ដោយៈ​ប​.​ខុន​/​ភ្នំពេញៈ​បន្ទាប់ពី​ក្រុងព្រះសីហនុ គឺ​ក្រុង​ខេមរភូមិន្ទ​នៃ​ខេត្តកោះកុង ក៏​ទទួល​នូវ​ការលិចលង់​ពី​ជំនន់​ទឹក​ដែល​បាន​ធ្លាក់​ដល់​កម្រិត​២៤៥​មី​លី​ម៉ែត្រ​នៅ​យប់​ថ្ងៃទី​២៥​ខែសីហា​ដែរ តែ​ទឹកបាន​ស្រក​ទៅវិញ​នៅ​ព្រឹក​ថ្ងៃទី​២៦​សីហា ប៉ុន្តែ​ទោះបីជា យ៉ាងណា ការធ្លាក់​ភ្លៀង​នៅ​តំបន់​មាត់សមុទ្រ​អាច​នឹង​កើតមាន​ច្រើន​ថ្ងៃ​ទៀត​ក្នុង ពេល​ប្រព័ន្ធ​សម្ពាធ​ទាប​បានកកើតឡើង​វិញ​នៅលើ​តំបន់​មេគង្គ​លើ​។​

​លោក ចាន់ យុ​ត្ថា អ្នកនាំពាក្យ​និង​ជា​រដ្ឋលេខាធិការ​ក្រសួង​ធនធានទឹក និង​ឧតុនិយម បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​២៦​ខែសីហា​ថា​ប្រព័ន្ធ​សម្ពាធ​ទាប​បានកកើតឡើង​វិញ ជាថ្មី​នៅ​តំបន់​អាង​ទន្លេមេគង្គ​លើ​ហើយ​អាច​អូស​ទៅជា​ប់​ជាមួយនឹង​សម្ពាធ​ទាប នៅ​ប្រទេស​ហ្វីលីពីន​ធ្វើ​មាន​ភ្លៀង​ធ្លាក់​ច្រើន​ទាំង​នៅក្នុង​ប្រទេស​កម្ពុជា​ក៏ដូចជា​នៅ​តំបន់​អាង​ទន្លេមេគង្គ​លើ​។​ប្រព័ន្ធ​សម្ពាធ​ទាប​ថ្មី​នេះ​អាច​ស្ថិតនៅ​ឡើង​ចុះ​លើ​តំបន់​មេគង្គ លើ​ច្រើន​ថ្ងៃ​នៅពេល​ខាងមុខ​។​

​អ្នកនាំពាក្យ​ក្រសួង​ជំនាញ​ខាងលើ​បានបញ្ជាក់​ថា​នៅ​តំបន់​មាត់សមុទ្រ​ក្នុង​រយៈពេល​ពីរ​បី​ថ្ងៃ​កន្លងទៅនេះ​មាន​ភ្លៀង​ធ្លាក់​ច្រើន​រហូតដល់​មានការ​លិចលង់​ដូចជា​នៅ ខេត្ត​ព្រះសីហនុ​និង​ខេត្តកោះកុង​។ ខេត្ត​ព្រះសីហនុ​កាលពី​ថ្ងៃទី​២៤​ខែសីហា​មាន ភ្លៀង​ធ្លាក់​ដល់​កម្រិត​២៧៩​មី​លី​ម៉ែត្រ​ធ្វើឱ្យមាន​ការលិចលង់​ទីក្រុង​តែ​ទឹកបាន​ស្រក​អស់​ទៅវិញ ក្នុង​រយៈពេល​៩០​នាទី​បន្ទាប់​។ នៅ​ថ្ងៃទី​២៥​មាន​ភ្លៀង​ធ្លាក់​ដល់​កម្រិត​១៥២ មី​លី​ម៉ែត្រ​តែ​មិន​បណ្តាលឱ្យ​ក្រុងព្រះសីហនុ​លិចលង់​ម្តងទៀត​ទេ ព្រោះ​ភ្លៀង​ធ្លាក់ មិន​គំហុក​។ នៅឯ​ខេត្តកោះកុង​វិញ​ថ្ងៃទី​២៥​ខែសីហា​មាន​ភ្លៀង​ធ្លាក់​ដល់​កម្រិត រយ​មី​លី​ម៉ែត្រ​នៅ​គ្រប់​ស្រុក​និង​នៅ​ក្រុង​ខេមរភូមិន្ទ​មាន​កម្រិត​ដល់​២៤៥​មី​លី​ម៉ែត្រ​ធ្វើឱ្យមាន​ការលិចលង់​ផ្សារ​និង​លិច ផ្ទះសម្បែង​នៅក្នុង​ក្រុង​នៃ​តំបន់​ផ្សារ​។​

​លោក ចាន់ យុ​ត្ថា បានឱ្យដឹង​ទៀតថា ក្រុង​ខេមរភូមិន្ទ​បានចាប់ផ្តើម​លិចលង់​នៅ ម៉ោង​៦​ល្ងាច​ថ្ងៃទី​២៥​ខែសីហា តែ​បានចាប់ផ្តើម​ស្រក​ទៅវិញ​នៅ​ព្រឹក​ថ្ងៃទី​២៦ ខែសីហា ភ្លៀង​នៅតែ​បន្ត​ធ្លាក់​នៅលើ​ខេត្តកោះកុង​តែ​មិន​ធ្លាក់​ខ្លាំង​ដូច​កាល ពី​យប់​ទេ​។ របាយ​ទឹកភ្លៀង​ដែល​បាន​ធ្លា​ក់លើ​បណ្តា​ខេត្ត​នានា​រយៈពេល​២៤​ម៉ោង ត្រឹម​ព្រឹក​ថ្ងៃទី​២៦ ខែសីហា នៅ​ខេត្តកោះកុង​មាន​ដល់​កម្រិត​២៤៥​មី​លី​ម៉ែត្រ​, ព្រះសីហនុ​១៥២​មី​លី​ម៉ែត្រ​, កំពត​១៣​មី​លី​ម៉ែត្រ​,​កែប​៣៧​មី​លី​ម៉ែត្រ​,​កំពង់ស្ពឺ​៤០ មី​លី​ម៉ែត្រ​, តាកែវ​២២​មី​លី​ម៉ែត្រ​,​ព្រៃវែង​៤៦​មី​លី​ម៉ែត្រ​,​ឧ​ត្ត​រ​មានជ័យ​៤៣​មី​លី​ម៉ែត្រ​, បន្ទាយមានជ័យ​៣២​មី​លី​ម៉ែត្រ​,​ត្បូងឃ្មុំ​៣៥​មី​លី​ម៉ែត្រ​,​ស្វាយរៀង​៥៦​មី​លី​ម៉ែត្រ​, មណ្ឌលគិរី​៩​មី​លី​ម៉ែត្រ​,​ពោធិសាត់​៤០​មី​លី​ម៉ែត្រ​,​រតនគិរី​៦០​មី​លី​ម៉ែត្រ​,​សៀមរាប​៥៥​មី​លី​ម៉ែត្រ​,​កណ្តាល​២១​មី​លី​ម៉ែត្រ​,​ប៉ៃលិន​២៥​មី​លី​ម៉ែត្រ​,​ស្ទឹងត្រែង​២៣​មី​លី​ម៉ែត្រ​,​ព្រះវិហារ​២៥​មី​លី​ម៉ែត្រ​,​បាត់ដំបង​៧២​មី​លី​ម៉ែត្រ​(​គាស់ក្រឡ​),​កំពង់ធំ​៣៨​មី​លី​ម៉ែត្រ​, ក្រចេះ​១១​មី​លី​ម៉ែត្រ​,​កំពង់ឆ្នាំង​៩៥​មី​លី​ម៉ែត្រ​។​

​ក្រសួង​ធនធានទឹក​និង​ឧតុនិយម​នៅ​ថ្ងៃទី​២៤​ខែសីហា​ឆ្នាំ​២០២១​បាន​ជូនដំណឹង​ស្តីពី​ការ​ព្យាករ​ស្ថានភាព​អាកាសធាតុ សម្រាប់​ពីថ្ងៃ​ទី​២៥​ដល់​ថ្ងៃទី​៣១​ខែសីហា​ថា ក្នុង​សប្តាហ៍​នេះ​ព្រះរាជាណាចក្រ​កម្ពុជា​ទទួល​ឥទ្ធិពល​ពី​ជ្រលង​សម្ពាធ​ទាប​ឥណ្ឌា​កម្រិត​ខ្លាំង​នឹង​អាច​កើតមាន​ជ្រលង​ស​ម្ពា​ប​ទាប ITCZ សារជាថ្មី​ឡើងវិញ​។ ស្ថានភាព អាកាសធាតុ​បែប​ខាងលើនេះ​នឹងធ្វើ​ឲ្យ​បណ្តា​ខេត្ត​នៅ​តំបន់​វាលទំនាប​កណ្តាល​មាន​សីតុណ្ហភាព​អប្បបរមា​ពី​២៥​ទៅ​២៧​អង្សា​សេ សីតុណ្ហភាព​អតិបរមា​មាន​ពី​៣៤​ទៅ ៣៦​អង្សា​សេ​។​អាចមាន​ភ្លៀង​ធ្លាក់​រាយប៉ាយ​ក្នុង​កម្រិត​ពី​មធ្យម​ទៅ​ខ្លាំង​លាយឡំ​ទៅដោយ ផ្គរ រន្ទះ និង​ខ្យល់​កន្ត្រាក់ ។​

​សម្រាប់​បណ្តា​ខេត្ត​ជាប់​ជួរ​ភ្នំ​ដងរែក​និង​ខ្ពង់រាប​ឦសាន​មាន​សីតុណ្ហភាព​អប្បបរមា​ពី​២៣​ទៅ​២៥​អង្សា​សេ សីតុណ្ហភាព​អតិបរមា​មាន​ពី​៣២​ទៅ​៣៤​អង្សា​សេ​។ អាចមាន ភ្លៀង​ធ្លាក់​ក្នុង​កម្រិត​ពី​មធ្យម​ទៅ​ច្រើន​លាយឡំ​ទៅដោយ​ផ្គរ រន្ទះ និង​ខ្យល់​កន្ត្រាក់​។​ តំបន់​មាត់សមុទ្រ​សីតុណ្ហភាព​អប្បបរមា​មាន​ពី​២៣​ទៅ​២៥​អង្សា​សេ សីតុណ្ហភាព អតិបរមា​មាន​ពី​៣៣​ទៅ​៣៥​អង្សា​សេ​។​អាចមាន​ភ្លៀង​ធ្លាក់​ក្នុង​កម្រិត​ពី​មធ្យម​ទៅ​ច្រើន​។ នៅលើ​ផ្ទៃសមុទ្រ​អាចមាន​ភ្លៀង​ធ្លាក់​ច្រើន​និង​រលក​សមុទ្រ​មធ្យម ។​ នៅក្នុង​សេចក្តីជូនដំណឹង​បាន​អំពាវនាវ​ដល់​ប្រជាពលរដ្ឋ​ឱ្យមាន​ការប្រុងប្រយ័ត្ន​ចំពោះ​បាតុភូត​ភ្លៀង ផ្គរ រន្ទះ ខ្យល់​កន្ត្រាក់ និង​រលក​សមុទ្រ​៕​/PC