញុំ​នឹង​ឈរ​ឈ្មោះ​ប្រជែង​តំណែង​អនុ​ប្រធានាធិបតី​”​។​

​លោក​និយាយថា “​បន្ទាប់​មក​ខ្ញុំ​នឹង​បន្ត​បូជនីយកិច្ច​នេះ​។ ខ្ញុំ​ព្រួយបារម្ភ​អំពី​គ្រឿងញៀន ការបះបោរ ពិតណាស់ លេខ​មួយ​គឺ​ការបះបោរ បន្ទាប់មក​គឺ​ឧក្រិដ្ឋកម្ម​និង​គ្រឿងញៀន​។​ខ្ញុំ​ប្រហែល​​ជា​មិន​មាន​អំណាច​ក្នុង​ការ​ផ្តល់​ការណែនាំ​ឬ​បទបញ្ជា​នោះទេ ប៉ុន្តែ​ខ្ញុំ​តែងតែ​អាច​បង្ហាញ​ទស្សនៈ​របស់​ខ្ញុំ​ជា​សាធារណៈ​”​។​

​ចាប់តាំងពី​ឡើង​កាន់​អំណាច​មក លោក​ឌុយ​ទែតបាន​ធ្វើ​យុទ្ធនាការ​បង្ហូរឈាម​ប្រឆាំង​អ្នកប្រើប្រាស់​គ្រឿងញៀន​និង​អ្នកជួញដូរ​គ្រឿងញៀន​ដែល​ក្រុម​សិទ្ធិ​មនុស្ស​ប៉ាន់ស្មាន​ថា​បាន​សម្លាប់​មនុស្ស​​រាប់​ម៉ឺន​នាក់​។​

​ក្រុម​រដ្ឋអាជ្ញា​នៃ​តុលាការ​ឧក្រិដ្ឋកម្ម​អន្តរជាតិ (ICC) កំពុង​ស្វះស្វែង​បើក​ការបើក​ការស៊ើបអង្កេត​យ៉ាង​ពេញទំហឹង​ចំពោះ​ការសម្លាប់​នេះ​។​

​ក្រុម​ឧទ្ទាម​កុម្មុយនីស្ត​និង​អ្នកគាំទ្រ​របស់​ពួកគេ​ក៏​ត្រូវបាន​កំណត់​គោលដៅ​ផងដែរ ខណៈ​លោក​ឌុយ​ទែត​ព្យាយាម​បញ្ចប់​ការបះបោ​រ​ដែលមាន​អាយុកាល​រាប់​ទសវត្សរ៍​៕

​លោក​ឌុយ​ទែត​បញ្ជាក់ថា​គាត់​នឹង​ឈរឈ្មោះ​ប្រជែង​តំណែង​អនុ​ប្រធានាធិបតី​ឆ្នាំក្រោយ