ដោយៈ សុផល / ភ្នំពេញៈ លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ និង​ដឹកជញ្ជូន នា​ថ្ងៃទី​២៦ ខែសីហា ឆ្នាំ​២០២១ នៅ​ទីស្តីការក្រសួង បាន​អញ្ជើញ​ផ្តល់​បាឋកថា តាម​ប្រព័ន្ធ​វីដេអូ​ពី​ចម្ងាយ (Zoom) តាម​ការអញ្ជើញ​របស់ សាលា​ភូមិន្ទ​រដ្ឋបាល លើ​ប្រធានបទ ស្តីពី “​ភាពជា​អ្នកដឹកនាំ និង​នវានុវត្តន៍​” ជូន​ដល់​សិក្ខាកាម​ជាន់ខ្ពស់ នៃ​វគ្គ​បណ្តុះបណ្តាល ភាពជា​អ្នកដឹកនាំ និង​នវានុវត្តន៍ ។​

​ពិធី​នេះ​ត្រូវបាន​រៀបចំឡើង ក្រោម​កិច្ចសហប្រតិបត្តិការ រវាង​ក្រសួង​មុខងារសាធារណៈ តាមរយៈ​សាលា​ភូមិន្ទ​រដ្ឋបាល និង​ធនាគារពិភពលោក ដោយមាន​ការចូលរួម ពី​ថ្នាក់ដឹកនាំ​ក្រសួង​- ស្ថាប័ន និង​អង្គភាព​ថ្នាក់ក្រោម​ជាតិ សរុប​ប្រមាណ ១៥០ រូប មកពី ២៧ ស្ថាប័ន ។

 

​ថ្លែង​ស្វាគមន៍​ក្នុងឱកាស​នោះ លោក យក់ ប៊ុន​ណា រដ្ឋលេខាធិការ ប្រចាំការ នៃ​ក្រសួង​មុខងារ សាធារណៈ និង ជា​នាយក​សាលា​ភូមិន្ទ​រដ្ឋបាល បានលើកឡើង​ថាៈ ការចូលរួមចំណែករ​បស់ លោក​ទេសរដ្ឋមន្ត្រី ក្នុងការ​ផ្តល់​បាឋកថា នាពេលនេះ ជា​សកម្មភាព​ដ៏​ថ្លៃថ្លា ដើម្បី​ជួយ​ពង្រឹង​នូវ ប្រសិទ្ធភាព នៃ​ការកសាង​ធនធានមនុស្ស ស្របតាម​គោលនយោបាយ អភិវឌ្ឍន៍​ធនធានមនុស្ស នៅក្នុង​វិស័យ​សាធារណៈ​របស់ រាជរដ្ឋាភិបាល​កម្ពុជា ក៏ដូចជា ដើម្បី​ពង្រឹង​ដំណើរការ​បណ្តុះបណ្តាល នៃ​សាលា​ភូមិន្ទ​រដ្ឋបាល ឱ្យ​កាន់​តែមាន​គុណភាព ប្រសិទ្ធភាព និង​ស្របតាម​ការវិវត្ត​ថ្មីៗ របស់​សង្គម​ផងដែរ​។​

 

​លោក យក់ ប៊ុន​ណា បាន​ជម្រាបជូន​ផងដែរ អំពី​កម្មវត្ថុ​នៃ ការសិក្សា ដែល​សាលា​បានរៀបចំ តាំងពី​ដើមឆ្នាំ​២០២០ និង​គ្រោង​បន្ត​រហូតដល់ ចុងឆ្នាំ​២០២១ ដែល​ក្នុងនោះ រួមមាន​៖
​ភាពជា​អ្នកដឹកនាំ គំរូ​ផ្សេងៗ នៃ​ភាពជា​អ្នកដឹកនាំ ការស្វែងយល់ អំពី​បញ្ហា និង​ដំណោះស្រាយ ទំនាក់ទំនង និង​ភាពជា​ដៃគូ ការលើកកម្ពស់​គុណភាព ប្រសិទ្ធភាព​អង្គភាព និង​ការកែលម្អ​សេវា សាធារណៈ ការជំរុញ​សមត្ថភាព សហប្រតិបត្តិការ ការធ្វើការ​ជា​ក្រុម និង​ការពង្រឹង សមត្ថភាព​បុគ្គល រួមទាំង​សមត្ថភាព នៃ​ការដោះស្រាយ​ជម្លោះ និង​ការគ្រប់គ្រង​សមិទ្ធកម្ម នៅក្នុង​អង្គភាព​ផងដែរ​។​

​ជាមួយគ្នា​នោះដែរ លោក​រដ្ឋលេខាធិការ​ប្រចាំការ ក្នុងនាម​ថ្នាក់ដឹកនាំ នៃ​ក្រសួង​មុខងារសាធារណៈ
​និង​ក្នុងនាម​ថ្នាក់ដឹកនាំ សាលា​ភូមិន្ទ​រដ្ឋបាល រួមទាំង​ដៃគូ​សហការ ធនាគារពិភពលោក បាន​ថ្លែងអំណរគុណ យ៉ាង​ជ្រាលជ្រៅ ជូន​ចំពោះ​លោក​ទេសរដ្ឋមន្ត្រី ដែល​បាន​ចំណាយ​ពេលវេលា ដ៏​មានតម្លៃ និង​មមាញឹក ក្នុង​ការងារ ដើម្បី​ចូលរួម​ចែករំលែក​ចំណេះដឹង និង​បទពិសោធន៍​ល្អៗ ជាច្រើន​ឆ្នាំ ទាំង​នៅក្នុង​វិស័យ​សាធារណៈ និង​ក្នុង​វិស័យ​ឯកជន ជូន​ដល់​សិក្ខាកាម​ជាន់ខ្ពស់ នៃ​វគ្គ​បណ្តុះបណ្តាល របស់​សាលា​ភូមិន្ទ​រដ្ឋបាល​។​

​ជា​កិច្ច​ចាប់ផ្តើម​បាឋកថា លោក​ទេសរដ្ឋមន្ត្រី បាន​ចែករំលែក​បទពិសោធន៍ ជូន​សិក្ខាកាម ទាក់ទង​នឹង​ភាពជា​អ្នកដឹកនាំ ដែល​បាន​បម្រើការ នៅក្នុង​វិស័យ​ឯកជន ជាពិសេស​នៅក្នុង​ក្រុមហ៊ុន General Electric របស់​សហរដ្ឋអាមេរិក អស់​រយៈពេល ១៦ ឆ្នាំ ប្រវត្តិ​ការងារ នៃ​ភាពជា​អ្នកដឹកនាំ នៅក្នុង​ស្ថាប័ន​នានា​របស់ រាជរដ្ឋាភិបាល និង​បាន​បង្ហាញជូន​អំពី ភាពជោគជ័យ​នៃ ការងារ​កំណែទម្រង់ ការគ្រប់គ្រង និង​ការអភិវឌ្ឍ វិស័យ​សាធារណការ និង​ដឹកជញ្ជូន ក្នុង​ផែនការ រយៈពេល ១០០ ថ្ងៃ នៃ​ការចូល​កាន់តំណែង ជា​រដ្ឋមន្ត្រីក្រសួង​សាធារណការ និង​ដឹកជញ្ជូន​។​

 

​លោក​ទេសរដ្ឋមន្ត្រី បានផ្តល់​ជា​អនុសាសន៍ និង​ដំបូន្មាន​ល្អៗ ជូន​ដល់​អង្គ​សិក្ខាកាម​ថាៈ បើ​យើង​ចង់​ក្លាយ ខ្លួន ជា​អ្នកដឹកនាំ ក្នុង​ការបម្រើ​ប្រទេសជាតិ ប្រកបដោយ​ប្រសិទ្ធភាព យើង​ត្រូវមាន​បទពិសោធន៍​ច្រើន ត្រូវមាន​ភាពក្លាហាន ត្រូវខិតខំ​ស្រូបយក​ចំណេះវិជ្ជា អំពី​ការងារ​ផ្សេងៗ​គ្នា កុំ​ឱ្យនៅ​មួយកន្លែង ជាពិសេស
​ត្រូវ​ប្រែ​ក្លាយខ្លួន ឱ្យទៅជា​អ្នកចេះដឹង​ទូទៅ (Generalist) កុំ​ធ្វើ​ត្រឹមតែ​ជា​អ្នកជំនាញ (Specialist) និង​ត្រូវ​យល់​គ្រប់​ចំណែក​ទាំងអស់ នៃ​ការងារ​។​

​ជាងនេះទៅទៀត លោក​ទេសរដ្ឋមន្ត្រី បាន​ជម្រាបជូន អំពី​បទពិសោធន៍ ទាក់ទង​នឹង​ការកែទម្រង់​របៀប ធ្វើ​ការងារ នៅក្នុង​ស្ថាប័នរដ្ឋ ក៏ដូចជា វិស័យ​ឯកជន ដោយបាន​សង្កាត់​ធ្ងន់​ថាៈ យើង​មាន​រយៈពេល​យ៉ាង យូរ​ប្រាំ​មួយខែ​ប៉ុណ្ណោះ ដើម្បី​ធ្វើការ​កែទម្រង់ របៀប​ធ្វើការ​ឱ្យបាន​ជោគជ័យ ដោយហេតុថា អ្នកខ្លះ​មិន​ចង់ កែទម្រង់​របៀប​ធ្វើការ អ្នកខ្លះ​ខ្លាច​ការកែទម្រង់​របៀប​ធ្វើការ និង​អ្នក​ខ្លះទៀត ចង់​អោបក្រសោប របៀប​ធ្វើការ ចាស់ ដូច្នេះ​ការកែទម្រង់​របៀប​ធ្វើការ មិនមែនជា​ការងារ ងាយស្រួល​នោះឡើយ​។​

​លោក​ទេសរដ្ឋមន្ត្រី បាន​ផ្តាំផ្ញើ​ដល់​អង្គ​សិក្ខាកាម​ផងដែរ​ថាៈ ក្នុងនាម​ជា​ថ្នាក់ដឹកនាំ ត្រូវ​ចេះ​លើកទឹកចិត្ត ដល់​មន្ត្រីក្រោមឱវាទ មានការ​ទទួលខុសត្រូវ​ខ្ពស់ ចំពោះ​ការងារ ប៉ុន្តែ​ថ្នាក់ដឹកនាំ គួរតែ​ទទួល​យកខុស បាន​ហើយ ទុកឱ្យ​មន្ត្រីក្រោមឱវាទ ជា​អ្នកទទួលយក​ត្រូវ ។​

​លោក​បាន​រំលឹក​ឡើងវិញ​ផងដែរ នូវ​អនុសាសន៍​ដ៏​ខ្ពង់ខ្ពស់ របស់​សម្តេច​តេ​ជោ នាយករដ្ឋមន្ត្រី​ថាៈ មន្ត្រី គឺជា​អ្នកបម្រើ​រាស្ត្រ មិនមែនជា​ចៅហ្វាយ​របស់​រាស្ត្រ​ទេ ត្រូវខិតខំ​ប្រឹងប្រែង ផ្តល់​សេវាសាធារណៈ ឱ្យបាន​លឿន មាន​ប្រសិទ្ធភាព និង​តម្លាភាព ហើយ​លោក ទេសរដ្ឋមន្ត្រី បានធ្វើ​កត់សម្គាល់​បន្ថែ​ម​ថាៈ ក្នុងសង្គម​យើង សព្វថ្ងៃនេះ មាន​មនុស្ស​ចំនួន បួន ប្រភេទ​គឺ​៖ អ្នក​ថា អ្នកធ្វើ អ្នក​ឈរ​មើល និង​អ្នក​ទិតៀន ក្នុងចំណោម​មនុស្ស បួន​ប្រភេទ​នេះ ចូរ​កុំ​ធ្វើខ្លួន​ជា​អ្នក​ថា និង​អ្នក​ឈរ​មើល គួរ​ចូលរួម​ជាមួយ រាជរដ្ឋាភិបាល ដើម្បី​អភិវឌ្ឍ​ប្រទេសជាតិ​យើង ឱ្យមាន​ការរីកចម្រើន​។​

​លោក​ទេសរដ្ឋមន្ត្រី បាន​ថ្លែងអំណរគុណ យ៉ាង​ជ្រាលជ្រៅ ដល់​សាលា​ភូមិន្ទ​រដ្ឋបាល ដែល​បាន​យកចិត្ត
​ទុកដាក់ ក្នុងការ​បណ្តុះបណ្តាល​ធ​ន​ធាន​មនុស្ស ដើម្បី​ឆ្លើយតប​នឹង​ការអភិវឌ្ឍ របស់​ប្រទេសជាតិ
​និង​ដៃគូ​អភិវឌ្ឍន៍ ដែល​បាន​ចូលរួម​សហការ ក្នុងការ​បណ្តុះបណ្តាល មន្ត្រី​កម្ពុជា ពី​គ្រប់​ក្រសួង​-​ស្ថាប័ន ឱ្យមាន​សមត្ថភាព​ខ្ពស់ ដើម្បី​បំពេញការងារ ប្រកបដោយ​ប្រសិទ្ធភាព​។​

​ឆ្លៀត​ក្នុងឱកាស​នោះ លោក​ទេសរដ្ឋមន្ត្រី បានលើកឡើង នូវ​ពាក្យស្លោក​អប់រំ​ផងដែរ​ថាៈ “​យើង​មិនអាច រស់​នៅលើ​កោះ ដែល​សម្បូរ​ទៅដោយ ទ្រព្យសម្បត្តិ​ស្តុកស្តម្ភ ហើយ​ហ៊ុមព័ទ្ធ​ដោយ​សមុទ្រ នៃ​ភាពក្រីក្រ​នោះទេ​”​។ វា​គឺជា​ការទទួលខុសត្រូវ របស់​អ្នក​រាល់គ្នា ដែល​យើង​ត្រូវ​ធ្វើការ​ជាមួយគ្នា ដើម្បី​ពង្រីក​កោះ​ដែល​ពោរពេញ​ដោយ ទ្រព្យសម្បត្តិ​របស់​យើង ឱ្យ​កាន់តែ​ធំ​ទៅៗ និង​ធ្វើឱ្យ​សមុទ្រ នៃ​ភាពក្រីក្រ​នេះ កាន់តែ​រួម​តូច​ទៅៗ​” ដើម្បី​ជា​ប្រយោជន៍ ដល់​ប្រជាជន និង​មនុស្សជាតិ​របស់​យើង និង​ពាក្យស្លោក​មួយចំនួនទៀត រួមមាន​៖ បើ​អ្នក​មិនដឹងថា អ្នក​ទៅណា ផ្លូវ​ណា ក៏​នាំ​អ្នក​ទៅដល់​ទីនោះ​ដែរ និយាយ​ត្រូវធ្វើ កុំ​និយាយ​ផ្សេង​ធ្វើ​ផ្សឹ​ង សំដី​ឥតប្រយោជន៍ នាំ​គ្រោះ​ដល់​ជាតិ ការងារ​មាន​ប្រសិទ្ធភាព នាំ​ជាតិ​រុងរឿង និង​កុំ​សួរថា កម្ពុជា​ធ្វើ​អី​ឱ្យ យើង ត្រូវ​សួរថា​យើង​ធ្វើ​អី​ឱ្យ​កម្ពុជា​៕/V​